Kapyut

Sama sa naandan, nagbarug na ko sa may CIC. Naghuwat ug 17C, 62C, o 13B. Naay mga pasahero nga ga-una nag huwat nako ug naa puy mga bag-ung abut. Para makasiguro ug sakay, dili ko mugawas sa opisina ug untup ala-sais. Sa akung huna-huna: “paunahun ta ni sila’g sakay…” Mau karun, diyutay nalang mi nga gahuwat ug jeep.

Pero walay epekto akung delayed nga paggawas sa opisina ‘run. Puno ang tanang jeep nga ni-agi. Ug kay way laing mabuhat kun dili ang paghuwat, gisuruy-suruy nalang nako akung mga mata sa kilid-kilid. Didtu nako nakit-an ang usa ka senior citizen. Di ko maayu mu-istima ug edad pero sigurado kung senior na si manong. Puti na iyang buhok ug nanggawas na ang mga ugat sa iyang duha ka buktun.

Nagpuwa na ang stoplight. Nihinay na ang dagan sa mga sakyanan. Ug sa saktung timing, nakakitag jeep nga kakapyutan ang tiguwang. Gapatunga si manong sa duha pud ka mga gakapyut nga pasahero. Nagdugay kug tutuk sa jeep — naningkamut pud kung makakita ug gamay’ng espasyo nga kalingkuran ni manong. Wala. Basig diay naay mga batan-un pag lawas nga makahuna-huna ug palingkod ni manong ug puli niya sa pagkapyut. Wala.

Mura’g gikumut akung dughan. Pila pa kaha ka tiguwang, ka mga senior citizen ang galisud ug sakay diri sa siyudad?

Go na. Tagsa-tagsa nga muhagurus ning mga jeep ug pribadong sakyanan. Ang eksena sa tiguwang nga nikapyut ug sakay sa jeep kay maghinay-hinay ra pu’g kahanap, misagul sa gagmay nga mga suga nga gaduwa-duwa sa ngitngit na nga kalsada.

(´。_。`)