十年眼鏡問答之2
‘眼鏡食水深唔深?’
呢個問題實在易答,一個字「深」已經答完。不過講明認真答,我當然會盡量喺唔影響行家嘅情況吓認真講吓一副眼鏡點樣賺錢,亦即係點樣養活我同我老闆啦。
作為業內嘅前線同事,聽得最多嘅一定係「我知道眼鏡好暴利!所以你要計平D」,真係難聽過粗口。眼鏡是否暴利,同我老闆唔比我做折,又或者我唔想折比你係兩件事呀(有D一睇就奄尖聲悶嘅,情願唔折叫佢考慮吓先)。多得強國淘寶,眼鏡架平到十幾二十蚊人仔就有一副,鏡片最平嘅一樣係幾十蚊人仔有一對,以為呢個係成本價?少年你真係太年輕了!聽過有個Case,有個老闆返大陸入貨,用五十蚊入咗一盒眼鏡,無錯係一盒,入面有成廿副眼鏡!香港嘅鏡片工場最平嘅鏡片20蚊一對包埋修邊手工,來源當然又係強國啦(已經係來自品質比較好嘅浙江大廠,溫洲嘅鏡片細廠可以更平,但質素太差無人用)所以點解咁多速食店可以幾百蚊鏡架連鏡,仲要請埋視光師驗眼?咪就係咁解。(通常佢地自己有廠,成本更低,品質更穩定)
喺早年大家未接觸到套餐鏡架,又唔介意眼鏡品質,視光師未使攞牌嘅年代,眼鏡的確係好好搵。到後來有班客要靚嘢,日本手造嘢或者牌子嘢,成本就高好多了。一般手造架賣兩三千嘅,成本過千係平常時(如果日圓升值就更貴),時裝牌子就更過份,將個價計返個6折就係成本,而且因為網上列晒價錢,你標太貴嘅話班客不如上網訂好過。靚牌子鏡片一樣,做一對賺三對差唔多了(例如400蚊成本賣1200蚊倒已經係極限,因為定晒公價,同埋一定有折比客)。加上近年行業人手不足,人工又貴咗(對我呢D打工嘅都算係好事),加上要做保養(度數更換,鏡架位短期損耗嘅處理,有時店家為留住個客都會硬食換比客)利潤同以前已經無得比了。
講到尾,一副眼鏡嘅價格同價值主要係來自驗眼,調較,售後跟進三大方面,所以眼鏡業近年都開始以品質同服務招倈。始終鬥平,根本唔夠上網或唔理會品質嘅樓上舖同工廠舖鬥。對客人嘅眼睛,都唔係一件好事。