中國仲係用鄭智;但香港連用邊個做教練都唔知

對於許多仇中嘅港人嚟講,聽到中國國家隊出征西亞,喺全場只得兩次射門,仲要無一次中框,無威脅之下敗於卡塔爾腳下,應該都會非常開心,然後又喺網上恥笑一下習大大嘅足球夢要幾世紀後先成真。
中國教練納比講明今次西亞之旅,喺下年年頭亞洲盃前嘅檢閱,所以揀咗中國國內幾乎現有最強嘅球員出戰,包括已經年屆38歲嘅老將鄭智。而今場比賽,銀狐嘗試咗3–5–2同4–3–3陣式,結果兩個陣式係面對卡塔爾呢支以U23球員為主嘅國家隊,都係搵唔到任何似樣入波機會,反而好幾次後防同門將嘅低級失誤,差啲可以畀卡塔爾入多幾球。
睇返大陸好多評論文章,都講緊上年9月中國都作客卡塔爾多哈打最後一場12強賽,喺落後之下成功反勝2:1,雖然始終唔可以壓過敘利亞得到附加賽資格,但納比麾下嘅中國就畀到中國人一種期待,一種希望。一年過去,雖然比數只係0:1,但比賽過程完全唔能夠接受,最攞命係中國精英盡出下,竟然面對卡塔爾嘅U23球員毫無還擊之力,令人開始懷疑納比,更加懷疑呢支中國隊究竟咩事。
只係一年,一年時間中國口中嘅「壕」(當年外圍賽海報暗寸人地係土豪),已經定清目標方向,培養新晉球員,踢落有板有眼,就係為咗2022年自己主辦嘅世界盃做準備。而中國足球呢一年又做咗啲乜嘢?一年後,38歲嘅鄭智仲係要打足全場,而銀狐都無辦法換佢落嚟,可怕了吧?未算,如果佢哋睇到南方嘅一個小城市今日發生嘅事。
韋特任港足新帥 「魔法教練」周一履新
http://s.nextmedia.com/realtime/a.php?i=20180907&s=7032049&a=58656942
傳媒報道,懸空咗超過半年嘅香港隊教練終於有眉目,將會由帶領台灣世界排名狂升嘅神奇教練韋特,下星期一來港履新。然後,足總董事梁芷珊夜晚喺佢個人面書專頁表示,如果韋特真係上任,佢會即刻離任董事。十幾分鐘之後佢另一個status係咁寫 — 「如果有人隻手遮天到呢個程度,都可以過到關,呢個足總實在令我太失望,如果佢上任,我辭職,理由係,這個機構太離譜,無得救!我會將呢個理由,寫埋係辭職信裏面。」

你無睇錯,我無寫錯,大家唔係睇緊《延禧攻略》,而係香港足總。果然,四個字講一個笑話或者悲劇,「香港足總」完全贏哂,毫無敵手。
令我更心寒嘅係,不論韋特上任與否,香港新主帥問題,到咗大半年後嘅今日都竟然仲係個問題,而唔係有個明確嘅答案。換句話講,即係負責搞波嘅人,都接受一支球隊可以大半年無一個真正教練、接受一支球隊可以半年無踢過任何一場國際A級,或者乜級都唔係嘅波。大家就咁由得佢,你唔講,我唔提,咪無人記得。
香港足總有段時間好怕香港隊主場有比賽,因為每次都有球迷噓國歌,然後又要罰錢又要畀人插辦事不力。原來解決嘅不二法門,就係唔好請教練返嚟,唔好比賽,咩都唔做,大家由得佢。對比中國國家隊,我覺得香港仲可怕,仲更加值得恥笑。
呢大半年,請問邊個還返畀香港足球?
