白龍喺佢個 friend[1] 徐玄滬喺牛津嘅嗰間豆腐潤咁細嘅房度亾[2]緊 — — 徐玄滬本來就應該係喺呢間房度瞓嘅,但係佢女朋友咁啱喺德國返到黎牛津,佢就啜一聲過咗去陪佢過夜,噉樣就由得白龍佢自己一個一枝公獨霸成張床喇。
月亮高照,白龍本來係諗住同佢個好朋友麥花臣金將軍見面,飲翻兩杯 — — 但係謦謦[3]下又冇咗件事噉,佢於是乎就喺 The Bear 度自己一個叫咗杯超大杯嘅紅酒黎飲,煲咗一陣煙。飲完之後就自己躝咗返房。
喺夜闌人靜月光野藍嘅牛津,白龍挨著窗邊喺度百無聊賴,忽然依稀聽到喺窗外有人聲。
噉夜媽媽喺英國班玩到冇哂分寸嘅鬼仔鬼妹飲到一坺野依嘩鬼叫實在唔係啲咩奇景,白龍喺英國逗留咗兩個月都已經慣晒。奇嘅係,白龍認真啲聽,似乎係廣東話。再落力啲聽,真係無可置疑係廣東話。
白龍隊個頭望出窗,見到瀟灑唔當英國寒風係咩一回事着住短褲同一件黑色Hoodie 嘅將軍佢喺樓下,好似喺度謦緊電話。語氣同平時毫不急躁嘅將軍佢有啲唔同,似乎略有啲唔耐煩之氣,仲有啲氣餒嘅㤇[4],少少躁底添。
將軍抬高頭望到白龍,白龍望到佢。將軍轉咗入去前面冇幾遠嘅街嗰度,放低咗聲浪。
白龍縮翻個頭入房,拿拿臨着咗件長袖衫,捩手攞咗件外套,執埋包煙,落街。
麥花臣金將軍個電話好快就謦完,明顯不歡而散,而且結束得早過應當結束之時。
「喂,白龍。」
「將軍。」
「sorry 啊,搞到咁遲。」
「唔緊要。我仲以為你同嗰個嘅野喺度搞緊野添。」
「你話莉麗絲?唔會啦,係要伊挹係要扑野就唔出黎啦。不過就算有得扑都唔係今日啦。你山長水遠黎到呢度,梗係要聚下舊嘅。女咋嘛。」
「做咩呀,咁大火氣噉嘅?」
「冇野,同阿史提芬妮講電話,講耐咗,所以遲左出黎,梳[5]呀。」
「你同史提芬妮冇野吖嘛?」白龍問佢。
「佢咪係喺度嘈囉。」麥花臣金將軍遞咗支可樂畀白龍。樽裝可樂喺英國至少賣一支兩鎊。佢哋兩個開始行。
將軍突然之間噉話:「白龍,我真係覺得好攰喇。」一反佢平時瀟灑脫俗,兩手揈揈毫無牽掛嘅風格。有咗股愁氣。「其實已經儲咗好耐架喇。」
「其實你哋兩個到底係到做咩嗟[6]?」
「我後日咪去見佢囉 — — 」
「你唔係聽日倫敦咩?」
「係呀,但係去完咪即刻返牛津見佢囉,佢黎搵我。」
「我仲以為你嗰個莉麗絲仲會留係倫敦幾日亾添。」
「唔會囉 。」
「其實做咩呀?聽你哋兩個講野好似攪到好僵噉。」
「佢前幾日咪撀[7]咗份佢報 Masters 嘅 written work 畀你嘅?」
「啊吓。」白龍點會唔記得吖。嗰份野睇到佢眼都凸埋,一頭霧水。佢根本喺呢一方面乜都唔識,點樣評價同俾 comment 嗟?
「計我話其實根本就係㩄[8]氣。你又唔係讀 sociology,點會識嗟!我畀我嗰啲嘅 N展野過黎你睇要你賜評賜評都唔可能啦屌。根本就係錯晒門路。佢問完你之後再問我,又係同一個問題囉!屌,我想幫佢,但係點幫呀屌!我呢家野我乜都唔撚識架!」
「噉我都係噉意畀咗啲意見佢嘅。其實我就真係冇所謂嘅,都係幫下我哋呢班 friend 我哋啲做同輩應份嘅野姐~」
「哎呀你明唔明呀白龍 — — 佢係唔應該㩄你時間畀你第一份你冇可能可以有貢獻嘅野呀,佢係反而應該畀你睇佢份 PS 啊屌!你英文噉好,係要搵幫嘅都係應該搵你幫手砌掂份 PS 啦,點會搵你去搞一份 written work 嘅嗟?」
PS,personal statement,個人陳述。
「不過你冇睇到都好,因為真係好笠笠亂。真係七國咁亂。」
「點解啊?PS 咋嘛,咪又係文一份,可以點樣亂嗟?你之後咪再過我睇過囉。冇咩大不了姐~」
佢哋兩個繼續行。呢度係牛津嘅北部,大部份都係住宅,冇乜商舖學院大樓諸如此類嘅野。除咗藍白色酷冷嘅街燈之外,就係乜都冇 — — 冇人。一切寂靜,得佢哋兩個大大聲係度講野。
「我其實最㷫嘅唔係佢噉嶣[9]我要我趕頭趕命幫佢揼[10]份野出黎囉。我有咩所謂嗟?改我咪改囉,但係你都唔好咁遲先臨急抱佛腳先得架。就黎 dead 先來搵我 — — 」
「佢 Dead 幾時?」
「其實就仲有成個月嘅,至少份 written work 就已經攪掂咗,但係而家冇用啦。係想你幫佢睇下過下目呀,但係前提係要有野畀你睇先得架!」
「寫份野姐。」白龍話,「大家都喺呢個大學職場上打滾咗咁耐囉,冇難得一身好本領都應該練得一手好功夫啦。求其鳩噏呢門藝術大家唔係應該見應該已經練得爐火純青嘅呢咩?」
「屌,都要有野畀你改先得架。唔係佢㧙唔到分野出黎嘅問題呀!係而家全部野停晒囉,個 deadline 就繼續衝埋黎,仲要走黎殺到埋身添啦,但係而家就搞埋晒啲狗屎垃圾陀手㨢腳。唔好話張 PS 寫唔寫得成可唔可以嶣到出黎吖~個碩士報唔報到成問題囉屌。」將軍即刻扭開咗樽可樂大啖噉飲咗啖,下火。但係白龍都唔係好聽得出個問題係喺邊一度。
「噉其實姐係咩事呢?發生咗啲咩事搞到咁大鑊連報唔報到成問題呀?」
「個問題係 — — 屌!佢老竇老母話唔想佢繼續留喺英國呀!屌!」
「吓?」白龍一面愕然。「唔留喺英國?噉去邊呀?唔讀書呀?即刻開工?史提芬妮讀 sociology 冇碩士點開工呀?」
「屌!佢老竇老母想上去咩大灣區度退休,所以想史提芬妮返香港喎囉屌。」
「噉姐係佢哋想佢返香港讀 Master?」
「係呀屌!但係-屌!你知架啦,香港啲學位,尤其是係啲咩碩士乜乜物物,根本就係廢嘅!No offence 啦白龍 (「none taken」白龍答佢),你同我都知道香港嘅大學同外國嘅大學比,邊度有得比嘅嗟?你 undergrad 都已經係噉囉,何況係碩士博士?屌,香港人眼光咁狹窄咁孤陋寡聞咁鬼市儈,啲咩英國嘅野雞大學都可以同港大中大比喺香港職場上鬥嘅已經唔係新鮮事架啦,有咩可能仲會咁蠢返去香港度讀嘅嗟!」將軍真係好燥底。好罕有地燥底。
原來如此。白龍就繼續問:「但係佢老竇老母要退休上大灣區度咪上大灣區囉,關史提芬妮去邊度讀書咩事先得架。」
「佢老竇老母其實一直都唔黎㥍[11]佢去英國讀書架!」
「但係佢又成個 undergrad 喺英國讀嘅?」
「噉係因為佢當年同佢老竇炒大鑊,嘈到拆天佢老竇老母心軟咗先至畀佢出國。」
「噉都已經有先例囉,可以再黎嘅姐。」
「好似你講到咁易就好囉。你發爛渣還發爛渣,去邊度讀碩士你點都要講少少道理架。家陣佢老竇老母要退休啦,要乜乜物物,你要同個退休開始食穀種嘅老人家哀[12],你橫睇掂睇都係會處於下風囉。加上佢老竇老母根本就係完全同社會脫節,仲係停留喺八十年代嗰啲以為港大已經好好,鹹水唔輪到你浸嘅嗰啲思想度。。。哇,屌,最難搞嘅莫過於佢哋講埋晒嘅嗰啲咩『係香港讀書有咩唔好嗟?』『好好地點解要去鬼佬地方讀嗟?』呢啲咁戇鳩[13]嘅說話。」
「冇乜野嘅~上一輩嘅噉樣諗。。。」
「唉」將軍忽然嘆氣話:「佢禮拜二畀你睇畀你評,你就禮拜二嗰晚改好晒禮拜三朝早遞返畀佢 — — 佢仲要係禮拜二凌晨畀你架嘛 — — 唉,你咁趕都嶣到份野俾佢,我都真係唔該晒你喇 — — 咁嶣要你㧙份野出黎畀佢。。。」
「哎呀噉又唔使[14]。」白龍同將軍佢講。「你有冇睇到我標咗評語嘅嗰個版本?」
「有!梗係有啦!」
「我都好似寫咗好多野畀佢,好多都計我話都幾啃架噃,都幾唔畀面話架噃。你有冇睇到啊。」
「我見到呀屌。你明唔明呀 — — 佢。。。我真係無諗過噉囉。我真係好辛苦呀,佢成日猛咁嶣住我,真係好 suffocating 囉。你知唔知點呀,佢而家終於肯疊埋心水落手落腳去搞佢個大乍報 Master 嘅野,唔理佢老竇老母卒之肯開片又報獎學金乜乜物物全部都係我擢[15]佢出黎架。佢老竇老母係極品已經算啦,佢自己仲要同佢哋衰埋一份,做乜都刁僑扭擰,咪咪嚤嚤,零舍娿哿。如果唔係我睇住佢,唔係因為我踢佢一腳佢先行一步,佢真係瞓到天光都唔知發生咩事!」
佢哋轉咗入一條小路,條小路通往一個細細地,好的式嘅一個小公園,側近有條悠悠小河流。
「唉,就呢度啦。」
佢哋喺個公園度搵咗張長櫈,冇乜太勁嘅街燈光,於是就坐低咗。白龍眼見四周圍黑影黃燈縱橫交錯,情不自禁諗返起幾個鐘頭前喺 The Bear 度等將軍佢出現時無聊有感寫嘅嗰首詩 — — 但係話口未完,佢呢個剎那間回想嘅片段,有咁快黎就有咁快消失咗。
「其實佢成日猛咁嶣住我,我真係好唔開心囉。」
「你哋噉樣嘅情況維持咗已經有幾耐?」
「已經好耐架喇,有成年喇。」麥花臣金將軍講住呢句就坐低咗,喺佢件外套個衫袋度摷啊摷。摷啲乜野?
「你等我一陣。」佢話。始終都仲係所謂嘅兄弟情。麥花臣金將軍終歸都係著重嗰種好老土但又真樸嘅「兄弟情」。如果認真少少去諗嘅話其實真係俍[16]到爆,但係問世間有幾多人有呢種嘅友情呢?有嘅,又試問佢哋有幾何可以真係可以出黎一齊感受感受呢?老實講,真係冇乜。或許,呢個就係點解香港咁多人將自己想同人連繫 connect 嘅需要寄託埋晒係啲比喻好似咩豆腐火腩飯噉嘅野。
「梳啊,臨急臨忙冇好好準備。希望冇損冇爛啦。」
將軍佢係佢嗰衫袋拎咗嚿野出黎。一嚿用咗條白色手巾仔包住嘅野。
「你唔係呀嘛~」白龍見到就即刻話。
「我都話囉。你山長水遠黎到呢度,我有咩可能唔招呼你嘅嗟?」
將軍佢慢慢噉揭開咗條手巾仔嘅四個角,中間坐咗落兩朵花。兩朵大概手心咁大嘅蓮花。兩朵都係好靚嘅粉紅色,其美於佢哋身邊嘅金光之下依然不減。細心啲睇,一朵係比較深嘅粉紅色,幾乎有少少的粵劇花旦面譜嘅粉紅。而另外一朵,就比較淺、粉、淡。兩朵都散發著淡淡嘅粉香。
「你真係太唔話得啦將軍。」
「唉咪講埋呢啲野啦。請!」
佢哋兩條友一人攞咗一嚿蓮花,好似碰杯噉「碰蓮花」(「cheers!」),然之後就一人一啖噉咬咗嚿蓮花。咬落去一個下發出咗清脆利落,好似咬蘋果噉嘅聲。「架嘞」噉。然之後就甜絲絲帶微微花香,又帶好似士多啤梨溝埋荔枝噉嘅味乘搭住啲果汁湧晒出黎,淹沒晒條脷上面嘅每一個味蕾。吞落肚嘅嗰一刻,個胃都感覺度佢哋嘅大駕光臨,突然之間變到既係溫暖又係清爽。齒頰留香實在係言輕了。好似波爾多紅酒噉,啲果肉同佢嘅個種香同味道係嗰口腔都一直醞釀,一直打滾兜兜轉轉不停噉演化,層出不窮。將軍第一次教白龍佢食蓮,仲話「如果你唔刷牙嘅話,真係可以繞樑三日架!」
白龍捩[17]手想攞支煙出黎,將軍就喝住佢。「等陣先!你喫晒嚿蓮花先至好對煙呀對酒呀盛,如果唔係個 experience 會搞橫[18] 晒架!」白龍收返埋支煙。「蒞啦,喫埋佢啦。」將軍話。
又一䘲嘅鮮果味同花香。
佢哋兩個之後坐咗係張凳度一陣。冇野。等。等。
之後進軍就再係佢個褲袋度攞咗支煙斗出黎。「你介唔介意?」
將軍家陣食煙都食得特別有型。唔一支一支煙噉食,喺特別鍾意玩埋晒啲撩棱[19]玩法,喺支煙度撩啲煙草出黎,然之後對落個煙斗嘴度再點著慢慢食。問將軍佢點解要噉樣食,問佢噉樣食法係乜零舍好味啲過癮啲。佢就答話因為用黎包住啲煙草用黎整支煙支出黎嘅煙紙加咗阻燃劑,所以會燒得特別快,而且更加傷身喎。
白龍佢自己攞咗支煙出黎,然之後就成盒俾咗將軍佢慢慢砌。「Cheers。」佢話。
將軍攊咗佢啲架撐出來,開始埋頭苦幹,唔望白龍。唔得閒望白龍。
搞呢搞路搞咗好一陣之後卒之搞掂。麥花臣金將軍攞咗佢個支煙斗,嗰支好表現到佢浪子不羈風範嘅木煙斗出黎,擺咗啲已經磨碎攪爛咗嘅煙草入去個煙斗嘴,跟住佢攞咗個火機出黎,點咗一野 — — 佢間間歇歇噉朔咗幾啖。
然之後佢畀啲煙喺佢口鼻瀡翻出來。抬望眼仰天長嘯。
麥花臣金將軍遞咗支煙斗同火機畀白龍。
「唔該。」
「唔使。」
「嚓」一聲撻咗火,然之後就隊埋去個煙頭。再黎多一啖。又一樞樞嘅煙。好濃。。。但係-平時嘅將軍食煙都幾快瀡返口煙出黎,但係今日呼煙嘅呢個動作,將軍好似做得零舍慢。啊唔係,非也,喺根本好似冇。佢耷低咗個頭,翹腳,微埋咗食眼,用哂力合埋晒眼好專注噉望黑暗中佢可以望到嘅野。佢鼻哥窿有煙慢慢飄出來。
佢哋噉樣坐咗一陣,跟住將軍先至率先開翻口講野。
「梳啊。」佢話。「梳。」
「冇所謂。」白龍應佢話。跟住對佢問:「其實發生咗啲咩事呢?除咗呢單野之外。我一直都以為你哋兩個好好嘅添。」
「佢年幾前同我有啲疏離咗,又係因為嗌交。其實都係我衰仔我仆街嘅。。。」
「唉係男人都仆街架啦,咩事嗟?」
「噉我同佢鬧交呀嘛,噉我失意咪出去淢[20]囉。史提芬妮佢咁清楚我籠野,佢係燥底又好,索[21]咗又好,呷醋火滾乜都好啦,佢總之就自己出咗去淢,噉就食咗個男仔 — — 」
「食咗?」白龍打斷佢問:「係識咗定係食咗?」
「啊係識咗-」將軍答佢,但係即刻吞翻彳亍咁轉補口話:「哎呀其實都某程度上可以話係食咗嘅,不過你聽埋先啦-」
「Ok 好好好,你繼續講。」
「嗱,噉我又唔係話佢出去淢就佢對我不忠我就所以嬲咗佢噉解 — — 話晒我都成日出去玩,有女就溝添。但係我都只不過係出去玩咋嘛。你係要玩嘅咪好好地出去玩個夠玩餐飽囉 — — 乜我呢單野冇同你講咩? — — 佢出咗去,跟住同咗個條仔喺得好埋,幾乎係埋一齊噉。噉之後我同史提芬妮佢 say sorry 同氹翻佢喇,佢就同咗個男仔分開咗。點知呢條仔竟然攞咗啲唔出得街嘅相黎威脅佢話要行返埋一齊喎!」
「吓?噉點策法呀你?」
「唉!呢樣咪講,一匹布咁長。最慘同最搞到我㷫嘅係佢冇同我講,佢真係傻頭傻腦噉任由個男仔要脅佢,畀佢噉耍法仲要畀佢搬埋咗入去佢自己屋企成個月添!」
「嘩屌唔撚係啩?直情係引狼入室。」
「咪係囉屌!你知嘛,呢一大乍最搞到我㷫嘅就係佢冇同我講。佢真係戇鳩鳩噉同個男仔話喺埋一齊就喺埋一齊,話掟煲就掟煲,諗都唔諗、度都唔度 — — 個男仔不知好歹戇鳩鳩噉聯絡我,係奚落我又好撩交打又好,我先知道單野嘅來龍去脈。」
「噉之後呢?」
「仲未有『噉之後』囉~喺我諗緊點約拆嗰陣,個男仔在鬼鬼鼠鼠約咗阿史提芬妮出黎,跟住我唔知發生咗啲咩事啦,佢哋就去咗 club[22] 玩呀癲呀。史提芬妮之後同我講翻啦,佢話佢哋食咗蓮花,又飲咗好多酒。佢唔記得之後發生咗咩事啦,但係當佢再次有意識嗰陣佢就發現自己同嗰個男仔喺同一張床嗰度。佢哋兩個都打大赤肋光脫脫噉。」
「嘩屌!點解會搞到噉嘅地步架!噉跟住呢?發生咗咩事?」
「噉冇啦。佢嚇到面都黃埋,驚惶失措之下即刻著翻衫拿拿臨即刻扯囉。」
「佢唔叫醒條仆街問佢個究竟?」
「屌,我事後都先發覺佢應該噉樣囉屌!但係史提芬妮已經走咗,況且佢嗰下根本就唔想再見到嗰條仆街,佢又驚又物之下打咗電話畀將個情況一五一十講哂畀我聽。。。噉,噉跟住咪同佢策點佢囉。咪繼續囉。」
將軍啜咗好長嘅一啖,又放咗好長嘅一啖煙。
「噉之後我咪幫佢策掂咗佢囉,但我哋之後都冇正式話喺翻埋一齊。」
將軍佢吸多咗一啖之後就低咗支煙斗畀白龍。
「黎啦,都話咗噉樣食過癮啲架咯。整翻啖喇。」
白龍佢雖然唔係第一次,但係用煙斗就真係係初哥,始終仲係唔係好慣,唔係好識點樣先可以唔辣親同濁親喉嚨。
「你唔可以咁大力吸架。」將軍係佢旁邊指導。「要輕輕力,喺側跟留翻啲位畀啲空氣鼠入去。如果唔係佢就會 combust 得太快然之後就會濁親。」
將軍話口未完白龍就領[23]咗野,咳咳咳。麥花臣金將軍就指住佢冇幾耐前遞畀白龍嘅嗰支可樂。「飲翻啖舒緩下啦,如果唔係咳成晚咳到你甩肺。」白龍遵命,即刻大啖大啖噉飲舒服咗好多。
抖順條氣,白龍就話:「噉你打算同史提芬妮點?」
「點?有咩可以點嗟?唔通抌低佢咩?佢已經好 fucked-up 架啦,我唔想再傷害多佢幾錢重呀。」
「噉姐係發生咗噉多野之後你仲係對佢有感情啦。」
「噉梗係啦。話晒已經係埋咗一齊咁多年。其實我同佢呢排真係好唔開心 — — 我其實已經有好耐時間我冇開心過喇。我唔係話我同佢鬧交我就唔可以認認低威 say sorry — — 我每次鬧交我最後屘都有 say sorry 氹翻佢,但係我真係唔想 — — 唔想 — — 」
「面對咁多蘇州屎?」白龍輕輕力再啜多啖。嚿蓮花嘅神效似乎仲未浮現。
「係呀係呀。我支持佢呢樣嗰樣唔緊要呀,但係不停地無間斷係噉黎,我真係好攰囉。」
將軍佢攞咗支煙斗,再點咗兩下火,輕輕嗍咗一啖仔。白龍就捩手點咗支煙。煙仔呢家野,同蓮花一樣,又係將軍呢個最佳損友教壞佢嘅。損友喎。不損不為友呀。
如蓮藕絲喺平靜嘅空中飄逸。據說,煙絲嘅活動路徑係到某個階段前一直都係非常有規律,非常容易被普通嘅物理模型所預測,變動亦非常有條理有紋路 — — 我哋肉眼都見到,直頭係一絲絲一鼠鼠嘅。但係一到某個位,本來有序有條理嘅煙絲就會突然之間完全失去所有結構,崩潰式飆向混沌,煙消雲散。佢哋面前黃紺紺嘅景色逐漸開始朦朧。
「屌白龍,我其實最驚嘅係佢留唔到喺英國呀。」
「點會嗟?佢如果好好地乖乖地跟足晒啲指示交齊晒啲 master 嘅報名文件,又唔柒得去邊嘅話,點會失驚無神無端端留唔到喺英國嗟?」
「屌,如果佢大吉利是講句入唔到呢?噉點?」
「關咩事?佢啋過聲冇 U 收,噉都可以留係英國架嘛唔係咩?」
「吓?」
「乜史提芬妮佢冇英國護照嘅咩?」
「佢有呀,但係佢冇 — — 冇 — — 嗰嚿野叫咩?」
「居留權?」
「係呀,佢咪就係冇居留權囉。」
「乜可以有英國護照但係冇居留權嘅咩?乜個配搭可以噉架?」
「唉,細節我唔知啦,總之就係如果佢如果入唔到英國大學讀 Master,又喺英國搵唔到工嘅話,佢就要執埋包袱返歸香港架啦。」
「你唔肯 Long D?」
「Long D?咪講笑啦,我喺英國佢向香港 — — 冇可能架啦。我直頭兜口兜面噉樣同佢講。如果佢留唔到喺英國噉我哋就冇架喇。點 Long D 嗟大佬?」
「你可以返香港架唔係咩?」
「返香港?」將軍非常詫異,跟住就「劇」一聲笑咗下。「返香港?屌,唔好講笑啦!返香港?返香港托柒咩?返香港有咩好?我可以有咩前途?可以有咩作為?香港都冇我鍾意嘅嗰啲野。淨係得啲濕鳩基建工程。唔通我真係卑躬屈膝噉去地鐵到打工咩?大佬呀,我想玩 fusion 啊!想玩核聚變呀!香港邊有呢家野架?返到去咪姐係我要放棄晒我全部嘅夢想同計劃?冇 career 架喇喎。唔使玩架啦喎。淨係幫班仆街砌條地鐵出來砌條橋出黎,跟住印印腳逗人工噉話喇喎?人哋可能啃得落呢家野啦,但係我就一定冇得謦架啦。留係英國嘅話,至少我可以有選擇吖,就算英國冇野好搞,我仲可以去歐洲大陸睇下有咩搞作啊。點樣都唔會好似要喺香港度坐喺度虛度光陰等蓲[24]菇。」
「唔。」其實好有道理。好簡單嘅道理。家下有能力嘅香港有邊一個唔想移民啊~有邊一個唔想展翅高飛,躝屍趷路?走得嚤,冇鼻哥。
將軍之後又再嘆咗句:「如果要我自己一個喺英國,冇人冇物孤零零一個人[25],你叫我點過日晨呀?」
噉又係。嗰種長夜空虛枕冷夜半泣嘅孤單,嗰種嘅孤獨,白龍當然知曉。粵語裏面似乎冇好嘅詞彙去分別正面可享同各種使人發狂嘅「孤獨」。英文就有 alone 同 lonely — — 「一個人」(「欣」)唔同「一個人」(「仁」)。前者嘅嗰個 alone 固之然係「一個『仁』」,但係「一個『欣』」唔單止係 alone,而更加係 lonely — — 係孤身隻影,孤身隻影面對蒼天鴻海,大千世界。「身於孤獨,孤者噬己渡日」[26]。白龍當然明白將軍所驚所怕嘅係乜野。令佢詫異嘅係,佢從來都冇諗過好似將軍噉嘅人都會怕呢啲噉嘅野。
「我唔想分開架。」
白龍都唔知講咩好。「你唔可以喺出面搵過另改一個咩?」佢知佢講呢句好大吉利是而且都幾仆街,不過大吉利是同仆街都係噉話:「阿將軍你咪話我話啊,你噉嘅資質喺出面啲囡排住隊黎畀你溝啦。」
「哎呀白龍你明唔明呀,我唔係想溝女呀 — — 」
「噉你而家依件點計先?」
「依件落黎玩架姐,我真正想要嘅,係有人陪呀。」
原來係噉。白龍頓時真係覺得好羞恥 — — 點解咁簡單,普天一致放諸四海皆適宜嘅人之常情,白龍會 — — 唔係諗唔到,而係會覺得麥花臣金將軍唔追求呢啲野而淨係想要艷麗女色呢?唔理解。。。
「唉,我明嘅我又何嘗唔係呢。」
「咪就係囉,如果我撇,就噉丼低史提芬妮去搵另外一個,姑勿論我可唔可以真係放得低呢段感情呀,我覺得喺出面唔會搵到另外一個囉。」
「點會呀?」
「噉我都讀 master 囉,喺香港落英國度讀書嘅人已經數量有限架啦 — — 我 — — 點講呢。。。?」
「你想講 — — ?」
「你明唔明呀 — — 」
「你嘅意思喺英國讀書嘅香港人裏面同你興趣吻合嘅得好少?」
「Exactly 呀白龍。」金將軍佢開咗佢樽可樂細細啖飲咗啖。「唔係話鬼妹唔得,但係你明唔明呀,佢哋唔識廣東話架嘛!唔通我搵條女跟住我成世淨係講英文咩?而且我係要搵人陪呀,都要可以配合到我個啲古靈精怪嘅嗜好先得架。我女朋友一定要陪到我去挑戰曠野,隻身去蘇格蘭爬山,唔怕喺荒山野嶺度紮營,唔驚夜媽媽喺大霧之中摷地方紮營然之後喺第二朝先發現完來係瞓咗喺懸崖邊。。。要肯陪我去巴黎瞓街,去食蓮,養甲蟲,去。。。」
「哦 — — 」
「你話喇,我咁鬼多古靈精怪嘅嗜好,唔好問可以喺邊樹搵到個會鍾意嘅女仔啦,搵到個忍得到頂得順嘅就已經難架喇,尤其是係啲港女。。。要我重新搵過,咪姐係要我海底撈月?」
「噉呢個莉麗絲呢?」
嗰件嘅野。
「莉麗絲?唔得架喇,冇可能架妖。」
「點解?因為佢讀城大?」
「唔係~我唔介意佢讀城大呀 — — 喂!佢今日先同我講佢係倫敦收到兩個律師樓嘅 Intern[27] 嘅 Offer [28] — — 有成四千鎊月薪添喎。我牛津 N 展仔出黎返到香港都冇呢個銀碼呀!」
「話,睇唔出佢都有啲料喎。噉點解唔要得姐?」
「屌!佢係處黎架!」
「吓,你有某種反處女、抗處女情意結?」
「屌!佢係處,兼且佢仲有仔架!」
白龍即刻打咗個突,「哇,噉搞法,噉真係唔搞得喎!屌都唔屌得喎!」
「係呀,所以呢,我同佢去倫敦都係去散下心架咋。」
「但係如果話佢冇仔呢?噉又點計?」
麥花臣金將軍佢沉思咗一陣間,然之後就話:「都係唔會囉,呢個莉麗絲,佢 — — 佢太細個喇,冇史提芬妮嘅嗰種成熟。」
「噉又係,我睇史提芬妮睇黎眉頭眼額就即刻知你心諗口未噏想要嘅野係咩。未開口就已經衣來將手飯來張手。佢氹得你好點囉 — — 」
「乜係咩?我都唔覺意。」
「唉,你呢的吊兒郎當慣,俾人服侍慣,歎慣晒嘅,點會知喺服侍一方嘅思緒呢?你話史提芬妮箍得你死,其實佢氹得你咁掂,照顧服侍得你咁舒服,都係同一樣嘅道理姐。氹你服侍你係留住你個心,箍住你芒住你係為咗留住你個身。」
「噉咪係囉 — — 你都見到啦,我講咁多野發咁多牢騷,我個心好明顯想丼低佢都丼唔得低啦,佢箍我身都唔會改變到啲咩架,只不過會搞到我周身唔聚財,盞我想甩難出去滾。。。搞咁多黎做咩呀~?」
之後佢哋兩個靜咗落黎,冇講野亦冇發聲。麥花臣金將軍手揸住個煙斗,對埋嘴,有少少𡁻下𡁻下個吸嘴嘅個位。將軍抬頭遙望個白雪雪嘅月亮。佢個具有白皙美顏嘅靚仔樣係左邊由天而降嘅銀光同右邊枝納尼亞式街燈所發出嘅金黃燈色下雙重照耀,將佢個樣一分為二 — — 好似一個人有兩個樣噉:一張上帝畀嘅面,一張自己畀自己嘅面。天賦之面,與人為之臉。同一個空間,重疊嘅存在。白龍都唔明點解將軍佢食埋晒啲垃雜野同埋啲雜不棱嘅野,塊面仲可以篋[29]得咁好。
「唉我唔知呀。」
「你唔知咩吖。」
「我諗我都係會撇架喇。」
「噉點解你仲未做?係咩阻止住你?」
將軍諗咗陣,跟住就答話:「我都仲係鍾意史提芬妮呀。」
「唔。」
「始終行埋咗一齊咁多年,實在太多回憶喇。我走嘅話我諗長遠而言我都仲可以可以 get over it,但係我唔想 hurt[30] 佢呀白龍 — — 我唔想咁仆街喺佢最 vulnerable 嘅一刻一手揈開佢唔理呀。佢會好 hurt 架。」
白龍飲咗啖可樂,跟住欷歔不已噉撻咗句:「啊將軍,天下間嘅男人都係仆街黎架啦。但係如果你問我嘅話,我都真係覺得你已經好好架啦。出去偷食呢樣野實在講唔到去邊,但係你至少係真心,係真心心地好。世間上仲好似你咁仲有少少心地有少少情義嘅男人,睇怕真係買少見少。你份人實在真係太善良,善良得有少少傻。」
「冇計啦,份人係噉有咩辦法?但係我真係唔想 hurt 佢囉,但係同佢係埋一齊又日日痛苦,仲要越黎越惹我擔憂。。」
「你動晒真情囉。」
「唉,犯賤。」
呢樹唔似香港。香港嘅夏天嘅戶外往往蟬聲氾濫,而且蚊蠅亂飛。呢度好靜,除咗佢哋兩個嘅粵語之外,就咩鳥蟲聲都冇。
「我唔想咁仆街係最需要人支持嘅難關度丼低佢,而且佢出身已經唔好架啦,長大嘅路途幾咁一波三折,幾咁 fucked up 架啦。佢條命生得唔好,我冇理由再潤多佢一腳架嘛。」
「其實老實講吖白龍 — — 」將軍食咗啖煙,嘴度呼出一束高速緊張充滿愁緒嘅白煙出黎。「我哋呢個圈子呢 — — 」
「呢個圈子?」白龍問。
「姐係我哋呢啲 — — 呢啲 — — 呢啲 — — 」
「呢啲懶係 intellectual、懶係知識份子、懶係不食人間煙火但又扮到滿腔見識道理、懶係時不與我懷才不遇嘅偽思哲份子?」
「啊係啊係啊,叫咩都好啦,總之我哋呢班人呢 — — 就淨係得徐玄滬 佢一個係完整無缺,其他人一個二個嘅屋企都係亂七八糟 fucked up 架啦。」
支離破碎,花呢花碌,劃花晒,總之就係搞到亂哂坑啦。
「阿白龍你就更加唔使講啦。」將軍佢望住白龍噉講。白龍就答佢:「我?我 OK 啦,仲算掂嘅~」仲得。
「噉你呢將軍?」
「我?」
「係呀,將軍。其實我都唔知你屋企點嘅。」
「我?我屋企都好 fucked up 架。」
「吓?唔係呀嘛?」
「係呀,呃你做咩嗟。」
「我仲以為你屋企小康之家,溫馨快樂添。」
「唔係架,屋企都立立亂架。」
「真係未聽過你講。」
「噉又未至於到家破人亡嘅地步嘅,亦唔似嗰啲住公屋日日家嘈屋閉嘅,但係都唔係話美滿囉。」
[1] Friend 一詞,已經完全完成粵詞化過程,粵音基本上為 feng1,方井切陰平,意思無異於其英語詞本義。例句:「佢係我個 friend。」「我同佢咁 friend,佢實應承嘅!」「你呢個創業建議咪姐係網購啲 friend?」可考慮賜字,然未見合適者。
[2] 亾,讀 he 3,去旡切陰去。意思豐富,《粵典》列「亾」有四解:一、敷衍、不認真、交行貨;二、無所事事,漫無目的地打發時間;三、求其、不認真、馬虎、得過且過;四、形容事情缺乏挑戰性,可以輕鬆完成。例句:「佢做野不嬲都係咁亾。」「我而家日日淨係喺屋企亾。」「份報告亾俾佢咪算囉。」「個測驗超亾,冇溫書都實合格。」「例句坊間俗寫有「hea」、「迤」、「迆」等,最為普遍這為「hea」。茲取《學苑》中《提升香港話地位 — — 剝脫既定思想賦予口語詞彙書面寫法》一文之建議,取「亾」為其字。「亾」本為「亡」之異體字,但已乃死字一個。該文建議取「亾」為「hea」之賜字,是因為「亾」像一人躺臥在床上百無聊賴之形。茲實乃「形借」之為。「形借」類似「假借」,都是把已有之字重新註釋,注入新用法的技巧。「假借」借音借形不借義,「形借」則借形不借義,或借或不借音。形借字數量很少,基本上都只存在於網上語言,最為人知的例子莫過於「出獄」意思的「出冊」的「冊」。這裏的「冊」,意思不是「書冊」,而是取「冊」像監獄鐵欄之形,繼而從新註釋「冊」為監獄。斯「冊」借形借音不借義,而我們的「亾」則借形而義音均不借。其他的頗為流行的形借字包括「囧」、「厹」等等。
[3] 見37號註。
[4] Feel 一詞,已經落入香港粵語之中,已經完全完成粵詞化過程。粵化讀音為 fiu1,方夭切陰平,意思基本聲與英語詞一樣,解「感覺」,可作動詞或名詞用。例句:「情人節喺呢間餐廳食飯勁有㤇。」「我食完嗰嚿壽司唔係好好㤇。」建議可挪用「懊」之古異體字(已死)「㤇」作其書寫字。
[5] sor ,so1,厶左切陰平。源自英語道歉詞「sorry」,粵詞化後演變為「sor」。俗寫為「sor」,但亦有「梳」。建議假借「梳」處理之。
[6]這裏討論一下「嗟姐啫」之難。粵語有兩個發音非常相似的語氣助詞:一為 ze1,止旡切陰平,有表示「而已」之意,同「咋嘛」,一般寫作「姐」;二為 zek1,止尺切陰入,不耐煩語氣,一般寫作「啫」。兩者都有已定的不耐煩語氣,但「啫」較「姐」語氣為重。「嗟」讀ze1,最初一般為嘆詞,意思是表示憂感。後一般用來泛指帶有侮辱性的施捨,如「嗟來之食」。斯文有大量例子,不在茲費章陳列。有意見認為粵語「姐」本字為「嗟」。竊以為,「嗟」的本義的確跟粵語的語氣助詞類似,不難看出可能曾經存在的 詞義的延伸關係,但「嗟」的負面語氣性過重,過於「姐」所有者。但始終「嗟」的奠雅性非常強,不應放棄此提升粵語優雅性的機會。所以即使「嗟」不同「zek1」,都以「嗟」代替「啫」。「姐」則保留。
[7] 撀,seng1,厶井切陰平,與「腥」同音,來自英語「Send」,已經完全完成粵詞化過程,其意思無異於其英語詞。例句:「你撀個快勞過黎。」「我撀你去外國讀書係想你可以見見世面,唔係想你學壞架!」取「撀」,皆因其形聲字身分。以「殸」為聲符的字數量頗多,有「聲」、「馨」、「罄」、「㷫」、「謦」等。「聲」有文白二讀,斯取其白讀以詮釋「撀」之「殸」。「撀」粵語本音不詳,本義為「取牛羊乳」,死字。
[8] 㩄,saai1,厶介切陰平,解作「浪費」。例詞有「㩄錢」、「㩄氣」、「㩄時間」、「㩄野」、「㩄野食」、「㩄心機」、「㩄晒」、「大㩄」等等。坊間一般寫作「嘥」。「㩄」本義解「散失」。詹憲慈在《廣州語本字》有云:「㩄澌者,散失盡也。俗謂㩄若北語之篩。《集韻》㩄,散失也。山皆切,或寫㩄作嘥,非是,字書無嘥字。」放棄民間「嘥」的這個半共識用字,主要是因為其字乃擬聲字,而擬聲字一般除了擔任擬聲一職之外,於漢字體系裏都視之為難登大雅之堂之堂之字,故不取。
[9] 嶣,coe 2,此朶切陰上,俗寫為「chur」,中心意思為「極度消耗能量、資源」,次意思用法眾多多樣,茲不詳列。例句:「讀大學就一定要嶣到盡。 」「你等我嶣掂兩份報告先。」「條女成日嶣住晒,想清靜一下都難。」取「嶣」為「chur」之賜字,是考慮到「崔」與「chur」音近,尚可論作聲符。取「火」部,是因為「chur」之行為與火之「消耗能量」類似。「嶣」粵語本音不詳。粵語中韻母為 oe 朶者的字數量不多,更沒有以此為韻母適合擔任聲符的字,故此必須訓讀解決。「嶣」乃「嶕」之異體字,死字也。在此順便討論一下一個不太相關的問題。如上所道,粵語中韻母為 oe 朶者的字數量不多,但其實口語中粵語中韻母為 oe 朶者的口語詞是為數不少的,譬如:「唔 gur」的「gur」,「跌 dur」的「dur」,「阿 sir」的「sir」等。有一些則有一些值得商榷的賜字,如「噓爆佢」的「噓」,「瀡滑梯」的「瀡」。這一系列的口語詞若然要字書化,因為沒有相對應聲符而缺乏適合的形聲字將會是一大難題。
[10] 這裏牽涉非常龐大的字選問題,必須釐清且訂立規範,以除紊亂。我們先處理「丼」。丼, dam2,大甘切陰上。基本意思為「用手拋掉」、「摒棄」。「丼」有大量的派生詞和用法,如:「丼垃圾」、「丼低」、「靚到丼一聲」等。或許大部分人對「丼」的理解離不開日式料理中的「丼飯」。此「丼」讀 dong1,大王切陰平,和製或和用漢字,其造字或用字原理茲不詳議,總之同字異用。《說文解字》認為「丼」是「井」的異體字。後世的文字學則有不同的見解。《集韻》中認為:「丼,投物井中聲。」近代的甲骨文研究則認為「丼」實為甲骨文 「丹」字,因為丹砂在上古時期是鑿井所篩選出來的,所以這個字是個指事字,在井中的一點,就像徵著丹砂。這裏我們取了的是《集韻》的見解,與我們的用法相符。有人以「沊」代「丼」寫。我認為「沊」美感絕不及「丼」,故不取用。
坊間有用「揼」、「抌」等來代替以上的「丼」。茲將討論為何不妥,並提出其適宜之用法。
揼,dap6,大及切陽入。這個顯然是會意字,但這個幫助不了太多。揼,按其讀音應解做「握緊拳頭擊打」之意,其意可見於寫「包剪揼」一詞時往往只用「揼」而不用其他字。 其衍生和派生詞包括「揼佢」、「揼骨」、「揼 code」、「揼 proposal」、「揼 paper」、「揼紙」等。
抌,dam2,大甘切陰上,與「丼」同音,故此常常混淆使用。但「抌」之意乃「深擊」、「刺」、「手摶」。《說文解字》對「抌」亦解作「深擊也」。故此,不可代替「丼」,其衍生詞包括「抌心口」、「抌心抌肺」、「抌印」等等。坊間有用「抌」於「dam6 波鐘 」、「dam6 時間」等詞中。竊以為誤矣,應該用且訓讀(異讀)「耽」處理,亦即將其寫作為「耽波鐘 」、「耽時間」。坊間亦有將「抌」與「dam3 落黎」之「dam3」互用。斯不可取也。此「dam3」有「下垂」之意,顯然與「抌」無關。此「dam3」應用「髧」,事關其「髟」部將其字與頭髮掛上概念關係,勾起長頭髮下垂之景象,非常恰當。「髧」之用法包括「霉髧墮」、「霉當髧」、「將啲頭髮髧落黎」等。
[11] Like 之粵音化。 Like 這個詞在粵詞化的過程中衍生了兩種粵語對應。兩者雖然同源,但在粵語中的用法和發音都幾乎毫不相關。Like 的第一個粵化生成詞,讀做 lai1,力兮切陰平。以此音存在的「like」相信是比較近期才出現,其用法有:「俾個 like 我啦!」「佢成日舖埋晒啲呃 like 嘅野。」而第二個粵化生成詞,則把「like」這一個在英語為單音節的詞分拆為兩個音節,讀為 lai1 ki1,力兮切陰平,其儿切陰平。此用法較為悠久,例句有「波士唔 lai1 ki1!」這兩個分別都是 like 的粵化生成詞,理應不該二合為一只以一個方案來字書化,反而應該採納兩個分開的字書化方案,各賜其字。
[12] 哀,ngaai1,兀兮切陰平,解「哀求」、「祈求」。例句:「我哀你啦,返黎屋企啦!」「你點樣哀佢都冇用架啦。」本字應該乃「哀」,音異的現象也許是因為為了區別動詞名詞而演變而成。坊間有以「翳」書之的俗寫習慣,如「翳親加薪塊面挪起惡睇。」(《半斤八兩》)愚見以為,此俗寫不可取。
[13] 「戇鳩」一詞,無不曉粵語者不懂之詞也,更可謂無不曉粵語者不好用之詞也。其詞鏗鏘有力、用途靈活柔軟,且有大量衍生詞。然而,其「鳩」之選字,內含一大選字難題。眾所周知,粵語中最為粗鄙之穢詞,乃「屌」、「鳩」、「撚」、「柒」、「閪」 — — 茲以其最為普遍之俗寫呈現之。我們在此姑且先竊稱這五口語詞為「五穢」,並以以上的次序編排,以方便討論。「五穢」雖然有以上的俗寫,但其實有另外兩套的寫法。兩套寫法比以上的「五穢」俗寫來得有系統和字型設計上的邏輯性和互相關聯性。第一組寫法,均建於「尸」字部,分別為:屌、尻(又作㞗)、外尸內粦、杘、屄。我們姑且稱這一組以「尸」為首的「五穢」為「尸部五穢」。另外一組寫法則建於「門」字傍,有「一門五傑」、「門氏五虎將」之稱呼,有收錄於《康熙字典》中,分別為:𨳒、𨳊、𨶙、𨳍、閪。顯然,「尸部五穢」一組字的內部完整性絕對不及「一門五傑」。「尸部五穢」有成員缺乏電腦字符,且有些是形聲字有些是會意字而有成員則好像什麼都不是(杘)。相比起來,「一門五傑」清一色形聲字,有條理且察而見意,明顯勝於「尸部五穢」。有見及此,理論上如果要為「五穢」賜字的話,「一門五傑」必定為首選,甚至絕對優勝於現時採用的俗寫。然而,愚見以為,雖然粵語字書化的過程必須梳理其文字,甚至要反其約定俗成的共識以達到其他更重要的目的,在「五穢」的選字問題上,卻不宜修改,不宜摒棄俗寫而採納「一門五傑」。原因是因為「五穢」的俗寫實在太過根深蒂固,已經深入民心,其共識已經非常堅強鞏固,幾乎強如「佢」字所享有的共識。面對這樣堅固明顯的共識,為求一滿某種虛無縹緲的美感主義,實在說不過去。再且,「五穢」已經衍生了大量的衍生詞,而有好一部分的衍生儘管仍然是髒話穢語,實在有不少是有龐大和活生生的政治和社區文化力量的。譬如「女權撚」、「耶撚」、「環保撚」等中的「撚」,已經成為了一個獨立和具有非一般生命力的語素。若然把俗寫推倒重來,恐怕只會嚴重干擾自然的語言發展,得不償失。
[14] 「使」在粵語是一個非常重要的詞,有文白異讀。文讀為 si2,厶儿切陰上,白讀則為 sai2,厶兮切陰上。「使」文讀時解「使得」、「導致」,白讀時解「指使」、「命令」、「使用」。後者用法例句:「錢應使得使,唔好亂咁揈。」「有錢使得鬼推磨。」「佢真係使人唔使本架。」「去歐洲旅行就預咗使錢架啦。」「呢啲咁顯淺嘅道理使鬼你講!」由此可見粵語非常活用此詞。坊間的俗寫卻沒有太穩定的共識,且不太熱衷使用「使」字書寫其音。一般有以下按情況而變異的寫法。每當「sai2」是配上「錢」時,就會多用「洗」字,這使得「洗黑錢」一詞語帶相關。而在其他情況,當語文明顯是粵語時,則多用「駛」。這個現象可能是因為粵語人,尤其是香港人,感覺由於「使」字在白言文中地位重要,要不是覺得粵語以「使」寫「sai2」 就有挪用之嫌,就是覺得「使」、「sai2」根本不是同一個字的文白異讀。這是可以理解的,因為當我們以「使」寫「sai2」時,不論朗讀心讀也會有猶疑,但如果用「駛」寫「sai2」則清楚明白,沒讀錯或傳遞意思不清之尷尬了。竊以為,粵語處理斯問題,「洗」可以不作考慮,而盡量推行「使」,再看看大眾閱讀反應如何。如果仍然長期出現分不清的問題,猶如普通話語群長期有好一部份用家分不清「的」、「得」、「地」的話,那就無辦法,唯有放棄較為奠雅的「使」而改用「駛」好了。
[15] 擢,cok3,此乇切中入,俗寫「chok」,解「猛烈搖動以強行得出某物」。例詞有:「擢樣」(解「裝模作樣使得自己顯得異於平常地英俊瀟灑」,一般指男性)、「擢 cheat」、「擢機」。例句:「佢成日影相都擺埋晒啲擢樣架。」「你再擢佢都係冇用架啦,佢點樣都係唔會同你講。」「你唔好擢細路仔呀!因住擢親條頸呀!」《說文解字》指「擢,引也。」《方言》則曰:「擢,拔也。」《小爾雅》亦曰「拔根曰擢」。基本上與當今「擢」的使用意思大同小異,故此認為採用適合。
[16] 俍,leong1,力丈切陰平。「老土」、「過氣」、「缺乏美感」之意,一般用於形容他人衣著打扮,或事物的外表形態及其裝飾等。用例:「佢著衫勁俍囉。」「個新建成嘅市政大樓嘅樣好俍呀。「俍」本義為「善於,擅長」,又解作「行走緩慢」,本音為「loeng4」,除了曾於古書和部分生僻詞中使用之外,基本上非常用漢字。採納「俍」是因為「俍」乃形聲字,且「俍」本用於形容他人衣著,故適合。
[17] 捩,有兩讀音,這裏讀 lai2,力兮切陰上。「捩」有三個意思:一、拗折,折斷;二、扭轉、擰;三、違逆;不順。組成詞包括「瞓捩頸」、「捩手」、「捩轉」。唐韓愈在其文章《送窮文》亦有「捩手覆羹」一詞,指手一動就把羹倒翻,比喻動輒闖禍。「捩」另外一個讀音為 lit3,力必切中入,如「「轉捩點」。
「捩」和「戾」讀音和意思都相似,在此釐清。「戾」字有多個解釋,基本義為「彎曲」。《說文解字》有以下的解釋:「曲也。從犬出戶下。戾者,身曲戾也。」也就是說,「戾」是個會意字,从户从犬。「戾」解「彎曲」是因為每逢有狗(犬)從室內(户)走出來,其身軀就必然彎曲。引申義又有違背、破裂、暴戾、猛烈、安定、罪行、禍患等。戾,有至少兩讀音。第一個讀音為 leoi6,力句切陽去,例詞有「暴戾」。 第二個則為 lai6,力兮切陽去。粵音讀 lai6 時則乃就「戾」保留最古之字義 — — 「彎曲」,例詞有「戾橫折曲」、「狼戾」、「冤戾」等。
[18] 橫,waang1,禾孟切陰平聲。「搞橫」解釋「叉禍」、「搞亂」,例句可見於近期香港電影開映前所播出的呼籲廣告「成個電影業畀你搞橫晒啦!」(https://www.youtube.com/watch?v=TeAYDLfgICk)坊間有見認為此「橫」應該寫為「黃」。《漢典》指「黃」有「垮掉,壞了事」的意思,其例子引自《紅樓夢》:「薛蟠聽了這話,又怕鬧黃了寶蟾之事,忙又趕來罵秋菱。」坊間又有論指其「本字」為「尪」。取「橫」而不取其他者,主要是因為「橫」粵音與「waang1」音最為近,可視作為異讀。再且,一般而言「橫」與「直」在本義和延伸義上都相對。「直」為褒,「橫」為貶;「直」為好,「橫」為不良。故此「橫」有「兇暴,不講理」的延伸意思,可以配詞作「蠻橫」、「強橫」、「橫暴」、「橫蠻」。「橫」又有「意外的,不尋常的」的意思,故此有「橫財」、「橫禍」、「橫事」、「橫死」等衍生詞。取「橫」為「waang1」,就是巧取此義。
[19] 撩棱,liu1 lang1,力夭切陰平,力生切陰平,用作形容事情或事物稀奇古怪刁鑽,極度專門難曉。例句:「佢博士論文所覆蓋嘅,係啲特別撩棱嘅代數拓撲學,淨係得好少人睇得明。」「安德魯.懷爾斯嘅『費馬最後定理』嘅証明相當之撩棱,所以刊登咗之後都要一段時間先發現原來有甩漏。」「撩棱」俗寫有作「𠮩𠹌」。取「撩棱」,乃因為其字書化方案的用字,可以被詮釋為一個非常符合其詞詞義的意境。 《康熙字典》曰;「殿堂上最高處曰柧棱」,「撩棱」顧名思義便是用手撩屋頂的柧棱,此舉自然十分刁鑽也。
[20] 淢,wek1,禾尺切陰入。解「出去玩」、「出街蒲」之意,特別是指夜晚到煙酒風流之地花天酒地、男歡女愛。例句:「我哋今晚出去老蘭淢個夠!」「淢得多因住傷肝傷腎呀。」wek1 據筆者理解並無所謂之本字,亦不見任何懷疑乃本字的選擇。愚見以為,可自行賜字。與其花費精力做字,不如死字復活,舊字新用,現取「淢」。「淢」乃死字,本義解作「急流」,粵語本音為 wik6。現正舊字新用且訓讀作罷。那取「淢」有沒有任何的內部邏輯和原因呢?理論上,按照傳統的漢字造字賜字理則,wek1 大概會以形聲字字來解決其有音無字的問題。而按照這套邏輯,不論其聲符是什麼,斷估其邊旁必定為「女」字旁。理論上應選用女字旁,無非是因為傳統漢字理則以女為樂,如「娛」、「耍」等。故此若然要承繼此邏輯,wek1 之字書符號理應像「女或」樣子的東西。我認為此案不可取。其一是因為沒有這個電腦字符,其麻煩不抵其得益。但最重要的是,斯字選延續著一種不要得的辱女思維。取「淢」,是有見其字的水字旁。粵語人以水為財,斯理則可屢見於其詞彙措辭,茲不贅述。取「淢」,就是要強調和指出,「出去淢」的這個行為,是要花費很多錢(水)的。
[21] 索,sok1,厶乇切陰入。「索」源自英語「Short」,已經完全完成粵詞化過程,解「思緒混亂錯誤」,意同「黐線」,其成詞邏輯亦同「黐線」。「索」的意思,源自「short circuit」「短路」之意。例句:「佢係咪食藥食到索咗?」「佢都索索地架。」取「索」字,乃假借。斯處有另外一層的問題,宜費章討論討論。粵語中有另外一個讀音相同的「索」,其意思為「性感」,一半俗寫就是「索」,如「佢好索啊!」愚見以為,建議取「䖛」來字書化有「性感」意思的那個「索」,而「索」則留作假借用作為英源粵詞「short」的選字。取「䖛」除了是因為他是形聲字之外,是因為「䖛」的「虎」字偏旁有非常有意思的意符功能。「虎」,將「䖛」的「性感」之意與「老虎 」掛鈎,不但脗合已有的基本詞義,且更引起無窮想像和性遐想。
[22] Club,已經完全粵詞化過程,粵音讀 kap1,企及切陰入,意思跟其英語詞無異,舊時或以「俱樂部」譯之。既然完成了粵詞化過程,理應賜字。搜羅上下,不見合適舊字死字。可考慮造字處理。建議「舍及」,左从舍右从及,舍為意符、及為聲符,形聲字。
[23] 領,茲讀leng2,力井切陰上,茲解「遭受」,例句「我懷疑尋晚扑野領咗野。」「今次考試實領野啦!溫錯書呀!」「今次你仲唔領大鑊?!」「領」字本身有「接受,取得」的意思,粵語的這個用法可以視作為該義項的延伸。
[24] 蓲,ngau3,兀久切陰去,亦有讀作 au3。「蓲」本音為 jau1,又久切,陰平,解「滋生」,一般用來描述植物、真菌、或菌類的自然滋生生長現象。由於一塊物件要非常之沒有動靜,長期處於陰暗環境,方可以滋生和培養出真菌或菌類,故此「蓲」亦比喻上延伸出了一個描述人長期不活動,不事生產的動詞用法。例句:「你再唔擺番啲點心入雪櫃就會開始蓲毛菌架啦。」「一日到黑都唔出街淨係喺屋企蓲,你最好嘅時光就咁浪費晒架啦。」取「蓲」為 ngau3 之字書方案,訓讀為 ngau3。取「蓲」,乃因為基本上其形聲字符合 ngau3,艸字旁符合 ngau3 「生長」之意。
[25]「人」字有兩讀法。最為普遍者莫過於「仁」讀法,但亦有「欣」讀法。譬如小孩遊戲的「捉伊人」的「人」就是讀「欣」。
[26] “In loneliness, the lonely one eats himself; in a crowd, the many eat him.” — Friedrich Nietzsche.
[27] Intern 一詞無後生世侄所不曉,粵詞化過程似乎已經進展了一部分,但顯然未至完成地步。一般粵詞化讀法大概為 in1 toeng2,々千切陰平,天丈切陰上。或許為何未完成粵詞化,是因為使用此詞的群體英文水平高,故此多以語碼轉換的方式來使用此詞。他們語碼轉換時,「intern」一詞以頗為純正的英語讀音保留了他的英文身分,與其身處的粵語句子主體形成了非常明顯的隔膜,導致「intern」一詞得以隔離於其所身處的粵語句子的粵詞化壓力。Intern 一詞的賜字問題是一大難題,因為 toeng2 音,天丈切陰上,完全沒有相對粵字,近音字也難求。我沒有任何聰明的建議字選。
[28] Offer 一詞在當今經濟體系越來越複雜的社會變得越來越重要,任何有為任何職業或學校報名競爭的人士都必然遇過這個詞。然而,在白話文或粵語中,都似乎還是缺乏一個適合的對應詞。這是不理想的。更不方便的是,Offer 一詞還沒有完成粵詞化的過程,而在這個大眾英語能力越來越高的世代,大部分人使用該詞時都是直接使用其英語詞,以語碼轉換的方式來使用,而且因為英語能力高,該詞即使在語碼轉換中也很明顯和一貫地保留著自己的英語身分。這一系列的音素導致缺乏把 offer 一詞粵音化(繼而粵詞化)的語言壓力,最終造成該詞不成功的粵詞化,儘管該詞在當今粵語使用頻率實在不低。愚見以為,斯況不良,不宜容許長久存在,其解決方法大概有二,宜雙管齊下。第一個解決方法,就是自行造詞,以意譯把問題解決,創造一個意思相同於或相若於 offer 的粵詞。第二個方法,就是強行完成其粵音化,繼而完成其粵詞化。這意味我們要強行為 offer 一詞配上讀音相似的粵字,以音譯解決問題。
[29] 篋,kip1,企圼切陰入。英源詞,本為「keep」,已經完全完成了粵詞化過程,意思同其英語詞一模一樣。例句:「哇,冇見你一排,仲篋得好好喎。」「你幫我篋住呢個秘密啊!」「篋住聯絡啦!」「篋」一詞,已經於粵語落地生根,有頗多的衍生詞。賜字選「篋」,雖然「篋」本音 gip1,公圼設,陰入,但讀音相近,無傷大雅。再者,假借「篋」來字書化「keep」,有某種語帶相關的妙趣。「篋」本義為「箱子」等的物體,如「旅行篋」等。以「篋」代「keep」,可以是視「篋」的意義延伸,把「keep」的這個動作與「放置於箱子」的行為掛鉤。
[30] Hurt,hoet1,或 heok1。粵語中沒有 oet 這個韻母,但基本上改讀 oek 亦不見阻礙理解,亦有人如此發音。heok1,去勺切陰入。詞義同英語一樣,已經完成粵詞化過程。例句:「喂,搵食姐,唔使咁樣 hurt 我吖嘛?」(《食神》)「除夕先黎分手,好 hurt 架。」本人無任何賜字字選的高見。