當初Factcheck Lab開Patreon時，需要決定用美元定港元收費，因為用唔同貨幣收費有分別。Patreon一開頭唔支援港元，所以好多人都用美元收錢，但而家支援之後我哋揀咗用港元收。
由於越嚟越多人開Patreon，做咗功課唔好嘥所以寫返出嚟畀有需要嘅人，會畀返link大家參考，請自己對返資料準唔準確同有無改動。如果你唔喺香港，用嘅貨幣唔同，各項費用都可能有分別，請搵返相關資料去睇。
呢篇文其實同Factcheck Lab無關係（只係開嗰陣要睇下啲收費資料）但都借位賣個廣告︰
以下會先簡介從Patreon收錢到香港戶口中間要扣嘅各項費用（US$＝美元，HK$＝港元），覺得太煩可以直接拉落去睇「例子」部分。
整體而言可以參考呢篇︰作為創作人，我需要支付甚麼費用？（Patreon）
1. 平台費（Platform fee）
呢個係Patreon嘅平台費用，按計劃有唔同收費，分別係5％、8％同12％，有咩分別自己睇Patreon介紹。唔分貨幣都係收一樣比率。
參考︰價格（Patreon）
2. 處理付款費用（Payment processing fees）
Patreon幫你向會員收錢嘅手續費，即會員每次畀錢時Patreon收嘅錢。
分金額有唔同收費（我叫做大細額啦方便啲），美元條界線係US$3，港元條界線係HK$25。
- 美元收費︰每次 5%+US$0.10（細額）或2.9%+US$0.3（大額）
- 港元收費︰每次 5%+HK$1.2（細額）或3.9%+HK$2.35（大額）
只要你收超過US$3或HK$25，就只需要理後面個數字（大額）。留意係每次收費計錢，所以假如每月有N個會員畀錢，每個月都會扣N次錢。
留意呢度港元收費高1個百分點。
