Թումոյում նկարահանումներն ավարտվեցին

Այսօր Ստեփանակերտի ՛՛Թումո՛՛ ստեղծարար տեխնոլոգիաների կենտրոնի ուսանողներն ավարտեցին ֆիլմերի հատուկ աշխատարանի նկարահանումները:

Վերջին նկարահանումներին մասնակցում էին բոլոր երեք թիմերը, որոնք հմտացել էին ինչպես օպերատորական գործում, այնպես էլ մնացած աշխատանքներում:

Նկարահանումների հրապարակն այս անգամ տեղափոխվեց Ստեփանակերտի Ստեփան Շահումյանի անվան պուրակ, որտեղ էլ աշխատարանի մասնակիցները նկարահանեցին ազգագրական պար:

Երկրորդ ֆիլմի հերոսը՝ Արտակ Բեգլարյանը հաճախում է ազգագրական պարերի խմբակ: Նրանք նաև կազմակերպում են բացօթյա դասընթացներ, որին անմասն չեն մնում ստեփանակերտցիները:

Բացօթյա ուսուցման ժամանակ նրանք, ովքեր ցանկանում են պարել, միանում են խմբին, սովորում շարժումներ, ապա միասին պարում Ստեփանակերտում հայտնի ՛՛Պյատաչոկի՛՛ շուրջ:

Ստեփանակերտի ՛՛Թումո՛՛ ստեղծարար տեխնոլոգիաների կենտրոնի ուսանողները ևս միացան պարի բաս դասընթացին:

Նրանք հասցրին սովորել մի քանի պար, իսկ նկարահանումների ողջ ընթացքն անցավ էլ ավելի աշխույժ:

Ստեփանակերտի պուրակը լեփ-լեցուն էր մարդկանցով: Մարդիկ դիտում և մասնակցում էին բացօթյա պարի դասընթացին:

Այսքանով էլ ավարտվեցին ֆիլմերի հատուկ աշխատարանի նկարահանումները: Ուսանողներն արդեն անցել են մոնտաժային աշխատանքներին: Բոլոր երեք ֆիլմերում թիմերը կատարելագործում են արված աշխատանքները:

Այս շաբաթ ուսանողները կներկայացնեն իրենց պատրաստած երեք ֆիլմերը: Սա ՛՛Թումոյի՛՛ ուսումնական ծրագրի վերջին շաբաթն է: Առջևում արձակուրդներն են թումոցիների համար:

Հիշեցնենք, որ արցախցի կինոռեժիսոր Ջիվան Ավետիսյանի ֆիլմերի հատուկ աշխատարանը մեկնարկել է հուլիսի երեքին: Ուսանողները բաժանվել են երեք խմբերի, որոնք էլ ներկայացնելու են մեկական ֆիլմ:

Ֆիլմի հերոսներն ընտրված են, նկարահանումներն՝ ավարտված: Այժմ երեք թիմերը պատրաստվում են հասարակության դատին ներկայացնել արցախցի կինոռեժիսորի տքնաջան աշխատանքի արդյունքները:

Արդյունքների ցուցադրությունը տեղի կունենա այս շաբաթ պրեզենտացիայի ժամանակ:

Տեքստը և լուսանկարները ՝ Անի Ավանեսյանի