李彩燕權恩菲入閘,不幸中之大幸-《Produce48》最終回戰報出道篇(上)
雖然節目已經完咗接近一個禮拜,但每次寫戰報,聽返啲歌,睇返節目,心情都係有啲激動。究竟點解係呢12個人出道?既有啲不忿,但又期待佢哋條路走成點,畢竟我自從少女時代同Kara之後,已經多年無再追女團。各位亦都唔需要等好耐,IZ*ONE將會喺10月尾派歌,喺日韓兩國活動,展開2年又6個月嘅團體活動。

其實如果講屌票,今日呢篇應該屌得仲勁。不過每個民主選舉,都總係會有好多令人摸不著頭腦嘅選擇,但咁先至係民主嘅真諦(好似係)。再加上,到底《Produce48》係咪一個真正民主選舉,我哋都無從知曉。所以,就只能向前望,無謂搞到自己熱狗咁樣。到底追唔追個團,或者再有Produce系列仲落唔落坑,大家就自行決定。
今次《Produce48》嘅出道組合名叫「IZ*ONE」,IZ係取自12,象徵12個出道少女都係number one,而IZ嘅讀音同eyes類近,又可以解讀為「eyes one」。而佢公佈個陣,O字上方有粒*,初初以為無關係,原來都係名嘅一部份,所以之後都統一用IZ*ONE。

之後就同大家逐個睇出道組前12位分佈,其實有啲獨立一個寫一篇都得,有啲就會輕輕帶過,畢竟有好多入圍嘅我都無諗過佢係入到,亦一直無太過留意。
12.李彩燕

正如我上一篇講,如果我係睇直播,見到一位候補係張元英同宮脇,一定會瘋狂咁屌同嘔十九幾兩血。因為第12位4個候補 — — 李彩燕、宮崎美穗、李佳恩,同埋韓初媛,4個我都有tip佢哋成功出道,人生……
最後,小櫻花開到聲想同佢一齊出道嘅李彩燕壓線成功。對我嚟講,就只係一場慘勝,雖然有彩燕,但失去左李佳恩同韓初媛,仲未計下面嘅美宥,白間同埋朴海允。不過咁講,如果李彩燕最後真係冇份,我會毫不猶豫棄團,有安宥真同權恩菲都係咁話。因為,學歌神話齋,好歌有好報,好表現都應該有好報,如果咁值得入嘅人都入唔到,個團都冇價值(雖然依家都唔係好有)。

一開始其實唔係好明點解呢個大鼻妹可以排到咁前,但自從佢《Sorry not sorry》個腳飛腿之後,就開始留意佢。其後《1000%》發現佢歌唱實力都有返咁上下,就更加覺得呢條女值得出道。最終回佢成功做《以後請多關照》嘅center,一著燈佢對住鏡頭一笑,個下真係由心「嘩」咗一聲,好charming呀!
可以咁講,彩燕絕對係成個節目入面表現最穩定嘅其中幾個,而且每次表演都擺足心機,係有眼睇。有段時間佢畀班泡菜抺黑得好緊要,第11集曾經大翻身上到第3,可惜最後都都只係壓線過關。無論如何,加油呀彩燕!IZ*ONE嘅綜合能力,得你同權恩菲係拎得出檯面架咋陰功……
11.金珉周

珉周係過去咁多集都未試過衝到上頭12位,同李佳恩來個對比,把握機會係最關鍵嘅時間進入頭12。一直都係畀人最大嘅印象都只係「翻版子瑜」,老實講,實力就真係不怎麼樣架喇,不過《1000%》佢個轉身,又真係會畀佢電親。最後幾集睇得出佢係全方位進步咗,開始跟到節奏,個人活躍咗,笑容多咗,隨之成績都好咗。IZ*ONE門面就走唔甩架喇,靚女唔係罪過黎,不過要多多努力至得呀!
10.金彩元

好坦白同大家講,喺呢集之前我都未知佢係邊個。第11集戰報我寫最後20個陣,基本上全部都記得名,除咗佢之外。之後就去搵下料,原來係同恩菲同樣來自Woolim公司,再睇返佢啲表演,表現都過得去。一路都無發現佢人氣咁高,所以睇多次最終回,原來佢都幾多鏡頭,或者因為咁樣吸引到唔少人投佢一票。
9.本田仁美

仁美能夠成為其中一位入圍嘅日本少女,我其實係有啲驚訝。不過仁美人氣一直都唔差,經常守喺11、12位呢啲介乎出道同出唔到道嘅位置。而且你去YouTube睇佢啲直拍嘅話,全部hitrate都唔差。超級甜美嘅笑容,同埋麵包超人咁嘅面珠,真係可愛到痴線,呢個pick我又覺得泡菜們錯唔哂,最起碼仁美跳舞同唱歌都唔差。而且呢位妹豬只係得16歲,仲有好多成長空間,加油呀!
8.姜惠元

奇人姜惠元有份我就絕對唔意外喇,由第6集戰報我就預言咗佢一定會衝到上嚟。其實可以睇返之前好多集,每一次評比佢嘅鏡頭都唔少,而且一定有一個故事係關於佢,所以成功反轉唔係咩奇事。反正,最弱之隊《Boombayah》2組都贏到,發生係佢身上嘅奇事又少咩?
不過最大問題都係,佢嘅實力太曳。即便大家都係花瓶,但你見到珉周係明顯好咗,可惜呢個變化無喺惠元身上出現。其實導師係主題評比練習個陣已經講過,佢只係靠人氣走到呢一刻,要務必提升自身實力。但係,邊有話提就提到架。結果喺催淚曲入面,佢嘅份量就係woowoo咗兩下,然後,佢出道了。我重申一次,靚女唔係罪過,只係你咁都入到,然後我再睇返出局個啲少女嘅表演,我無說話好講啫……
7.權恩菲

權恩菲入到,可以講係呢場慘劇為數唔多令人恩慰嘅地方。恩菲嘅實力由第一集已經不容置疑,而除咗頭兩集外,恩菲從來都冇跌出過頭12位,只係排名有啲波動。畀恩菲吸引住當然係因為《Sorry not sorry》嘅演出,整個場面給她hold住。而係公佈結果個陣,佢同組員講嘅個句「我哋呢組要一齊贏,拎哂dance嘅1,2,3,4,5名」,雖然可能係門面說話,但我到呢一刻都仲好記得,因為好見到佢嘅大家姐風範。

正如我上篇所講,一直好期待佢同李佳恩呢條姐姐line喺組合入面嘅化學作用,但依家就要留低恩菲自己一個湊女了。IZ*ONE入面,就只有恩菲同埋小櫻花踏入二字頭。而恩菲為咗唔好令自己睇落咁老,成日都會扮可愛,整公主頭又綁條辮仔喺上面,雖然佢都仲係一位23歲嘅少女,但家下面對嘅一班都係未夠秤架陰功。呢位老大過去曾經出道嘅經驗,應該幫到個團唔少,所以隊長應該走唔甩架喇。加油呀恩菲,你係我第2pick嚟,不論唱歌抑或跳舞都要靠你撐住個團喇!

6.矢吹奈子

Nako入選當然係唔意外嘅事,自從佢《Love Whisper》個集展現出一流高音,一妹當關之後,佢嘅人氣就再無跌過,仲曾經上過一位候補。Nako小巧嘅身型,同埋成日都笑笑口嘅樣,本身已經好得人鍾意(呢啲都係日本偶像嘅本事,姑勿論真定假都好,佢哋都會散發一種親和力令你好鍾意佢哋。)
其實之前仲發生咗一件事,話說綜合評比個陣,Nako本身係vocal組《into the new world》嘅主音,但許允真就求Nako可唔可以畀佢做主音,結果Nako諗都無諗就讓咗個位畀佢。而呢件人品大爆發事件,令Nako人氣更加有增無減。
之前睇大陸有文章講過,Nako同小櫻花一齊出道,就等如一次過抽走HKT48兩個人氣極高嘅主將,擔心會同日本個邊傾唔掂數。當然,梗係希望Nako會一齊出道,呢啲咁正路嘅選擇,賣少見少架。
原來寫下寫下都咁長,為免嚇親人唔睇哂,咁就拆開上下篇咁出喇,下篇再同大家寫埋前5同埋對成個節目嘅總結。不過有個資訊想同大家講咗先,就係我搵料寫文時發現,AppleMusic已經齊哂所有《Produce48》嘅歌喇!可以日日狂loop了yeah!!

