為反而反

自從近日傳媒、泛民連續揭發渣中綫呢啲民生事件後,港鐵、港府、建制嘅前後反應的確令我感慨良多。更令我深明咩叫逐漸變黑又得,立即變黑又得,得咗嘅深層意義。總之,任何非建制提出嘅一切問題,建制派都會立即將佢視為‘政治事件’。我十分之同意杜汶澤嘅論點,有啲問題根本就係民生問題,你何苦要成日政治化咗佢呢?民生者,市民之生活也。而渣中綫問題更勁,佢已經將市民之生活提升到市民之生命喇大佬,點解當初話要徹查時你班粉皮可以大模廝樣咁話冇事呢?係咪當非建制一提出問題時你班友就要反對呢?


講真,可能人大咗,人識得多咗,但凡呢刻有啲成就嘅朋友全部都會向建制靠攏。事實上喺香港生活下下以錢行先,以香港人出名靈活醒目嘅特性,呢點實在無可厚非。但係有時靠還靠,良心都要有嘛。如果日後有啲咩死人冧樓嘅大單嘢發生咗,追究喺上嚟,就真係千古罪人呀。為一時嘅光明而名留青史,我實在冇咁嘅勇氣囉。