晨早流流聽廣播劇

晨早流流,啪藥咁啪返套《藍寶石的夜空》……

係,係Fans嘅大概都知係咩,但相信都有唔少人唔知呢套係咩。佢係套廣播劇,不過唔係903,係新城,聲演嘅係Eason、阿Sa、周子駒同何嘉莉。最近因為想做返啲廣播劇嘅創作,所以就返自己鍾意嘅廣播劇,提起返自己寫劇本時要注意啲咩。

呢一套廣播劇令我最大嘅感覺就係頭1–6集,嚴格啲嚟講,我覺得成個故事重點係呢五集,之後就係零碎嘅片段,再組成呢個故事。我覺得有少少勉強拖到咁長,可能係反應好啩,但係諗返自己嘅作品,都有一個咁嘅情況。即係我會好重視所有角色發展,唔一定係主人物,我鍾意寫好多人物與人物之間嘅細節,或者配合唔同角色嘅故事發展,寫嘅時候就好開心,但宜家聽返呢種做法,又會覺得自己唔太想聽落去。就唉……點算好?

雖然係咁講,但有啲支線其實都好有趣,特別係講緊少少神怪嘅嘢,令成個故事無咁Dry,諗返轉頭如果每日聽一集都還可以,因為每集都有佢自己主要嘅故事起伏,同時又會有伏筆去承接住主線嘅人物,令人物可以帶動個故事咁走。宜呢一套特別嘅係,Eason個角色設定好正,對白抵死得嚟又獨特,由缺乏愛情的單身毒舌男(輕微,不是《賤精先生》那種),與寶意初遇後又分離,似是緣份將他們又拉近,令他對愛情的幻想成真。當中那種慢慢轉化嘅愛情感覺,就係最令人百聽不厭。

除咗呢個套之外,我仲有一套係超爆鍾意嘅廣播劇,係當年梁朝偉同楊采妮嘅《初戀無限次》,我當然唔係聽live,只係聽重播。同樣有好大吸引力嘅原因係梁朝偉,又係有輕微尖酸刻薄嘅個性,雖然清楚知道自己有一個女朋友(而女嘅係講到明有另外三個男朋友),但為咗照顧初戀女朋友的一個承諾,決定用朋友身份去照顧呢個倒楣嘅初戀女友。成個故事童話得嚟幾現代,係現實多數都唔會有呢啲嘢發生,但偏偏好多人都好想見到有呢啲事出現在身邊,治療自己嘅心靈。

不過講返宜家2018年,好多人感覺都唔係個回事,香港太多問題發生,連娛樂都需要有所增值先會睇,聽到都覺得倦。都市人真係好忙……

作者:多媒體廢作人

作品:2016《叛神軍團》、2016《Slow Music》、2016《筆示驅魔傳》、2017《DSE幻想校園》、2017《格子控的執著》、2018《混個半神當就這麼難嗎?》。個人網:https://andy729hui.like.community/

新開始一個項目《粵音估歌仔》,有興趣可到「挑戰菜單」玩玩!