人寫我又寫之咖啡篇

最近步入我的三分鐘熱度期既後期，在medium花的時間少左、生活很忙，但再一個禮拜後終於可以回港加放假三星期!

我係一個隱藏版啡迷，我並不是每天都會飲一杯咖啡，有時卻會多過一杯，唔會為飲而飲，難飲不如不飲。對咖啡最初的印象係細個去麥當勞食早餐可續杯既咖啡，至現在唔知麥記還有沒免費添飲奶茶咖啡的服務。有次問媽媽可唔可以要咖啡唔要橙汁，佢一口就答應，第一啖的記憶好模糊，至少對一個從少被灌飲中藥大的兒童，咖啡一點都不苦，仲好香！之後只要去麥記食早餐我都要飲咖啡。其實麥記新鮮濾出黎時係唔差架，如果唔係為左追求味覺最高的享受的話。

我對咖啡的喜愛好含蓄，但的確係我其中最持久的興趣，亦有想過當為職業。當年上網睇台灣部落格，介紹咖啡及如何沖泡，自己扮跟學沖。第一次沖的咖啡大概係高中後，平平地係無印良品買左個濾杯，廿五蚊；再去吉之島十蚊店買包濾紙，最難解決既咖啡粉就係瑪莎百貨，四五十蚊到啦，可以沖到八到十杯。對一個只有打零碎兼職的年青人一點都不算便宜，但轉頭諗睇一場戲都係咁多錢，都唔係好過份。

後期香港吹起義式咖啡風，睇埋陳豪個節目就更加上腦，對奶泡著迷。首先係宜傢買支打奶泡棒，扮可以沖到cappuccino，但決少上層既crema又點會係cappuccino 呢？咪自欺欺人啦！對義式咖啡的愛是12年去澳洲旅行，在墨爾本飲過好幾杯好驚豔的咖啡，個性小店加上自家拼配的豆，一杯咖啡的複雜到可比美紅酒，當時只是五塊澳，比一般三塊五的普通咖啡已算貴了。

當一個人對其興趣投入係，真係會課金，所以當年我儲左錢買左部三千幾蚊既gaggia baby twin家用咖啡機，以家用又咁既價錢其實好唔錯。只是清洗比較麻煩同要預熱，沖多兩杯以上就要等，久而久之又失寵。而我對濾式的咖啡的喜愛超過義式咖啡，濾紙出的味道清幽，醇厚得黎又平實，味道好純粹又多變，愛上齋啡的我更不能自拔那份無奶無糖的清爽，難怪最識食的日本人最愛手沖。

用得最耐既係n年前買既聰明杯clever cup, 當年第一代仲要係台灣訂，我比好高分，好多玩法，方便易用，可以當傳統手沖之餘更可加入不同的玩法，到今日三分鐘熱度的我都仍在使用中，間中偶爾會玩下冰滴同荷式冰釀。至於對咖啡的追求就沒有以往強烈，有得飲就要飲好的，沒有就不強求，如果氣氛係大家一齊have a cuppa 我都會破例飲下即溶。不過食donut時真係好想要杯特濃美式，但當下求的是整體味雷的配合，苦澀衝擊熱量和糖分，解救你對肥脂的罪惡感，如果黎杯精品就浪費了個donut了！