讀書識得highlight，距離「成為一流的人」，不遠矣。
「明明我已經睇好多書，但點解仲係咁廢？」可能好多人都曾經有呢個諗法。
「點我咁多書，都仲係咁廢？」
《一流的人讀書，都在哪裡畫線？》或者答到你。
呢本書由土井英司所寫，佢嘅職涯離唔開「書」。2000年幫手創辦日本亞馬遜網上書店，以獨到嘅眼光打造出多本暢銷書，例如全球銷量超過600萬嘅《怦然心動的人生整理魔法》。佢聲稱自己每年讀1000多本書，即是大概每日2至3本書，再每日寫1篇書評，以EDM《商業書馬拉松》介紹1本商業書，EDM而家已經有超過5萬人訂閱。
所有數據指向一個結果︰土井英司有出色嘅「睇書之道」，有料到，可以偷師。
所謂畫線，即係highlight，係要搵出重點。當你成本書都highlight，即係搵唔到重點。土井英司強調睇書係有目的性，特別係睇商業書，係為咗自我增值，屬於投資。如果是是但但睇，只會得個桔。
點樣先叫唔是但？請永遠記住：「你想變得更好」。
係呢個大前提下，會疏理到作者提出嘅睇書貼士，而我認為當中離不開三大點︰
1) 唔好淨係求閱讀量，要重點閱讀
「讀書的重點在於『目的』而不是『數量』，所以應該要立志的是你的『目的』。有時候讀了十本書，不如把一本經典讀十次，因為真正的好書，可以讓你依據十個不同的目的，反覆讀個十遍。」
唔求數量，但要真正消化，呢個觀念絕對唔新。而土井英司再用重視「部分練習」多於「整體練習」嘅講法延伸，因為人生時間有限，所以要重點出擊。只睇心靈雞湯唔係路，要搵出自己嘅優點同缺點，再去深入讀有關類別嘅書，克服你最唔熟悉但又要必備嘅技能。例如身為腦細，但完全管唔掂下屬，就快手去睇出名得民心嘅CEO書，讀夠十次。唔好扮明，真明先好。
2) 唔好只係確認已知，要了解未知
「自我陶醉線只是確認既有信念，毫無意義。」
呢句真係一野打中我，好多時候人都傾向highlight引起共鳴嘅字句，原來自己諗嘅野係正確，出於自我感覺良好就會highlight，例如勵志名言錄等等。
「確認自己的『正確』無助於你的成長，反而會讓人變得偏頗，無法接受新思維與新方法，這對你的事業與職涯來說，是扣分而非加分。」
即係話真正要highlight嘅係當下「你唔明」或者「你唔認同」但又偏偏有「叮」一聲feel嘅句子。讀多兩讀，你先會將未知變成新發現。（題外︰咁講facebook應該加多問號button，畢竟like post只係自我陶醉mode。）
3) 唔好淨係見到結果，要搵出原因
作者提到自己喺Amazon工作時，最大領悟係「電腦可以分析結果，但無法製造出一個原因來達到這個結果」，用感性啲嘅講法係「人類真正的價值，就在於製造原因」。因此，佢不停喺閱讀過程搵唔同人創造嘅原因，去問點解，再諗自己點先可以學到當中嘅關鍵。
實學實用，土井英司「每日發行超過5萬人訂閱的書評電子報《商業書馬拉松》，已超過13年。」呢個只係結果，重點係研究點解？5萬人訂閱唔算多，點解仲會堅持到13年？寫書評點樣搵到食？係單純做引流？個生意模式係點？呢個時候，就會發現你要睇更多資料去搵出答案，無形中愈來愈深入了解。
請highlight出重中之重
讀書係工具，係訓練你不停思考嘅工具。由識得重點出撃，到不斷了解未知數，再而深入分析原因，四個字：「深度閱讀」。
當你真正highlight到重中之重，你先會由三四流變一流。
過去嘅主題文章：
【喜歡我們的話，可以拍拍手及分享。或是「Follow」我們，讓我們分享給你更多！如果想我們評論特定書本，歡迎留言！】
