ازاي تتعلم انجليزي عن طريق الأغاني

ينفع حد يستخدم الأغاني عشان يتعلم انجليزي؟ أكيد! مش بمعني انها هتعلمك كل اللغة لكن بمعنى ان الطريقة ديه هتساعدك تكتسب اللغة وتتعلم بسرعة. وده جزء من أساليب التعلم اللي بنتبعها في بوردرز في التعليم سواء للأطفال أو للكبار وده بيشمل الأفلام والألعاب كمان.

في فوائد كبيرة من انك تقوي لغتك من خلال الأغاني. أهم الفوائد ديه هي انها هتساعدك تزود المرادفات بتاعتك وتعرف طرق النطق الصحيحة واستخدام الجرامر بطرق مختلفة. ده بالإضافة إلى ان في الأغاني بيتم استخدام جمل وتعابير أساسية ومتداولة بين ناطقي اللغة.

الأغاني كمان هتساعدك تتأقلم على سماع كلمات مختلفة بالانجليزي وتبقى سهلة على ودانك، غير كدة الأغاني تعتبر سهلة للجميع. ناس كتير بتواجه مشاكل في تعلم اللغة أنها تعرف تكرس وقت دائماً تتعلم فيه، انما لو بتحاول تتعلم عن طريق شوية اغاني بتحبها الموضوع هيبقى أبسط وهتعمله كتير. ومن الفوائد التانية للموضوع ده هو ان الموسيقى من أفضل الطرق اللي تتعلم منها ثقافات مختلفة وديه حاجة مهمة جداً اثناء تعلم اللغات عشان تعرف تتكتسبها وتستوعبها.

ازاي تبدأ تتعلم من خلال الأغاني

أول حاجة تعملها هي انك تحضر قائمة بشوية أغاني تكون بتحبهم ومستعد تسمعهم كتير. والأهم انك تفتح الأغاني ديه من على يوتيوب عشان يكون معاهم الكلمات بتاعتهم في الفيديو وتسمع وتقرأ. مهم انك تسمع في الأول أغاني مش معقدة أو كلمتها مش صعبة، يعني ما تسمعش أغاني راب ولا ميتال فيها مصطلحات غريبة ومش أساسية.

حاول تبدأ بأغاني بتحكي قصة معينة عشان تقدر تتخيلها مع الكلمات اللي بتقراها. ولو انت لسه بتبدأ ممكن حتى تسمع أغاني الأطفال التعليمية وأغاني الكرتون، المهم تبعد عن أي حاجة معقدة.

غني مع الأغنية

وانت بتسمع الاغنية وبتقرأ الكلمات حاول تغني الأغنية. واحدة واحدة هتلاقي نفسك حافظ الأغنية بكلمتها. مش لازم تركز في أغنية واحدة لغاية ما تحفظها، ممكن تتعلم من خلال أكثر من أغنية عشان ما تزهقش. وطول الوقت دور على أغاني جديدة تكون بتقدملك كلمات ومعاني جديدة.

ده جزء من طرق تدريسنا في بوردرز، لو حابب تتعلم بالطريقة ديه معانا بالأضافة لطرق تانية مختلفة بتساعد في فهم اللغة واكتسابها، كلمنا على :01010389355–26902674 أو زورنا في فروعنا في مصر الجديدة: 34 شارع الشهيد أحمد وصفى — الماظة وفرع الهرم: شارع الهرم — المريوطية — برج الهرم بلازا الدور الثالث — شقة 304 — أعلى أولاد رجب وبنك عودة.

Show your support

Clapping shows how much you appreciated Borders Egypt’s story.