漂流教室

kayue
Apr 26, 2022

--

尋晚睇咗上面呢篇Michael Lewis專訪,入面佢講到喺2018年訪問咗美國海岸防衛隊嘅一位海洋學家Arthur A. Allen,個故事太有趣,翻譯一下(其他內容都幾好,click link睇全文)。

話說海岸防衛隊經常要去救一啲喺海上失蹤嘅人,平均每日救到10個救唔到3個,講緊每年幾千人(救唔到都過千)。其中一個難題係,唔同情況下(例如跌落船定架船壞咗、有無著救生衣)喺海上漂流嘅走勢好唔同,所以即使海岸防衛隊預測到幾個鐘後嘅洋流、風向都未必估到個人喺邊。

而Allen用咗好多年嘅工餘時間,喺長島海灣不斷掉嘢落海去量度唔同物件漂流嘅方式(總共有大約80個分類),再將結果同原本嘅搜救軟件結合,從此就可以搵到更多人。美國以至全救各地都有成千上萬嘅人(佢用thousands所以唔知係指幾多)因為佢嘅工作而獲救。

Lewis喺Allen因政府停擺而無工開時搵佢,相處咗三日時間,期間訪問佢屋企人,去咗佢舊 office,去埋佢做實驗嘅長島海灣,問咗好多嘢。

三日之後,當Lewis去機場時收到Allen電話,佢好驚訝原來Lewis出過書(話佢係published author, a real writer),問會唔會寫佢。然後段對答好正。

L︰會呀,所以我咪用咗三日時間去了解啲嘢點漂流。
A︰嘩我唔知做呢啲嘢會有人注意。
L︰咁你以為我呢三日做緊乜?
A︰我以為你真係對啲嘢點漂流好有興趣。

訪問入面Lewis講呢個故事(嚟自佢本書The Fifth Risk),係想話(美國)政府啲專家習慣咗無乜人關心佢哋做乜(即使好重要),以致佢哋無法想像有人對佢哋有興趣。

佢都唔係真係無人識嘅(至少喺Lewis出書之後),搵到張佢2019年入圍Samuel J. Heyman Service to America Medals(一個頒畀美國聯邦政府員工嘅獎)嘅相︰

Photo Credit: Samuel J. Heyman Service to America Medals

--

--