食嘢求回本,不如去食屎!
Sep 2, 2018 · 2 min read
每次見到啲飲食新聞,話咩「點樣食放題可以回本」、「自助餐/放題回本攻略」之類嘅標題,就會覺得香港人On9又可悲,因為佢地只會由銀包角度去睇飲食,卻從來冇喺其他角度去睇飲食。
先唔好講到咩欣賞食物、感受環境呢啲高層次嘢,好簡單,你同屋企人/另一半/朋友食飯嘅目的,到底係為咗睇下點樣食到回本、甚至賺返轉頭,定係為咗好好同佢地傾下計、見下面、關心下近況、聽下佢地呻、分享大家之間嘅苦與樂?
呢幾年,唔知係咪斷食過一段時間,搞到成個人變咗。放題、任食邊爐可免則免,自助餐都要睇下間嘢出品、環境先決定去唔去;反而多咗追求食物質素、餐廳環境、同埋適唔適合同朋友傾計。好彩嘅係,我班friend都係好撚憎所謂嘅「回本大法」,所以同佢地食嘢,基本上唔駛諗埋啲縮數嘢,只要好食、環境同氣氛好就得,呢啲先係對「食」嘅最基本態度。
就好似兩星期前,同朋友買咗「齒留香」外賣,拎落去某間相熟嘅酒吧,叫杯cocktail,食住「齒留香」叉燒飯,一齊傾到天昏地暗。對嗰啲「回本大法」人士嚟講,梗係覺得我地兩個on9啦,但人生中成日咁計較,其實咪又係一樣on9!
食嘢求回本,不如去食屎!
