劉小麗,唔該搵個CFA睇睇你個proposal先

source:賴叔閱事

誤人子弟嘅嘢,其實必須糾正。

我明白好多黃絲帶、黃雨傘嘅朋友 (或者大家覺得賴叔高攀唔起,不過聽埋先) 欣賞溫和本土、清新泛民。但係一個候選人嘅主張,尤其是公共政策影響數十年嘅保障,真係唔可以一味靠吹。

CFA 唔係神,只係會分析財務數字嘅人,但講錢,唔計數講乜? 持續每年 5% 回報,如果你搵到方法嘅不妨公諸同好。以前買匯豐收息或者得,早前買人仔收息兼收都有可能。但喺低息環境之下,真係好難搵到投資工具穩定地有 5% 年回報。

如果大家係一個負責任嘅選民,請大家睇清睇楚佢嘅主張係乜,立論基礎喺邊度。事出必有因,唔好一味陰謀論話「個個都打壓小麗老師」,諗下係咪真係有人有問題,好冇?


九龍西冒起得好快嘅候選人劉小麗,關於全民退保言論激親有一位喺新加坡教緊書嘅學者,引發大筆戰。成棚劉小麗啲fans走去學者個page度開火,唔係個個就鍾意開片,特別新加坡啲大學有名係論文工廠,做research少一陣都教席不保,果位學者急急收番啲文,費時同劉小姐啲fans開片。只不過,由於佢嘅文傳得太勁,結果果位學者個page依家被人煩到抽筋。

我中環客連學者都唔係,只係個粗鄙,讀過吓CFA課程嘅塘邊鶴。但劉小姐竟然可以吹到有百分之五回報,我相信連新加坡政府都想知道究竟劉小麗有乜絕招,做到新加坡中央積金局都做唔到嘅嘢。

新加坡中央公積金,係唔少人夢想嘅退休保障模型,新加坡嘅公積金,供組屋又得,俾醫療費又得,用嚟投資都得。新加坡中央公積金,係全部投資喺由新加坡政府包底嘅特別新加坡政府債券(SSGS)上面,由於新加坡立法規定必須平衡預算,所以新加坡政府債券所借唔可以用喺政府日常開支,而係必須用嚟投資上。呢筆錢,正係新加坡淡馬錫控股,以及政府投資公司(GIC)嘅資金來源。

新加坡淡馬錫控股,同埋政府投資公司,喺主權基金嚟講,算係做得唔錯。但新加坡依家中央公積金一般戶口嘅年淨回報都係3%,特別同醫療戶口,以及退休人士戶口,喺政府公帑加持下至做到5%,仲要自一九八五年以嚟,新加坡中央公積金年回報都未試過5%。

而新加坡政府喺公布中央公積金年回報果陣,係俾埋主要銀行一年定期利率,同埋十年期新加坡政府債券coupon rate你參考,而一般淨回報就係十年期新加坡政府債券coupon rate + 1%。唔好講到蒙地卡羅模擬呢啲數佬係小學雞嘢,但對大眾係火星文嘅嘢(雖然CFA實要考)。請問小麗老師,點推算出一個仲高過新加坡政府債券好多嘅回報率,唔怪得被人串係雷曼迷債喇。

用今年七月嘅香港政府十年機構債券投標結果,中環客更加唔知劉小麗筆數由石頭邊度爆出嚟。政府公報嘅結果係1.68%,就算學新加坡 +1%,都係2.68%咁大把。

所以我奉勸劉老師,提任何方案前,搵個CFA睇睇先。或者問問港島人力同樣姓劉嘅劉嘉鴻,至少佢真係做退休計劃呢行出身,中環客都唔多同意佢對退休保障問題嘅睇法,但劉生嘅睇法至少喺行內,未至於不被認同。

中環客

Show your support

Clapping shows how much you appreciated UC’s story.