Inuusuttuunerma naajartornerani ammasumik Kalaallit Nunaata politikerianut allagaq

Una Kalaallit Nunaata politikerianut allatara allagaavoq tamanut ammasoq, uangalu nammineq akisussaaffigalugu. Allaaseqarnera tunngaveqarpoq Kalaallit Nunaanni inuusuttut piumassusillit, nunatsinni ingerlatseriaatsit politikkikkullu aqutsinerup/aqutsinerlunnerup kingunerisaanik, pissusissamisuunngitsumik artorsartitsisarmat. Allagaq artornarsinnaavoq, kisiannili pissutsit taamaakkaluartut Kalaallit Nunaat angerlarsimaffittut toqqarnikuuarput ❤

Nunarput oqaluttuatigut, imaluunniit piviusoortumik oqarluaannaraanni; kingumut ingerlavoq.

Ukiut 24-it kingulliit Kalaallit Nunaata tunisassiornermi inernerai -31.853.203.000 koruuninik amigartoorneq.

Tassa MINUS 31 milliardtit, 853 millionit aamma 203 tusindtit koruunit. Amigartoornermi.

Agguariisillugu tunisassiornikkut ukiut 24-it kingulliit ukiumut -1,33 milliardinik amigartoortarsimavoq. Ukiut kingulliit qulit agguariisillugu aningaasaqarnerput -1,98 milliard koruuninik amigartoortarsimavoq.

Ullut tamaasa 542.550 koruunit annaaneqartarput…
Akunnerit tamaasa 22.606 koruunit annaaneqartarput…

Massakkorpiaq nunatsinni aalajangersakkat naapertorlugit siuariarneq ajornavippoq. Isumaqataanngikkuit tamatsinnut ulorianarsinnaavutit. Ajuusaarutigaara oqaatsit tamakku atorakkit, kisianni aalajangersakkat taakku atuinnarutsigit ajugaasoqarsinnaanngilaq.

Aningaasarpassuit annaavagut, periarfigititaaffigullu taamaaginnarpata aningaasat uteqqinngisaannassapput. Aalajangersakkat. Aalajangersakkat taakku tamatigorluinnaq amigartoortitsisartut. Nunatsinni nalinginnaavoq amigartoorluni. Nutatsinni naliginnaavoq ajorsarluni. Nunatsinni naliginnaavoq artorsarluni. Amigartoornitit allaniit ikinneruppata, taava ingerlalluarputit. Aaliuna amigartooraluarlutit. Nunarput taama tappiitsigaaq.

Aningaasat annaasagut imak annertutigilerput, kiisa qanoq nassuiassallugu nalunarsisimalluni.

Politikerit, massakkorpiaq suna pilersitassinni torrattorujussuaq aningaasaqarnikkut siuariartortitsissava ? Pilersitassi sorliup aningaasaqarnikkut amigartoornerujussuatta illuanut saatsissavaa?

Ajoraluartumik qanoq ilillunga paasitissallusi allannguineq qanoq pisariaqartsigisoq nassuiarsinnaajunnaaqqavara.

Imatut allallara, taava immaqa qanoq pingaaruteqartiginersoq paasissavarsi:

Nunarput allanngussaaq. Massakkut Kalaallit Nunaat nutaaq pilersittariaqarparput.

Ajoraluartimik ilissi inuttut allanngornerusarput nunarput allangornagu. Taanna qanorluunniit nuannarinngikkaluarussiuk ilumoortuuvoq. Tamavissi, tassa politikerit tamarmik, tamavimmik kukkusuupput.

Tamavissi periarfissaqarpusi imaluunniit periarfissaqarsimagaluarpusi…

Ilissi akisussaaffeqarpusi aalajangersakkat piorsarnissaanut, nunatta inissisimanera naapertorlugu. Akisussaaginnanngilasi, aamma periarfissaqartuuvusi allannguivinnissamut. Pingaarnerpaaq isiginngitsuusaaginnarsinnaajunnaarparsi: Aningaasat/aningaasaqannginneq.

Ukiorpaalunnut kingullernut qivialaariarta: Sooq taamarsuaq kukkuluttorpisi ? Imminut qivialaaritsi… Partii alarallalaaruk, alarallalaaruk ullumikkut Naalakkersuisuunersutit, Inatsisartoq, qineqqusaartoq, imalunniit illuatungiiliuttuunersi… Imminut qiviarallalaaritsi..: Suinnarpisiuna???

Ukiorpassuit, nutaaliortoqassananilu… Taamatut ingerlarusaarneq, nunarsuup siupiloorneranut malinnaaniarneq….. Ataasiakkaanut malinnaatualeraangassi isumaqartarpusi nunatsinnut siuariarnerujussuusoq, immissinnullu ataqqinartorsuartut isigilertarlusi, pingaarnerpaarlu takunngitsuusaarneqartuarluni: Aningaasaqarneq

Allanngortitsisoqartariaqarpoq. Aalajangikkat aningaasaqarnermut siariarnermik aallaavilik.

Inuusuttuulluni piumassuseqarluni siuarsaaqataarusullunilu, Kalaallit Nunaat nuannerpallaanngilaq. Assut siuarsaaqataarusulluni pikkunaatsoornarsinnaavoq. Ilaannikkut eqqarsartarpunga soormitaavaana Kalaallit Nunaanni inuullungalu peroriartornikuusunga, pissutigalugu nunatsinni aporfissaararpassuit pisariaqanngitsut amerlangaarmata!! Aporfiusussaanngikkaluartut!!

Aporfiit, ilissi politikerit pilersitasi, imaluunniit siulissi pilersitaat puigoriikkasi. Tamakkua pissutaallutik, anguniakkakka suliarerusutakkalu nunani allani pilersinniartalernikuuakka, nunat tapersersuerusuttut, imminut siuarsarusullunga, nunatsinni inuussutissarsiornermi eqqarsariaatsit inuusuttunut naleqqutinngingaarmat. Inuusoqatit ilinniagaqartut naammasseqqammersut aamma taamak eqqarsartarput, aamma paasisinnaaluarpakka — maani Kalaallit Nunaanni pissanganartunik periarfissaqanngilaq. Nunarput uninngasuuvoq killormut ingerlaarujoortoq.

Soorlu USA, pingaartumik NYC, suliffeqarfinnik pilersitsisut nersualaarneqartarput assullu pilersitsineq pingaartsinneqarluni tamaviaartumillu ikiorniartarlugit. Nunatsinni ilissi aallartisarneqarniartut tamarmik niaqulaartutut aqunniartarpasi naalakkersorlugit. Nunatsinni allaanngilaq pilersitsiniat isigineqartartut “nuannariinnarlugu” pilersitsisut. Tassami piviusoq taamaakkami. Nunatsinni pilersitsisut nuannarigamikku aallartittarput. “Nuannariinnarlugu suliffeqarfiutillit”, taamak taasarpakka. Aningaasat piinnarlugit aallartinneq ajorput, tassami periarfissaatitaasut atuutsillugit, aallartisaasutut aningaasarsiorneq ajornakusoortorujussuuvoq. Misiliiguit, ajutoornissaq qanittuaraavoq, taamaammat suliffeqarfiutik mikiuvassaaq, allivallaarnissannut nunatsinni periarfissaqannginnavit.

Kalaallit aallartisaasarput namminersorusullutik, tassa ullumikkut nunatsinni taamaappoq. Inuussutissarsiutigalugu pilersitsineq, imaannani; nammatseqataaniarluni nunarsuaq tamakkerlugu ingerlalluartumik pilersitsineq.

Aatsaat nammineq aningaasaateqarluarulooruit pilersitsisinnaavutit siuarsaaqataallutillu. Allartisaasartut nunatsinni tassaapput aningaasaateqareersut, piumassuseqartulli misileerusuttullu, aningaasaateqanngitsut soqutigineqarneq ajorput! Periarfissaqanngillat! Tassa ullumikkut pissutsit taamaapput, taanna paasiniarsiuk!

Eqqarsaatigilaariarsiuk, piumassusillit anguniagaqartullu aallartisaanermut periarfissinneqaraluarpata ApS aqqutigalugu, qanoq siuariartigisinnaanerluta.

Eqqarsapallalaariarta :

Aningaasat suminngaanneerpat ? Nunani allaninngaanneerput.

Qanoq isillutik aningaasat nunanit allaniit pisarpagut ? Tunisigaangatta pisarpagut, tassa suliatsinnut akissarsissutigut.

Kikkut nunanut allanut tunisisinnaappat ? Nunarput suliffeqarfiilu.

Kisiannimi nunaqareerpugut suliffeqarfeqarlutalu ? Aap, ilumoorpoq.

Sunamiuna ajornartorsiut ? Ilissi. Politikerit.

Tassa imaakkami, nunatsinni namminersortunut periarfissarititaasut annikingaarmata, siuariarnissaq anguniarlugu aningaasaliineq ulorianarsinnaavoq. Taamaammat siuariarnissamut misiliisartut ikitsuararsuupput. Misiliinissatsinnut akissaqanngilagut.

Inernera: Ingerlaannarneq aallartisaanermit pingaarneruvoq. Namminersornerullutik oqartussat aningaasartornerat ukiumut 10 milliard-it sinnertarpai.

Aap, aningaasarpassuupput, aali Kalaallit Nunaanni innuttaasut taamak ikitsigigaluartut.

Suliffeqarfiit namminersornerullutik oqartussanik aqunneqartut, 2015-mi 10 milliard-it sinnilaarlugit kaaviiaartippai. Sanilliullugu nammineerlutik inuussutissarsiutigalugu suliffeqarfillit aggorsimasuinnaat kaaviiaartippai.

Namminersornerullutik oqartussat tunisassiorfimmi pissaaneqarpallaarput, assigiinngissuseq nunatsinni atuuppoq, suliffeqarfiinnarniunngitsoq, kisianni namminersorlutik oqartussani inuinnarnilu.

Nunatta aningaasaqarnera naalagaaffigaarsi, nunatta suliffeqarfia naalagaaffigaarsi. Namminersortut qaangiinnartarpasi, ilissinnummi millionerpaaluit “sinneruttuussusaasaramik”, uagutsinnulli namminersorniartunut pingaartorujussuugaluarlutit. Ilissi Kalaallit Nunaanni ulorianarnerpaavusi, tassa ataasiugassi, suliffeqarfippassuit akornanni.

Suliffeqarfiuteqarneq naligiissuunngilaq, naalakkersugaavoq. Ilissi nunatta siunissaa akisussaaffigaarsi, aningaasatigut pissaaneqarnersi tunngavigalugu akisussaafferujussuaq tigummivarsi. Namminersornerullutik oqartussaq niuernermi nunatsinni siuttuupput.

Ajoraluartumik nunatsinni niuerneq/aningaasaqarneq politikkikkut soqutigisaqarneq naapertorlugu ingerlavoq, tamatigut inunnik misilittagaqarnikuunngivissunik aqunneqartarluni.

Nunatsinni niuerneq ilimagisassinniit matoqqaneruvoq, ilissi politikeriuvusi, namminersortuni pisinnaasasi naammanngimmata. Kalaallit nunatsinni namminersornerulluni oqartussani atorfeqarnissaq pilerinarneruvoq namminersornermiit. Uagut namminersortuusugut tamaviaaqaagut. Qimuttutut ingerlappassi. Nunatsinni namminersortutut suliffiuteqarneq aamma eqqoriaruminaassinnaavoq ulorianarsinnaallunilu, tassa ILISSI initunermik.

Tassa tassanerpiaq allanguisoqartariaqarpoq. Suliffeqarfiit aqussinnaanngilasi, taamaakkaluartorli namminersortut naqisimaneqarput. Royal Greenland 500 million-inik tunineqarpoq “anaanamik ataatamillu”, pissutigalugu amigaateqarmat. Polar Seafood taamaasineqarsimassagaluarpa ? Naamik, tamakkua namminersortut immineerneqartarput. Takusinnaavisiuk naqisimaneqarnerat ? Ilissi niuerneq aquttussaanngilarsi. Ilissi aalajangersuissaasi aqqutissuivillusilu pilersitsiniartunut. Siuarsaaqataarusuttunut !!

Uteqqissavara : Ilissi aqqutissiuvissaasi, isortortumillu naalakkersornata suliffeqarfiutissinniit.

Ullut arlaanni paasigussiuk, taava allannguinissamut piariissaasi….Iperarneq ilikkartariaqarparsi….namminersortut tatigalugit aningaasanillu kaaviartitsinissaat tatigalugu. Oqaaserinikuusara uteqqissavara: Isumaqataanngikkuit ulorianarpoq.

Nunatsinni suliffeqarfiit 4000-t missaanniipput. Suliffeqarfik ingerlasinnaanngilaq aningaasanik kaaviiaartitsinngikkuni. Isaatitaqanngikkaanni kisianni matulluni. Suliffeqarfiuteqarluni pingaarnerpaajuaannarpoq tunisaqarneq. Tunisaqarneq, tunisaqarneq, tunisaqarneq. Aningaasat, aningaasat, aningaasat.

Suliffeqarfik iluanaarniaannartutut nalilerukku kukkuneruvoq. Taanna eqqarsariaaseq allanngortariaqarpat, taava sinnera malinnaassaaq.

Aningaasat pingaarnersaanngortsinnikuuagut taamanilu nammineq illuliussaaratta, namminerlu nerisassatsinnik piniassaaratta. Taamaammat massakkut aningaasat atortarpagut. Tassami inuiaqatigiinni nutaajusuni aningaasaq pingaarnerpaavoq. Aningaasat ajortuunngillat, aningaasat periarfissittarpaatigut nutaanik misiliisinnaanitsinnut, nunanut allanut unammillersinnaanngorluta, napaniaannarneq pinnagu.

Saniatigulli Namminersornerullutik oqartussat, pingaarnerpaatippaat aningaasat qanoq isillugit nanissanerlugit. Naningunikkit, sinneri nammineq ingerlassapput. Ilissi eqqarsaatigisariaqanngilarsi tunisaqarnissarsi. Aningaasat akileraarutikkut isaajuaannarput.

Ilissi politikerit aningaasanik suli pisariaqartitsigussi, pisinnaaffeqarpusi akileraarut qaffaannarnissaanut, imaluunniit akileraarutinik “nutaavissuarnik” nassaarnissarsi, kisianni taanna peqqinnarpa ? Naamerluinnaq ! Nunarput taamaatsillugu akuerisinnaanngilara. Inuiaqatigiinnik suli tigooqqaaniarpusi, aali inuiaqatigiit “ikinneroreersut”, pissaaneqarnersi qaffaqqinniarlugu. Ilumoortumik eqqarsaatiginerulertariaqarparsi QANOQ ISILLUTA inuiaat aningaasanik isaatitsinerusinnaanersut. Ataatsimiittarfissuarmi taanna annerusumik oqallisigisariaqaraluarparsi !

Naligiissaarinermik oqalukkussi, taava eqqaamasiuk ilissi (namminersornerullutik oqartussat) taavalu namminersorlutik suliffeqarfiutillit qanoq assigiinngitsiginerat. Tassani qanoq naligiinngittoqarnera assorujussuaq erserpoq. Peqareersut (Namminersornerullutik oqartussat) peqarnerulerput, pissaanikinnerillu pissakinnerulerlutik.

Aalajangersakkat naleqqussarsigit piumassuseqarlutik aallarniiniartunut

Suliffeqarfik akiliisinnaajunnaarsinnaavoq pilersitaq iluatsinngitsoorpat. Taamaattoqartillugu suliffeqarfik eqqorneqartarpoq, avatangiisimilli malunnaataavallaartarnani. Tassa oqaatigeriikkattut, nunatsinni suliffeqarfiit 4000-t missaaniipput. Soorlu 200-t akiliisinnaajunaaraluarpataluunniit, suli suliffeqarfiit tusind-erpaaluussagaluarput, kisiannili nutaanik suliffeqarfinnik pilersitsisinnaalluni. Pissanganartaqaaq !

Tassani eqqaamasassaavoq siullermik iluatsinngikkaanni, misilittagaat annaaginnarneqannginnissaat, misileeqqinnissaanullu kajumissarneqarnissaat.

Tassami inuussutissarsiornerup iluani inuiattut ataatsimoorluta siuarsarniartariaqarparput. Misileraanerit tulleriiaallugit, ilikkakkat tulleriiaallugit, iluatsitsinerit tulleriiaallugit. Akiliisinnaajunnaarneq ajorsarnertut isigineqassanngilaq, kisianni inuiattut ataatsimoorluta misiliigaluarneq ilikkagaqarfiusoq! Misiliisaqattaartariaqarpugut ilikkagaqarusukkutta !

Amerlanerit periarfissitsinneqarnissaat pisariaqartsipparput !

Namminersornerullutik oqartussat niuertarfiugaluarinu, ullut tamaasa million-ip affaa annaasassagaluarpaa. Ullut tamaasa…tassa taamak niuernerlutsigaasi. Eqqarsaatigilaariarsiuk qanoq quinartsiginersoq. Tassami nalungaarmata quianaannarporluunniit.

Sooruna nunatta aningaasaqarniarnera taamak ajortsigisoq ? Pissutigalugu Nunatsinnut aningaasaliisut, UAGUT, aningaasaateqannginnatta. UAGUT.

Taavami qanoq isiussaagut ? Aperaluni : “kammalaat, taakku aningaasat aggiuttakkatit, amerlilaarsinnaavigit ? Naamiissaaq oqarluni : uanniit niuerniallaqqinnerugavit ? Aningaasat atorfissaqartippakka, nunaqqatikka tapersersorniarlugit..”

Eqqarsaatigisiuk suliffissanik aallartisaaneq. Aallartisaaneq. Aallartisaaneq.

Massakkorpiaq aallartisaanermut immikkoortoqarfisi iluatsinnikuunngillat. Annernaannarporluunniit eqqarsaatigalugit….eqqarsariaaseq nutaaq, ilissi misilittagakippallaarpusi siunnersuinissassinnut. Misilittagaqarluarsimagaluarunik tassani atorfeqarnavianngikkaluarput, nammineq ingerlatsisimassagaluarput.

Takorlooriartigumi aallartisaaniartut suna sinnattorineraat ? Qanoq isikkoqassagaluarpa ?

Ullumikkut misilittariikkat puigorsigit, taakku takoreerpagut atorsinnaanngitsut, unali eqqarsaatigilaarsiuk :

  1. Ingerlatsinermi akileraarut ukiut siulliit marlut peerneqarli. qaqutigummi aallartittut iluanaaruteqartarmata. Taamaasilluta aallartisaarusuttoq periarfissaqarnerulissagaluarpoq suliffinnik pilersitsinissaminut, suliffeqarfillu pissanganarnerulerluni, ilinniartullu qinigassaqarnerulerlutik.
  2. ApS.-mik pilersitsiniaraanni aallaqqaataasiutaasartoq kr. 125.000 apparneqarli. Eqqaamaneqarunanngilarmi sooq taamak aalajangiisoqarnersoq, ilaarsiinnarnerullunilu nunasiaagallaratta aalajangersakkanut. 50.000 koruunimut appartigu, aallartisaaniartullu periarfissillugit ukiup ataatsip iluani taanna akilerneqarnissaanik, taamasilluta aallartinniarneq oqinneerakasiussagaluarpoq. Ukiup ataatsip iluani akilerneqanngippat suliffeqarfik matuneqassaaq.
  3. Kakkaak, qanorli aallartisaaniartut amerlitigissagaluarpat ??!! Aamma pilersitsisinnaagaluarpugut TedTalks Kalaallisuunngorlugu, innuttat inuusuttullu piumassusillit taamaasilluta aallartisaanermi periarfissaasinnaasut nassuiaallugit, aamma taamaasilluta misilittakkagut ilikkarfigisinnaallugit ilutsinni.
  4. Kalaallit Nunaat aallartisaasut ikiortigalugit siuarsartigu. Tassaappummi taakku nalorninartoqarsinnaagaluartoq qunusuillutik suliffinnik pilersitsisartut, aningaasanillu kaaviaartitsisarlutik. Aallartisaasoqanngippat, namminersortoqanngippat, Kalaallit Nunaat siuariarnavianngilaq. Nunatta aaqqissuunneqarnera aallartisaaneq tunuliaqutigalugu allanngortitsigu.

Soorunami allatakka siunnersuutaannaapput, kisianni immaqa piffissanngorpoq aamma ilissi aallartisaasutut qunusuillusi eqqarsartalernissarsi ?

Piffissanngulinngila inuit tamakku attavigineqarnissaat ?

Siuarsaaqataaniartutut ilanngunneqarnissaat piffissanngulinngila ?

Nalunaqaarli….ataatsimummi isigigaanni, tamatta immaqa atorsinnaanngilagut :)

Kisiannimi!! PERIARFISSAQARTUARPOQ aqagu allanngortinnissaanut !

Uanga unammerujoortuassaanga, neriullunga nunatsinni aallartisaanermut ajornannginnerusumik nunaqalerumaarluta !

Nuannaarniarneq! -tamatuusass’… ;)

Takuss! /JJ

Show your support

Clapping shows how much you appreciated JJ Lennert-Sandgreen’s story.