《個晚食完米線之後，我就同佢分左手》

我男友阿文係一個文員，人如其名，個人斯斯文文，從出細到廿六歲，成世人規規矩矩，大學畢業就出黎做份文職，三年黎只係加左500蚊人工。
我地一齊已經兩年，佢連我個bra都無除過，就算上黎我屋企坐都只係攬下錫下，我d fd同我媽咪都話佢係一個好男仔，叫我珍惜佢。

我自細就好乖，同阿文一樣樣貌平凡，如果唔係返工要化妝我根本唔會化，平日無咩消費，連衫都係媽咪買比我，最大娛樂就係上Facebook睇得意貓貓既片。我地平均兩個月只睇一次戲，由於我地都好慳(無計啦人工得個萬一蚊仲要還loan)，就算同阿文出街都係食碗三哥米線，每人只係30蚊，我地已經覺得好貴。

平時我地放左工就會直上三哥，今晚我留意到同一條街開左一間新既米線，d裝修幾舒服，我就拉左玩緊手機既阿文入去坐低。d位當然好窄啦，不過都算大大碗，價錢比三哥貴幾蚊，阿文望到價錢開頭想走，係我禁住佢：都入到黎啦食左先講，咪當試下新野囉。

食食下隔離檯對後生夫婦既笑聲引起我注意，雖然個男人望落去似飛仔，又染曬金毛，講野仲夾住好多粗口，但d野食一黎就幫老婆放匙羹放筷子，又將d老婆鐘意食既野推係佢面前方便佢夾。而我因為媽咪教落出面d餐具一定好污糟，所以我次次都會用自備既紙巾抹一次先用，但兩年黎阿文從來唔會幫我做呢d野。

佢地叫左好多野食，仲叫埋幾個小食同特飲，反觀我地只係一人一碗米線，仲要得兩款配料。我望住隔離檯個大大杯，顏色鮮豔既特飲，心裡面就越黎越唔舒服，兩年黎阿文都無試過咁樣服侍我，就算我生日都只係帶我食吉野家火鍋，我好記得個次我地一人拎住一鍋，拎完仲爭d無位坐，個日阿文仲只係買左一件cake比我，佢話：橫掂我都唔食蛋糕，你又食唔到一個咁多，所以買一件比你，都一樣0者。

越諗心裡面越煩躁，我忍唔住問阿文：我地無叫野飲咩？
阿文表情雖然好訝異，因為我地為左慳錢，一向出街食飯都唔叫野飲，但佢依然係咁細聲：一陣食完買比你啦。

我只好飲兩啖味精湯，越飲就越口渴，佢繼續低頭睇手機食米線。我望住隔離檯差d放唔曬既野食，個老婆雖然少少肥，但佢食野時面上有幸福既笑容，檯上張單係197蚊，雖然唔係咩大數目…
我又忍唔住同阿文講：呢度唔叫野飲連水都無杯既。
阿文望一望侍應，只係繼續安慰我：一陣食完買比你飲啦…

我忍住口渴，忍住眼淚，忍住度氣，食完個餐米線，食完阿文就同我一齊去OK買左支水比我，仲要係唔凍既，佢自己飲一啖然後遞比我。
佢如常咁送我到巴士站，如常咁打住機等巴士，如常咁道別，今次我無錫佢，因為我知今晚係最後一次同佢出黎。我返到屋企，係房用枕頭摀住頭狂喊，半夜2點我whatapps佢：我地分手啦，然後就block左佢。