和你食黃店(1):基隆茶餐廳
– — – — – — – — – —
乾炒xo醬豬扒炒一丁、凍鴛鴦
價錢:$46
.
基隆茶餐廳係一間非常黃嘅餐廳,中大嗰次,佢地亦有送物資畀學生,詳情可以睇返佢地嘅FB Page。
.
界限街本身同附近都有幾間黃店,我之前都食過芳華絕代,潮州人,都值得去支持,之後都會寫返。各位同路人其實都可以去嗰一頭幫襯佢地,就算一間排長龍,都可以去另外嗰啲黃店,唔洗怕要等好耐先有飯食。
.
今次係我第一次試依間。炒一丁份量頗大,非常飽肚惹味,只係鹹咗少少。凍鴛鴦好啱我胃口。出餐嘅時候伙計畀多咗碗例湯我,我以為跟餐包就飲咗。之後畀錢嘅時候,我問收銀靚姐同老闆其實個餐跟唔跟湯,先發覺出錯畀我。老闆好好人,見我誠實咁問佢地,碗湯當免費。🙆🏻♂️
.
其實我唔會太集中描述野食嘅味道,去評價黃店嘅出品。我只係一個好平凡普通嘅食客,對味道唔係去到咁講究,自問都無能力去評斷啲野食正唔正,有幾多分。
與其話係食評,不如話係一個記錄。
前排睇杜生嘅《今宵多珍重》,前線記者姐姐提起《露體狂小丁》幾句歌詞:
這一場革命
最終無人取勝
但請你 請你 留低一起作見證
我其實幾相信香港人最後會取勝。依一場無可否認係一場長期嘅抗爭,而將抗爭融入生活成為我地必要之義務。我地每一個人都可以做得更多,為咗守護每一個手足,為咗守護自己嘅信念,不斷抗爭,無論多少,直至最終取勝。
直至煲底相見之時,請你留低一起作見證。🐌