الأفكار

ليه كان مهم بالنسبة لي أدون أفكاري؟

بالنسبة لي جزء كبير من هوية الانسان هي في الأفكار. ولأن الحياة عبارة عن تجارب تمتد بإتمتاد عمر كل إنسان ويقضي اغلب سنينه يحاول يكتشف نفسه -على الأقل كذا انا اشوفها- فكان مهم بالنسبة لي إني أكتب أفكاري عشان اذكر مين أنا كل ما رجعت وقريت هذه المدونة. لأن مع المسؤليات، مع المشاكل، مع نشاطات اليوم الواحد، مع ضغطوات الأنداد، ينسى الشخص نفسه، ينسى هو مين، وإيش طموحه، وإيش مبادئه..

المجتمع اللي انتمي له بيئة غير خصبة لتنمية الحس التفردي في كل شخص. دائما أضيع ما بين (إيش أنا أبغى، وإيش هم يبغوا) والموضوع مقلق.. لأنه حتى اللي يسعدك تخاف أنه ما يسعدك لأنك تستنكر إختلافك وتشك في مدى أهمية رغباتك أو حتى مدى صحتها!

أحتاج أتأكد من هويتي عشان أقدر أواجه العالم الخارجي وأقدر أكون واثقة من نفسي وواثقة من اختلافي بالتالي خياراتي في الحياة. أحتاج أعزز الثقة اللي نسفتها في نفسي بسبب الخوف والتردد.

حتى لو كان الآخريين يشوفوا أن هويتهم تكمن في ممتلكاتهم المادية، أو معارفهم الواصلين، أو في أسلوب لبس أو حياة أو حتى في حركات ولزمات كلام! بالنسبة لي أنا هويتي هي ولا شيء غير أفكاري الي استنتجتها من تجاربي الشخصية (صحيح اللي سبق ذكره جزء من هويتك، لكنها تمثل نسبة بسيطة من الهوية.) الأفكار هي الشئ الوحيد المميز/ الغير مكرر في كل انسان. أملكه ويملكه الجميع ولكن كثير مننا يتغافل/ يتجاهل أهميته.

الأفكار هي نتاج عن معلومات تم تلقيها بشكل مباشر أو غير مباشر من خلال التجارب.. كل تجربة متفردة ومختلفة — حتى وإن تكررت. لأن الشخص الواحد يستوعب الموقف بشكل مختلف بناءً على ماضيه وبالتالي النقل للآخرين وطريقة التفكير راح تكون مميزه وغير مكررة