آية… سوسن اتصلت بيا

هو أنا عرفت إنك من سكان بفرلي هيلز و ربنا يزيدك و يزيدنا بس مش لدرجة إنه جمعية رسالة تكلمني كمان من حوالي شهر تقولي أستاذة آية؟ أيوة ..جمعية رسالة مع حضرتك المندوب بتاعنا جاي بكرة المنطقة من الساعة واحدة لخمسة غالبا و هيعدي على حضرتك…بس أنا مغيرة عنواني من سنة هو حد بيدفع ؟؟ أيوة يا فندم…حسيت بسعادة بالغة لما تخيلت إنه في حد مكمل حاجة كويسة كنا بنعملها و بيدفع بدالنا,طيب بس أنا مش في الدقي حاليا,حضرتك تحبي أغير العنوان للدقي؟ لالا أنت فهمتي غلط أنا مش في الدقي أنا في الصحراوي ,أيوة يا فندم ماهو المندوب جاي بفرلي هيلز بكرة بإذن الله…بيفرلي هيلز؟ أيوة يا فندم, حضرتك عاوزة آية مين؟ آية كذا كذا, هو رقم التليفون كام معلش؟؟

مينفعش تحرجيني يا آية مع عميل عندي عملتله ديزاين ليافطة مضيئة و هو بيركبها المطبعة بتقوله مين ال عملك التصميم قالهم واحدة اسمها آية , آية؟؟ دي أستاذة آية بتعمل شغلها كله عندنا, و اسأل العميل اسمها ايه المطبعة دي يقولي اسمها أطلع معرفهاش و أقوله لا قصدهم آية واحدة تانية, يقولي كده يا آية و أنا عمال اتفشخر قدامهم…موقف محرج أوي

و لا عبده…عارفة عبده ال شغال فييييي و لا بلاش أصله اتعرف عليا بسببك و كان عاوز يضرب معايا صحوبية و هو متجوز و أقوله اختشي ميصحش كده, و هو مصر تلف الأيام و يرجع تاني عاوز يضرب صحوبية و قال إيه عاوز يعدي عليا في البيت ياخدني ناكل أيس كريم سوا,قلتله مبركبش عربيات مع رجالة يقوم يقولي هستناكي على الناصية و محدش هيشوفك و أنت راكبة معايا, يخرررررب بيت سنينك, قلتله لا أنت فهمت غلط أنا مبركبش عربيات مع رجالة تحت البيت أو بعيد عنه, و لما قلتله هجيب أختي معايا طفش و مشوفتش خلقته تاني الحمد لله…أهو عبده ده اتصل بيا من تلات سنين أو أكتر بيقولي إزيك يا آية أنا عبده ال شغال في شركة كذا أنت كنت مقدمة السي في بتاعك عندنا…و لأن القدر يشاء إن أنا و أنت نقدم السي في بتاعنا في نفس الشركة أفضل أتكلم معاه لحد ما أقوله لا تصدق دي طلعت آية ال كل الناس بتتصل بيا بدالها…من يوميها و أنا عرفت إننا نفس الكارير, يرضيكي أتعرض لشخص زي عبده بسببك؟؟

و لا شريف من سويسرا…كلمني مرتين, مرة الخط قطع,قالي آية ؟أنا شريف من سويسرا معرفش هتفتكريني و لا لأ…تن تن تن تن تن…الخط قطع يا شريف, رجع اتصل بعد سنة قالي آية أنا شريف من سويسرا فاكراني؟ طيب بص حضرتك هو أنا آية بس مش ال انت بتتصل بيها , أنا آية واحدة تانية…أنا شخصيا بدأت أشك إن عفريتي بيظهر للناس قبل ما أموت..

عارفة مين تاني اتصل بيا؟؟ المطبعة ال بتتعاملي معاها قالولي يا أستاذة آية الشغل بتاعك جاهز نبعتهولك و لا تيجي تستلميه؟ قلتله لا أنا مش الأستاذة آية بس مفيش مانع تديني عرض أسعارك مدام أنت مطبعة, و طلعت أسعارهم غالية يا آية متتعامليش معاهم تاني…

أنا أخدت رقمك من رسالة على فكرة دحلبت البت من غير ما تاخد بالها و طلع رقمك شبه رقمي فعلا, دخلت أدور عليكي في كل حتة لقيتك على الفيسبوك عاملة برايفسي شديدة على الأكونت بتاعك…على إيه يا آية كل البرايفسي دي ما أنا عرفت كل حاجة خلاص و السيديهات عندي … لا لا متخليش مخك يروح لبعيد سيديهات إيه لا سمح الله هي تيليفونات بس…

عارفة مين تاني اتصل بيا…واحد اسمه أحمد من خدمة عملا اتش اس بي سي, ده كان أول واحد غالبا يعمل الغلطة دي معايا, كنا في رمضان, و كلمني قالي حضرتك آية قلتله أيوة طيب أنا عاوز أأكد مع حضرتك كذا كذا, قلتله بس أنا معنديش حساب عندكم, قالي إزاي يا فندم, و غالبا مقتنعش إنه مش أنا إلا لما قلتله رقم تليفوني أو اسم أختي , مش فاكرة بالظبط لأن الموضوع ده كان من تلات أو أربع سنين…أو غالبا أختك اسمها زي أختي أو حد من أخواتك اسمه زي أخواتي…

آية…سوسن اتصلت بيا من شوية و شكلها كان غضبان أو ناويالك على نية هباب, حاولي تكلميها تهدي النفوس, أول ما قلتلها أنا آية ,بس أنت سوسن مين..كانت هتنط من التليفون و تديني قلمين, قالتلي أنا سوسن يا آية!!! أقسم بالله ما أعرفك يا حجة…هو أنا آية أه بس النمرة غلط…يرضيكي يحصل فيا كده ؟؟

أنا مترددة أتصل بيكي و أجرب و لا إيه بس عندي فضول أعرفك …يا ترى الناس بتتصل بيكي بالغلط زي ما بيتصلوا بيا كده؟؟؟