學外語雜談

我係個一直處於「嫌自己入錯科、想轉系、捱到年尾作罷」輪迴、覺得自己裝錯殼嘅工程仔。畢業臨近，人生路越見迷惘。為咗幫自己釐清方向，我喺新年目標度，要自己搵個平台，紀錄低自己嘅所學所思所想，順便抒發下生活中嘅壓抑。

我本來嘅計劃係拍片，但成件事因為靈感欠奉而停滯不前。結果我決定喺唔得閒/無心情之前，寫返啲文字紀錄，等自己開咗個頭後，就算無觀眾都唔好意思爛尾。由於本身嘅計劃係想自娛，所以我想先寫樣自己嘅興趣。

我幾鍾意學外文，鍾意到上堂同其他 engine 仔分享自己興趣嗰陣，都揀咗呢樣嚟講。我對外文有興趣，係中學到入大學嘅事。細個嗰陣我成日俾人話有黐脷筋，小學時仲俾學校安排過去見言語治療師，跟佢哋做發音練習。不過喺中學，我依舊成日俾人話我口齒不清，講嘅嘢亦成日俾同窗 play down。由於已經無法接受治療，我焗住自己醫自己，摸索下點樣發音、講嘢標準啲，跟住就誤打誤撞咁發現「學講嘢→學語言」呢件事幾好玩。不過真係有擺個心去學，主要都係大學嘅事。我亦離成為一個 polyglot 仲有好長距離，暫時學過嘅外文都唔多。

唔計英文普通話，我第一隻讀嘅外語係德文。開始學德文係大約中三嘅事。嗰時我迷上咗《Hearts of Iron》系列嘅 game，對近代歐洲史萌生興趣。因為嗰陣屋企人學緊法文，我就諗住唔同啲走去學德文。咁啱發現香港間 Goethe-Institut 將會開青少年班（每堂時間短啲，個零鐘左右），就去咗報名。我喺嗰度學咗大約一年，考咗個 A1 後，就因為之後得返成人班（每堂三個鐘），覺得自己集中唔到咁長時間就停咗無讀。

繼續學德文係大學嘅事。本來我只係為興趣而揀德文做 minor，但最後我個 CGPA 要靠佢先拉得返靚啲啲。之後我又停咗年半，中間無咩點接觸過同德文有關嘅嘢，係去到舊年年尾女朋友鼓勵我繼續讀，我先至走去報 course。做完個 Placement Test，考官話我水平仲有 CEFR B1 近 B2 level，同大學 lecturer 講嘅、讀完成個 minor 嘅應有水平大致脗合。老實講，成個 minor 學過嘅生字我都唔記得七七八八，印象最深反而係啲德文 grammar 點幫我學返好啲英文，例如 who/whom 同一大堆 preposition 同埋 here/there/which 嘅組合。而家我諗極都唔明，點解啲由細至大英文堂學過咁多次都仲一知半解嘅嘢 （可能我蠢），轉一轉德文台（z.B. wer/wen、worauf/darauf/ hierauf/auf dem）就會茅塞頓開。

不過自己有個遺憾，就係明明學咗咁耐德文，睇德文戲/片個 process 速度都仲係好慢，同埋仲係唔太睇得明德文新聞。

而家諗返起自己想學德文嘅原因，同埋見到中華文化圈唔少人對德國、德國文化有興趣嘅契機，係段當地人會覺得內疚、懺悔嘅歷史，就不其然覺得有啲尷尬。就好似日本明星嚟香港見 fans，然後同大家講佢好鍾意成龍咁。