斬大舊叉燒 — 齒留香燒味茶餐廳

認識「齒留香」，源於毒果8月中一篇報導：

「通常人怎樣稱呼我？一定叫我做招積叉燒佬！講叉燒暫時無人可以和我匹敵，我是大哥， 叉燒第一！」

見到老細態度串串貢，睇嚟係對自己出品有信心。既然價錢合理，當然約埋朋友，搵個周末去嘗鮮。

結果一去到，門口多人到爆！邊諗到一間燒味茶餐廳，星期六會旺場成咁？考慮到仲有下場，我同朋友決定買外賣，順手測試下隔咗一段時間，叉燒嘅味道同質量有冇變化。

我地買咗一斤叉燒、半斤薰蹄、加埋一盒叉飯，落去尖咀一間相熟嘅酒吧。本身叉燒同薰蹄就係請老細同員工一齊食，所以我就攞咗朋友一舊叉燒試下。

一食落口，肉質鬆化唔在講，而且肥瘦分佈平均，相當有咬口，味道方面就濃淡適中。喺隔咗半個鐘嘅運送時間，叉燒已經冇咁熱嘅情況下，都保持到一定質量，食落去又冇坊間部份燒臘檔叉燒嗰種過鹹、肉質硬堀堀、或者成口都係油嘅感覺。以燒臘檔嚟講，佢真係做到同招牌一樣，難怪佢有本事串得起。

至於嗰兩盒外賣，唔駛45分鐘，已經俾老細等人食晒，特別係佢地贊薰蹄好食。我自己都食咗幾件薰蹄送酒，的確肉質唔硬唔鞋，層皮又煙靱，佢地果然冇介紹錯。

而上次冇去到嘅一干人等，俾我轉去群組啲叉燒相搞到群情凶湧，巧合地有朋友要派帖，決定再去「齒留香」！

今次係平日去，雖然唔駛等位，但店內依然人氣鼎盛，可見其名氣之盛。

今次堂食，可以試到侍應服務水平，在座朋友有一兩位身型健碩(謎之聲：肥就肥啦屌你！)，店內侍應姐姐見到，就好心提醒佢地換位坐會舒服啲；見到有朋友帶咗紙盒，亦問下係咪裝玻璃後，再幫佢擺喺安全地方；當然就唔係完全ok啦，送例湯嗰時只係送咗一半數量，不過姐姐好快發覺，即刻補返，總算迅速處理好。

人多，例牌叉燒都要打孖上，一上枱，見到咁嘅畫面，大家即刻隊晒筷子出去爭！熱辣辣、啱啱出爐嘅叉燒，食落去有入口即溶之感，肉質軟熟程度有如食靚牛扒一樣，肥瘦比例更加靚到冇朋友，比上次外賣嘅叉燒更勝一籌。身旁有位成日質疑排隊店質素嘅朋友，食完第一舊即刻話要encore，結果唔夠5分鐘已經掃晒，要加多一碟追數，可見其魅力之強。

上次嘅薰蹄好食，今次當然encore，不過水準就有啲不穩，有啲好似圖中一樣，肉質軟硬程度剛好，有啲就鞋咗啲，所以只係不過不失。其他朋友叫嘅切雞、燒鵝，佢地都話水準比出面嘅燒味店好，今次總算冇帶錯隊。

當晚重點環節，就係有朋友派帖，眼見又一位朋友成家立室，腦內回憶返十年前，大家經常相約喺周末城大Canteen，玩boardgame大戰連場嘅情景。時光之流逝，快到好似用時間寶石一樣，唯一不變嘅，就係友誼仍然永固，味道好似呢度嘅叉燒一樣，都係越食越有味。

齒留香燒味茶餐廳：

太子界限街26號地下