講吓香港最好賣嘅書。
嗱！我就唔會講數字嘅，不過睇吓個大概排名，你就知香港嘅閱讀風氣係幾咁搞笑。（唔係話佢差，係搞笑。）
4 min readApr 23, 2018
相信行開書局嘅大家都對香港暢銷書有個基本概念，下列香港暢銷三寶，排名不分先後：
。搵銀書（包括金融投資，上位攻略，職場求生等等）
。旅遊書（閃令令果堆）
。童書（包括兒童小說，繪本，連同育兒攻略）
搵銀書，係香港地係硬性需求，大家都揾銀至上嘛。你隨手係是旦一間書局搵，都可以搵到上百本教晒你唔同投資工具嘅書、教你如何見工、溝死老闆乜乜乜乜嘅書，今季淨係呢類書都出咗十幾本了。
旅遊書。香港人就當日本鄉下咁返，當然以東京沖繩為首嘅熱門地點最好賣，下次大家不妨揭下後頁出版資訊，望住本野三十幾四十刷，都唔知點解本野成日出錯，老點讀者都可以咁好賣。 （所以你話文字有價？嘿嘿。）
而兒童書點解咁好賣？事關有學校大量穩定入貨同推廣，家長們又係物質上錫到仔囡燶（不過仔囡睇唔睇係另一回事），所以點都賣得到（不過一定唔夠旅遊書好賣）。
好啦，講完「最好賣」呃咗你入黎，不如入吓正題，其實我最想講係香港「最難賣」嘅書。
香港文學同香港文化係堪稱最易損手離場嘅題材。
你話香港人唔睇文學，又唔係，日本文學有村上大神，連同一堆日本文學都好好賣。
你話香港人無文化，又唔係，先唔講大家幾中意去旅行。連最hardcore嘅文化專書，例如外國文化歷史、藝術書等等，一向都keep住細水長流～其實攤開嚟睇都唔錯架。
而你再問點解香港野係香港咁難賣？說實話，你問我其實我都唔知架。
你賴讀者水平低又唔係，事關大家都仲好中意讀外國嘅書呀！
你賴作者廢又唔係，香港文學上一代有金庸，呢代有天航、喬靖夫、陳浩基等等，陳浩基甚至係日本拎埋第一添（不過香港無乜人講，嘿嘿）。同時今年，港人黃裕邦寫英詩又係拎獎（但又係無乜人知）！
