《那些年，我在旺角地鐵站賣了10萬隻翻版》

我叫阿輝，13年前既我係一個黑社會新仔。2003年由大陸黎香港，係個無親戚關系既阿叔度寄住，個陣佢只負責比學費，我係佢唐樓樓上既天台鐵皮屋住，零用錢當然係無啦。阿嬸又好仆街，要我同佢地分開食飯，成日比d餸尾我食。為左生活，我中五未畢業就出左去跟大佬。

個時係2004年，岩岩過完SARS無耐，經濟差，個個失業，無錢出街睇戲食飯，又驚比人傳染沙士，連網吧都靜英英，所以個個都買老翻係屋企睇戲，又平又抵，又可以係屋企食埋飯同條女，簡直係最佳娛樂。

以當年既技術，一隻碟最多只可以燒10幾次，以前一隻吉碟又要10蚊隻，所以出面好多賣100蚊得3隻。當時出面已經有好多檔翻版，我諗左好耐，以我一個新仔點可以出位呢？我吸一口煙，望住努力燒緊碟條0靚仔，金毛，黑背心，身材又瘦削，我唔想一世都好似佢咁，比人玩，比人當工人咁洗，三更窮五更富。當佢燒完第10隻碟諗住換碟時，我埋去阻止佢。

“唔好換住。”

佢碌大隻死人眼望住我”但…第10隻啦喎，再燒就睇唔到…”

我忍唔住喝佢”睇唔到咪睇唔到囉！叫你做就做啦咁多廢話！”

佢一驚，即刻話 “對唔住大佬。”急急忙忙咁繼續燒碟。

我決定一隻碟燒10000隻翻版，燒到佢燶為止(d碟燒得多真係會燶)。反正d人買老翻都係為左貪平，就算有幾隻睇唔到都無所謂啦，又無記號，唔通佢地夠膽返黎換咩(當年”黑社會”仲係好惡既)？就算換左都係睇唔到，d人覺得煩就唔會再換架啦。

以前仲有好多海關掃貨，收我d貨事小，罰我錢事大呀！次次掃都罰800蚊，做埋都唔夠蝕。為左極速收檔走佬，我就發明左同上圖差唔多既擺檔喼，當然我係自己改裝啦。將一張麻雀檯鋸開一半，中間求其用d線連住，d碟就裝係下面個紙皮箱度。海關一到，一蓋起個”喼”放入紙箱度，佢地就耐你唔荷，因為一來無搜查令無得睇你個箱裝咩，二來佢又捉唔到你賣野。

就係咁，個一年我就係旺角地鐵站銀行中心出口，賣左10萬隻老翻碟，我賣100蚊7隻，一晚至少賣200–300隻，一星期都賣到2000隻啦！一年之後，海關掃得多，仲成日同警察聯合行動，加上d人做爛市賣100蚊20隻（仲仆街過我，賣吉碟），又多人上大陸買，我就慢慢無做了。

最後當然無變到有錢人啦！因為我搵幾多洗幾多，鐘意就請全場飲酒，高興就比一千蚊貼士泊車仔，所以同好多古惑仔嘅下場一樣無錢剩，我而家仲做緊地盤…