[發夢必睇] 地下鐵路求生指南

免責聲明

根據《香港鐵路附例》(香港法例第556B章)第5、28A條,任何人不得不當地觸摸、損壞、干預或故意妨礙鐵路處所任何部分使用的,或由港鐵公司擁有或控制的任何機器或設備運作等。此外,根據《附例》第9條,除非得到港鐵公司特准,否則任何人不得啟動鐵路處所內的緊急或安全器件,但為設置該等器件的明示目的及根據其上印有的指示而使用者,則屬例外。

另外,按照高等法院於2019年8月23日之法庭命令(編號 HCA1551/2019),任何人不得非法地及故意妨礙或干擾鐵路運作、損壞該鐵路任何車站內的任何財物、及於該鐵路任何車站內造成騷擾。違反該項命令會被視作藐視法庭,可被檢控。

本文目的純粹使乘客遇事時能夠利用車站或列車上的設備協助自己或他人逃生;惟本人並不確保下列資料之真確性,部分資料有可能已經過時。除此以外,本文並非鼓勵、本人亦不贊同任何人不恰當地干擾列車服務運作。


發夢嘅時候,路面交通可能塞實晒,周圍又有車cam,加上路線複雜,好多人都會選擇用鐵路嚟逃生。雖然大家都知道放學要買車票,但係有時危急情況下未必趕得切排隊買飛離開,咁點算呢?跟住落嚟,大家一齊學習下喺地鐵/火車要逃生嘅方法。


消防設備篇

消防喉轆

出沒地點:所有車站

首先係大家要知道,市區綫大部分站都係八十年代前後起落,所以有啲嘢係比較舊同缺乏嘅,例如係無煙霧感應器同埋灑水系統咁樣。不過基本嘅消防喉都係有嘅。

咁消防喉呢平時就咁擰開都會有水嘅的確,但係有一個問題,就係水壓未必好夠。所以呢,記得記得一定一定要打破個Break Glass,先至會有足夠嘅水壓去滅火㗎。

小心!打咗Break Glass之後水壓會非常之高,就好似弱雞啲嘅水炮咁,可以沖走人,請小心使用。

危險!喺月台上使用嘅時候,要小心觸電危險,千祈唔好射去架車或者其他電器設備度。如果有需要,請使用乾粉或者CO2滅火筒。

注意!消防警報響起之後,車站可能會為安全計而即時疏散並關閉車站。按程序,警察呢個時候會自動到場。

捲閘

出沒地點:西馬綫、機場鐵路、將軍澳綫、觀塘綫延綫、港島綫延綫、南港島綫及市區綫其他較新的出口

捲閘係一樣非常之有用嘅工具。一方面,由於好多捲閘所在位置係車站出口,而都係消防通道嚟,所以係冇得鎖死嘅;另一方面,一啲比較新嘅車站有防火閘,嚟協助乘客爭取時間逃生。

當觸動煙霧感應器時,部分比較新嘅站,佢嘅防火閘會自己降落嚟。而只要拉咗個閘入嚟,可以避免站外嘅嘢走入嚟;防火閘仲可以隔煙,非常有用。

小心!容易拉落嚟,亦容易拉得起:新站用嘅電閘作為消防通道好多都唔一定會鎖死,所以好容易可以拉落嚟或者拉起。

注意!舊市區綫常用嘅係趟式捲閘,即係左右拉嗰啲,係會鎖死嘅,所以理論上你係搞唔到嘅。(有前線報告話開到,咁因為下面條軌係郁到嘅;不過由於閘門款式眾多,所以唔好搏喇~)

危險!防火閘可能會自動降下,而且部分防火閘係唔容易拉起/拉落,小心整親自己。


閘機篇

棍閘類:Cubic (ex-M / ex-K)

出沒地點:
ex-M 款 — 市區綫(主要為觀塘、荃灣綫)
ex-K 款 — 東鐵綫(九龍塘及落馬洲除外)

呢啲閘機有一個特點,就係入面用嚟鎖死隻棍嘅勾好鬆,好易撞開。

  • 緊急時請順方向用力撞開佢。

注意:ex-M Cubic 比 ex-K Cubic 閘機容易撞開。

棍閘類:Alcatel、TTS

出沒地點:
Alcatel — 港島綫及尖沙咀站
TTS — 東涌綫

冇得撞,請直接跳閘。

活板閘類:TTS Wide Gate / AEL

出沒地點:市區綫及機場鐵路(只限闊閘機)

呢啲閘機都有個特點,就係活板閘唔係油壓而係用摩打驅動,所以鎖唔死,用手就可以輕輕推開。當然,如果要長開,就唔可以用手喇~

1)以車票/八達通將閘機打開。

2)用膠紙完全遮蓋活板嘅上同下兩排sensor(紅圈示),閘機會繼續打開。

注意!雖然用手都揭得開,但係會hold唔實。

如果膠紙數量唔多都可以黐住塊活板先嘅當然,但如果有時間都係開閘黐sensor比較好。

活板閘類:ERG

出沒地點:將軍澳綫、南昌站

呢隻閘機係成個network入面最垃圾嘅閘機,反應超級慢至於仲要十隻有八隻都無聲。由於過去有夾親人嘅多次紀錄,所以設計成好容易推得開。

1)遮住近活板閘嗰邊對自己嘅 2 個sensor 任何其中之一(紅圈示)

2)輕輕順向推開活板。

3)繼續保持各sensor遮實,閘機會繼續打開同埋喺約120秒後停用。

闊閘機特別開閘方法:

  • 將兩側合共兩對活板閘向反方向拍埋(藍箭嘴示),閘門會一直打開。
  • 如果非闊閘機,只需將會活動嘅一對活板閘向反方向拍埋;副作用係如果乘客照樣拍卡,閘門反而會閂埋;如果個客直行直過,好容易會推返啱位,即係會回復正常。

注意:部分閘機Sensor一遮就會自己彈開閘。(咁係因為佢塊嘢本身鬆,唔啱位所致)

危險!呢隻閘機嘅反應非常慢,小心夾親。

伸縮閘類:KML

出沒地點:欣澳站、迪士尼站、中環站、九龍站

港產土炮嘢,少數民族嚟。應該無乜需要用到,除非你諗住喺竹篙灣搞不合作啦。

1)遮住 4 個 sensor(紅圈示)。

2)用膝頭將闊閘機頂起,伸縮閘會9秒9自動彈開。

3)繼續遮住 4 個 sensor,閘機會繼續打開及即時停用。

Remark:如果頂唔開,用車票或者八達通打返開閘再遮sensor。

注意!幾百磅力,小心夾親。

危險!唔好就咁拎膠紙黐住伸縮閘,唔單止會痴唔實,仲可能會夾親人。

伸縮閘類:Thales(舊/C762)

出沒地點:
舊款 — 西馬綫、整個網絡(闊閘機)
C762款 — 港島綫延綫、觀塘綫延綫、南港島綫、九龍塘站及旺角站

左:舊Thales,中:新Thales (C762)。

法國嘢。原理同KML閘機差不多,都係遮sensor然後頂開個flap。

1)用膝頭或者手頂開兩邊嘅伸縮閘

2)遮住 閘板頂邊 2 個 sensor 任意一個(綠圈示)同埋底邊 2 個 Sensor 任意一個 (藍圈示),閘機就會繼續打開同埋喺約180秒後停用。闊閘機要遮埋 3 個 Safety sensor(紅圈示)。

提示:如果只係開一陣,遮任意一個綠圈sensor就得(以身擋駕亦可);長開就要遮晒;綠圈同藍圈Sensor要遮同一邊

Remark:闊閘機會容易啲頂開;頂唔開就用車飛拍開個閘再遮sensor。

注意!閘機嘅伸縮閘門會極速彈開,而彈開嘅聲響巨大,而閘機本身亦會響Alarm嘅。

小心!幾百磅力,小心斷骨;打開閘門時小心夾到。

危險!唔好就咁拎膠紙黐住伸縮閘,唔單止會痴唔實,仲可能會夾親人。

伸縮閘類:KABA C1163 閘機

出沒地點:屯馬綫新車站(顯徑、鑽石山新建部分、啟德)

呢隻閘機為咗香港人嘅使用方式而設計,因為會知道香港人係唔會企喺黃線前拍卡咁乖㗎喇。所以呢隻機只有「illegal movement」先至會響:咩係illegal movement?簡單講就係反方向嘅移動。

咁於是,如果你頂開咗隻閘或者跟人出掂行掂過,係好可能會無聲嘅。

打開閘機嘅方法同C762分別不大,但唔同嘅地方係Safety Zone大咗,亦都無Thales咁複雜。

手動閘

為咗幫助人流管制,所有站都有手動閘可供職員使用。

注意!西馬綫嘅閘一推即開,其他大多數都要用鎖匙開閘。

備註:發夢夢見有啲鎖拎張咭或者車飛一攝落去就開到,唔知現實可唔可行。

月台及列車設備篇

車門隔離閥/掣

出沒地點:技術上是全綫,但實際上只有東鐵綫,其他綫有幕門/閘門擋住

如果緊急時有人被困車廂,又或者要閂門保護車上面嘅人,咁就可以用呢個掣喇。留意返,只適用於同一卡車廂,即係無得撳一個掣12卡門閂/開晒。

警告!列車尚未停定,切勿操作此掣。

注意!操作車卡側車門隔離閥後,只能打開該側中間嘅一對門(大部分情況下即「3門」)。而市區綫多數列車車門為氣動,操作緊急開門掣後或需一段時間才能打開門(雖然應該冇乜可能可以用到)。

緊急停車掣

出沒地點:全綫,但機場鐵路及馬鞍山綫並非採用同一款式的按鈕。

眾所周知佢係緊急停車掣啦,但係用嘅時候如果唔夠力壓咗少少無撳晒的話就會有一個問題:就係Trigger唔到佢頭頂嗰個閃燈。於是乎,站員要locate邊個停車掣拍咗,就會有困難。喺大多數情況下,訊號系統係會知道邊個停車掣拍咗,所以職員可以睇到,或者可以遙距重置;唯獨東鐵綫,係睇唔到嘅,即係站員要兩邊月台由頭掃落尾逐粒掣重置。所以大家記得千祈唔好咁做呀!

注意!由於訊號系統設計所限,緊急停車掣被觸發之後,即使列車未完全離開月台,東鐵綫的列車只要駛開咗一定距離,係唔會煞停嘅。其他路線嘅列車,如果車尾未離開月台,就會馬上煞停以策安全。

警告!重置需要時間,可能妨礙逃生,請勿濫用。

職員篇

最近大家都可能會見到好多職員,但係佢地都有分好多兵種,每一種兵種都會有佢嘅職能同埋限制,所以佢地嘅戰鬥力各異。於是大家記得求助嘅時候要搵啱人呀,唔係俾人待慢就唔好……

Foodpanda 類

顧名思義,就係着住Foodpanda背心。佢地又分三種:

Office 友:

留意佢地心口有掛證,加埋個樣似Office走落嚟嘅,先至係Office友。

特徵係心口掛證同埋背心有「客務資訊 Customer Service Information」字。佢地雖然無附例檢控權,亦可能唔係好熟悉車務嘢(當然佢地亦都可能係車務啲上咗神枱嘅經理嚟),戰鬥力只係一般至中上。
戰鬥力:~3/10

-黃衫底:
見制服類

-外判狗:
見外判狗類

制服類

顧名思義,就係着住制服。佢地又分七種,戰鬥力各異:

  • Corp Sec 企業保安:
最明顯嘅特色,就係膊頭有柴;普通職員係無嘅。

平時守各車廠/辦公大樓,特徵係膊頭有柴。唔好俾佢膊頭嘅柴呃咗,其實係無權執行附例,所以得個惡字,有時甚至幾好傾添。不過有好多退休POPO,睇路。
戰鬥力:~3–6/10

注意!最近見到有啲Corp Sec搣走膊頭條柴,得返一條深色嘅嘢喺度;但係佢件制服同普通站員仍然有分別,包括衫領淨黃色同埋膊頭條用嚟扣住條柴嘅部份,所以大家仍然可以分辨到佢地。

小心!雖然佢地無檢控權,但佢地係可能會搵警察嚟幫佢地做野嘅,所以自己執生。

  • BIU 附例特檢隊:
其中一位BIU職員,最明顯就係佢地嘅灰色制服。source:now news, 2016年1月22日

平時守東鐵綫邊境站,應付開啲蝗蟲,特徵係灰色衫同有cam。有檢控權,戰鬥力係各黨鐵職員之眾,而且主要由退休紀律部隊成員組成,好多都係退休POPO嚟,所以大家一定要打醒十二分精神睇路。
戰鬥力:10 / 10

  • CSRPU 顧客服務及收益保護隊
(左)其中一位查飛組職員,留意佢地有戴Cam。source:HK01, 2018年7月1日 ;(右)關於爆鑊組嘅官方介紹。

俗稱查飛組或者爆鑊組,平時負責查飛,爆鑊時就會去各站招呼啲客。由於有查飛嘅職能同埋有檢控權,所以戰鬥力唔細,而且亦都有可能會便裝出動。如果著制服,特徵係黃色恤衫制服同埋有Cam,有時會有粉紅背心,但背心後面會寫住「顧客服務及收益保護隊」,係同Office友或者外判狗嘅唔同。如果便裝,可能混咗喺啲Office友度(留意背心字樣),亦都可能連背心都冇,自己留意。
戰鬥力:8 / 10

  • 「站長」:
(左)左手邊就係太古站嘅Landord,雖然無打tie但係見到件恤衫係淨黃色。(題外話:on.99影得佢幾樣衰喎,人地真人靚仔好多~~)source:on.99,2019年8月20日;(右)右手邊嗰位都係Landlord,而佢係有打呔嘅,咁先係正式嘅裝束。source: 商台

即係車站經理,又叫 Landlord。雖然有檢控權,但係有咩事通常都係搵啲細出面,所以自己睇路。特徵係黃色恤衫 + Tie 同埋西裝褸。
戰鬥力:~ 5 / 10

  • 「當值站長」(ShSM 值班站長/SSCO 高級車站管理主任):
右手邊嗰位就係當值站長。留意佢塊名牌係金色嘅,細心睇會見到「當值車站主管」字樣。

特徵係金色名牌,經理唔喺度的話個站最大係佢。
戰鬥力:6 / 10

  • SCO/SOF/SO:
雖然呢位好似係車長嚟,不過反正件衫都係一樣嘅啫……(車佬唔會執行附例)Source:Topick by HKET

即係站員。雖然講到檢控起碼都要車站控制主任(SCO)或以上出嚟處理㗎喇,但其實所有普通站員都有檢控權,同埋佢地識得叫人嚟幫手嘅,所以不用分那麼細,大家都是站員。做站啲人大多都好懶同怕事,所以佢地一般傾向乜嘢都扮睇唔到。如果需要求助,就可能需要主動啲喇~~
戰鬥力:~ 2–4 / 10

  • SAS/SA/CuCA:
(左)後面嗰位就係CuCA,都係Minion制服。(右)全部都是Minion,留意親生仔塊名牌係銀色嘅。

即係你地見開嘅波板糖人Minion,兼職 + 無檢控權,得個樣,可以無視。兇多兩句通常直接收皮。
戰鬥力:1 / 10

注意:只有銀色名牌嘅先至係直接由港鐵聘用嘅「親生仔」。紅色名牌係外判職員,詳見外判狗類。

外判狗類

即係唔係黨鐵直接聘用,而係經保安公司請返嚟嘅雜牌軍,戰鬥力低下,不過因為冇王管所以有打乘客記錄,敬請小心:

-黃衫外判職員:

除咗紅色名牌之外,其他都係一樣的。

佢地望落好似一般站員或者Minion,但係名牌係紅色,請直接無視。
戰鬥力:0 / 10

注意:外判Minion係廢嘅。遇事時務必優先搵親生仔處理,真係無人嘅就用召援專綫啦。

-外判查飛狗:
佢地可能會著便服,或者同一般查飛狗一樣樣,但主要出現於輕鐵。特徵係會帶綠色底,寫住「授權證」嘅證件,會寫明獲授權執行港鐵附例;雖然佢地好盡責,仲聽講要追Quota;但基本上只會捉逃票,加上係外判,得個樣兇得下,戰鬥力唔及親生仔。
戰鬥力:7 / 10

注意:由於外判合約問題,目前佢地基本上只會出沒於輕鐵,再唔會出沒喺重鐵網絡入面。

-外判保安:

特徵係白色保安制服/就咁笠住件「IWS Security」嘅反光衣/無證著便服但戴住Foodpanda背心(背面為「客務資訊 Customer Service Information」)/多於一項上述特徵。廢嘅,負戰鬥力,請佢返嚟一係瞓覺一係蛇王。
戰鬥力:負數

注意:唔排除有黑警混入此項,雖然可能性唔高,但請自己睇路。

小心!最近亦都有報告話有BIU混入此項。雖然BIU數目唔多加上一向都會著制服執勤,再遇上同樣情況嘅機會唔高;但各位亦都要自己小心安全。

危險!由於係臨時請返嚟,所以乜人都有,亦試過有打人嘅情形發生,敬請小心。


大家記得Bookmark呢篇嘢,必要時隨時可以用嚟睇呀!


備註:

機場鐵路 = 機場快綫、東涌綫及迪士尼綫
市區綫 = 觀塘綫、荃灣綫、港島綫及將軍澳綫
西馬綫 = 西鐵綫及馬鞍山綫


    Pichia Sister 畢氏絲打

    Written by

    An obscure #HongKong activist with the lack of strength. Don't waste your time to read lah. 小薯仔、無料扮四條嘅廢柴 #香港 人,文章散見聚言、毒果。不定期回帶 | 政治 | 生活 | 小說 PichiaSister.com

    Welcome to a place where words matter. On Medium, smart voices and original ideas take center stage - with no ads in sight. Watch
    Follow all the topics you care about, and we’ll deliver the best stories for you to your homepage and inbox. Explore
    Get unlimited access to the best stories on Medium — and support writers while you’re at it. Just $5/month. Upgrade