العُزله
البيت
أحياناً كل التفاصيل الصغيره و اللي قد تبدو منطقيه بتتلاشي و هتفضل الصوره ديه تلخص اللي وصلنا له
مكنتش أعرف الجرافيتي ده بتاع مين لحد ما عرفت النهارده إنها صوره لأحمد هايمان رسمها عمار أبو بكر مصوره لشاب إسمه باسم .. ربنا يرحمه
28 -1-2011
جمعة الغضب .. قتل و ضرب .. أعصاب نفسيه سيئه جداً .. حبس في البيت لمراعاة حقيقة إن ممكن يجرالهم حاجه لو نزلت .. إنكار حقيقه واضحه وضوح الشمس
الشرطه لا يمكن تضرب المتظاهرين
18-12-2011
ستّ البنات .. فتاة التحرير .. الحكايه المؤلمه اللي لما يشوفها أي إنسان طبيعي يشمئز و يلعن كل من تسبب في هذا المشهد .. إنكار
أكيد عملت حاجه علشان يعملوا كده .. ثم إن فيه حد يلبس كده و هو نازل مظاهره ؟! مفروض تبقي عامله حسابها .. ثم إن اللي ضربها ده مش عسكري ده لابس كوتشي
1-2-2012
مذبحة بورسعيد .. شباب كثير ماتوا .. دموع و إحساس بالقرف و الإهانه .. عدم الرغبه في الكلام .. حمية الشباب في توصيل الحقيقه .. إنكار
معروف إن جماهير بورسعيد همج و الكلام ده بيحصل كل مره
أحداث كثيره جداً يتبعها نفس الردّ .. أو ما يشابهه .. لا أتذكرها حالياً و لا أريد
كنت في وقت ما بفكر إن الإعلام هو أداه للسُلطه .. مع الوقت أدركت أنه تمثيل حقيقي للجزء الفاشي المتعصب الذي لا يريد العامّه إظهاره بكل وضوح
إيه اللي وداهم هناك ؟ .. إمشي عِدل يحتار عدوك فيك .. الحلال بيّن و الحرام بيّن .. إحمد ربنا إنك مش زي سوريا .. الجيش والشرطه و الشعب أيد واحده .. إلخ
“ شاب بسماعات في ودانه ”
هكذا هو الوضع الذي أصبحت عليه .. إنسان منعزل منطوي ذو شخصيتين .. كما يُقال
الفاشيه .. الإستقرار .. الإيمان بمسلمّات الدين و الوطن
أسباب كثيره جداً للإنعزال النفسي عن الدائره المحيطه بالإنسان اللي بيحاول إنه يلاقي مجتمع معتدل يستقبل تساؤلاته و شكّه و بحثه عن الحقيقه
محاولة للتغيير .. يأس .. تقبّل الواقع
فيه فرق كبير جداً بين تقبّل الواقع و بين التعايش .. الإنسان مش مطالب إنه يتعايش بنفس قدر السعاده في ظروف غير مناسبه له .. حاجه طبيعيه
العُزله إختيار سيء و مُتعب و لكنه أفضل