禪修:愛惜你身邊的菩薩

禪修唔只剩係坐,正如一行禪師所講,行住坐臥都可以禪修。有時候如果你好彩嘅話,重會係日常生活遇到唔同嘅菩薩幫你去禪修添。

剩係做你鐘意嘅事,未必就一定係菩薩,更多嘅時候菩薩係會做啲你唔鐘意嘅事去磨練你,正所謂恨鐵不成鋼!而好慶幸我身邊有個咁樣嘅菩薩,佢就係我女朋友。(更正:啱啱被佢睇到我寫呢篇野,佢話係未婚妻,唔係女朋友喎。。。)

話說我同我嘅菩薩食完飯,我地就有講有笑咁行落山。行到一半嘅時候,我嘅菩薩再次顯靈。佢突然話:「我唔記得著番件褸!」我嘅表情係:「…」但係我內心係:「😱😤😰😖😱」呢個時候禪修嘅練習開始發揮功用,我覺察到我心中嘅怒火燒緊上黎,我知道嬲怒只係我其中嘅一部分,我唔可以被佢帶著走。我要立刻回到方法上面,搵番個呼吸。

就係呢個moment,心念一轉,個境都轉埋。「其實,食飽咗,行多D都好嘅。」「好彩行到一半就發現。如果上咗車先發現,就麻煩多了。」每一次經歷完菩薩嘅考驗,我都會覺得我嘅修為又上一層,所以你話我點可以唔愛我嘅菩薩呢?

題外話:如果大家覺得我係自己嘅婚禮講呢D菩薩小故事都幾好喎,你會俾多D人情嘅話,你可以俾5個或以上嘅claps我呢篇文,等我黎緊集結多D呢類型嘅小故事,係婚禮上面同大家分享🤗

One clap, two clap, three clap, forty?

By clapping more or less, you can signal to us which stories really stand out.