余該隱 Cain Yu
Sep 4, 2018 · 7 min read

響指聲,提示我異常狹窄嘅升降機到咗底層。𨋢門慢慢打開,暖笠笠嘅黃光由門縫滲透到外邊。

前方無盡嘅黑暗,將光吞噬,依稀睇得到面前係一座迷宮,十步之遙已經係三岔路口。

「我而家應該行去邊呀?」我將頭套式通話裝置嘅咪按到嘴唇邊,壓低聲音問。

耳機傳嚟領航者安隱悅耳嘅聲音:「我好相信你嘅能力,畀啲信心自己啦。」

我喺心咒罵一句,模稜兩可嘅指導,有乜用啫?

原來迷宮唔係用草牆建成,亦唔係鐵壁,而係玻璃,所有嘅障礙我都睇得穿。

左邊嘅通道最闊落,但迂回曲折,我嘅視線順住通道而行,不斷轉彎,直到頭暈眼花,蕩失埋路。右邊通道嘅天花只有另外兩條路一半咁高,我要彎住腰行,雖然係大直路,但越嚟越窄,或者會喺終點前,將我壓扁。

中間嘅路,睇清楚啲,只係兩條通道之間嘅空隙。

「睇實頭套嘅燈,佢會顯示正確嘅路徑。」

一束黃色雷射燈光指示我行中間道,雖然我知道左邊條路最穩陣。

頭燈忽明忽暗,我唔敢起步。

冰冷嘅地板腐蝕我對鞋,寒意滲入我腳板底,冰蛇好似喺我小腿嘅肌肉裡面亂鑽噉,我蹬直腳趾,兩邊膝頭哥互相碰撞。

「你要相信自己,相信前面嘅路,行得通。」平靜嘅指令移開我注意力。

我好似一個對腳裝咗履帶嘅機械人,指示燈就係我嘅路軌。

恍恍惚惚,居然真係闖得過迷宮。

「你知道你可以跨過困難,髮膚無損。」

畫面喺黑暗中跳線,忽然嚟到「洞」。

唔係山洞或者任何形式嘅洞穴,眼前只係一片黑暗,但我知道喺嗰條睇唔見嘅分界線之外,就係更深沉嘅領域。冇常規、冇道理嘅域,未需要去得太遠。

我只需要制伏即將出現嘅嘢。

「你好勇敢,無論面對乜嘢危機,你都會以正面、積極同樂觀嘅心態面對挑戰。」

冰蛇已經喺我嘅雙腿之內,鑽咗一層層鐵片。我半身僵硬。

我懷疑,地底而嚟嘅蛇,想用無止無盡嘅身體,扯住我墜落。

領航者注意到我嘅異樣,作出臨時指令:「你覺得好輕鬆,深呼吸十下,所有負面嘅情緒就會隨住你呼氣而離開身體。放鬆全身,每次吸氣都吸入宇宙嘅能量。第一次……」

但躁動好似壓制唔住嘅日出,繼續由雙腿向我上半身蔓延。

我不由自主,收緊半身肌肉,似乎想由內部,將飄渺嘅不安揪出嚟,即使不安如同滴入一盤清水入面嘅墨水,一早已經挽回唔到。

「第十次深呼吸,係時候喇,你會見到目標。」

忽然,一個六歲嘅細路女由「洞」走出嚟,但無論我點瞇眼,佢都係面目模糊。

佢喊緊,係嗰種令人揪心,又冇辦法遏止,高分貝、低頻率嘅喊聲。

二十八歲嘅我,喺佢面前就好似巨人一樣,但我唔覺得,我比佢堅強。

聽佢嚎哭,就好似搣開咗傷口上嘅痂,再次能夠安撫之前觸碰唔到嘅傷口。

「佢就係導致你生活立立亂嘅源頭,令佢停止哭泣。」

「但係……」我想反駁,但身體已經自動開工。

我拎出一卷膠紙,先綁起細路女嘅手腳,然後再封起佢個嘴,佢一啲掙扎都冇,或者佢留咗喺自己嘅世界度。

誇張大滴嘅眼淚滑過膠紙,落到佢腳邊,如冰一樣透明,莫非我腳下嘅冰蛇同佢一脈相連?

「你可以克服悲傷,以後會繼續開開心心生活……」

聽住領航者種下最重要嘅暗示,蛇身突然強烈收縮,勒緊我全身,我呼吸困難,原地抽搐,失去控制。

最後一眼,我見到細路女嘅眼淚已經沾濕膠紙,膠紙「刷」一聲剝落,如一頁被撕走嘅日曆,輕輕飄到地面。

日復日,日曆早就堆成重重一座山。

領航者見勢色唔對,開始快速帶我番嚟現實,「由十數到一……」

擘大眼,四周昏黃,幾個燭影喺黑牆上晃動,手機播放淅瀝雨聲,環境係過份柔和嘅擁抱,試圖將我全身壓制於軟床之上。

「連催眠都唔得,點算呀?」我喺床上焦躁如火,扭動四肢,腳趾收緊,抓到床單巢掹掹,露出一角發黃帶跡嘅床墊。

催眠治療師翻開催眠書,檢討呢次失敗,睇嚟一啲都唔專業。

佢沉默,到底係懷疑自己嘅能力,定係沉思緊辦法呢?

佢撳熄雨聲,手機時間顯示啱啱到咗凌晨。

「或者下次用海浪聲。」佢謹慎回答。

「半夜嘅海邊,會凍。」

「雨降下,流入海,蒸發成雲,生命嘅過程循環不止。」佢把聲依然保持溫度,彷彿仲未停止催眠。

「你意思係有輪迴?」我追問:「天堂唔係比較好咩?」

「你可以選擇相信任何令你安心嘅事。」

我起身,將床單攝番好。

我諗起一個童話故事:女孩著咗一對受詛咒嘅紅舞鞋,被迫無休止噉跳舞。

點解冇人諗到,受詛咒嘅其實係女孩本身?我雙手撳實不規則噉抽搐緊嘅雙腳。

我攰到想從此睡死,但所有感官都裝咗放大加速器,極細微嘅刺激都足以攪拌空中微塵。

就算無風,塵埃都難落定。

呢次密集式嘅催眠治療,係為咗要生存落去。雖然我知道冇呢個療程,生活依然會繼續。

今晚狀態都冇好轉,我合埋眼,呼吸。

「係咪我嘅身體拒絕離開黑暗呀?」

治療師吹熄蠟燭,「只係而家太暗。」

我預計自己會繼續喺極黑嘅時辰扎醒,任晨曦浸沒全身,直到再次窒息。

我討厭徒勞無功,大叫發洩,「吼!」

「噓!嘈到人喇。」治療師變成充滿威嚴嘅教授,呢個先係佢嘅本性。「你休息吓啦,聽日我哋再努力過。」

佢離開,我獨處。

第二朝,我睜眼等到鬧鐘響。

治療師開咗藥方:留喺人群之中。

我聽佢講,嚟到雪櫃一樣嘅辦公室,啱啱印好嘅紙仲有微溫,舊文件發霉嘅味道圍成一個保護網。

我一路開工,細路女嘅眼淚又試沾濕地毯。我一路同同事有傾有笑,細路女嘅喊聲又試誘發頭痛。

我忽然好同情細路女,但佢必須如此,我先可以順利牽扯每一寸肌膚上嘅線,順利通過日間嘅迷宮。

收工,我埋數,今日有十七小笑,六大笑,比尋日進步咗。

往日收工即走嘅我,刻意留低,等埋其他同事。

搭𨋢離開,笑聲令空間焗促起嚟,每層都停低,湧入更加多人,我越嚟越安全,好似水滴回歸海洋一樣。

層層下降,我又闖過迷宮,又見到「洞」。

領航者耳語:「喺你面前,出現一塊鏡,鏡入面,你好快樂噉笑。

「然後,鏡子消失,喺『洞』中行出嚟嘅細路女都笑緊。」

細路女笑得開懷,但我忍唔住望向極黑嘅「洞」,思考哭聲係咪仲喺彼岸迴盪。

我必須相信唔係。

我抱起細路女,哼起搖籃曲,甚至蓋過領航員嘅聲音,同佢一齊沉沉睡去。

我擘大眼已經係清晨,尋晚冇出現撕日曆嘅聲音。

治療師話:「瞓得幾好吖。」

我點點頭。其實瞓得夠唔夠,瞳孔依然會隨住光線擴大縮細。

我睇睇手機,話:「我女友想今晚上嚟陪吓我喎。」

治療師郁吓膊頭,「照舊十一點見啦。」

***

「係咪會幫埋我催眠㗎?」女友攬住我條腰,搶過筷子,將椏住喺煲面嘅我推開,夾起一大撮我煮嘅蕃茄意粉,食到雪雪聲。

我指指治療師留低嘅書,「你自己睇書啦,唔難㗎。」

我伸手要筷子,女友扁嘴投訴:「曳!淨係拎一對筷子,又唔倒落碗度食。」

「慣咗吖嘛。」我笑笑口,直接張嘴搶去女友撮麵,麵太熱,我將麵吐番落煲度。

「咦!核突!」

「幫我吹凍佢吖。」我嗲聲嗲氣,佢一邊嫌棄,一邊吹凍麵,臨餵到我嘴邊,偏偏自己食番,我笑。

我望住蒸氣升起,消散於空中,原來天花板上有一撻撻灰色嘅污跡,熄咗燈,就會睇唔見。

漆黑嘅迷宮,經過一個月,我合埋眼都識得行。只係今次行得比較慢,因為我變成咗細路女。

曾經缺氧嘅氣球,每次過關之後,都會被打入一啖新鮮空氣,載得越多信心,就升得越高。呢個係迷宮嘅意義。

今晚,治療過程好簡短,治療師畀咗一個可以量度情緒嘅儀器我,上面除咗數值,仲有一個按鈕,撳落去,就可以舒緩痛苦,連煲滾咗嘅水都可以瞬間冷卻結冰。

我撳。

眼皮緊閉,淚流不止,好似一個缺少凝血因子嘅人,唔需要廢力搣走傷痂,都能夠不斷流血,直至死去。

洪水將猶如喺井入面嘅我即刻沖番上意識嘅層面。潛意識嘅作用力,殺我一個措手不及。

我狼狽打側瞓,面向牆壁,慢慢用手背手心抹眼淚。

淚,比血更加癡立立,如同喺臉上蓋上一層層水泥,凍結表情。

淚,係藍色嘅。

我試圖想像溫暖嘅陽光將我包圍,然後眼淚就成為橙色。有青草地、大紅花、牽牛花、秋天嘅葉……綠、紅、紫、黃嘅顏料,輪流滿瀉,終於將手背染成混濁嘅畫板。

今日,好努力快樂,有資格喊得耐過平時。

直到耗盡想像力,透明嘅淚水洗刷乾淨一雙手,終於停止。

然後,我轉番身。

女友瞓得好沉,並冇察覺。

我捉住佢隻手,回想催眠書上嘅字句,繼續用治療師嘅聲線,自療:「或者傷口永遠唔會埋口,但你會復原,而家深呼吸……」

(完)

中意我嘅文字,請聽我愛嘅歌。

「我給你全部漢字 都怕少」

林二汶《聊》:https://www.youtube.com/watch?v=-DLscAZM7vE

「可以荒謬 時間瞬間停止醉生夢死 瞬間如一 但誰在心頭」

岑寧兒《盡力呼吸》:https://www.youtube.com/watch?v=Xs6Rw2EcM9o&feature=youtu.be

余該隱 Cain Yu

Written by

寫故│粵配│廣東歌│書寫世界嘅荒謬同美麗,怕人嘅人類觀察者。「用鯨魚浮出水的溫柔 做美好的獸」https://www.facebook.com/cainyu.fade/

Welcome to a place where words matter. On Medium, smart voices and original ideas take center stage - with no ads in sight. Watch
Follow all the topics you care about, and we’ll deliver the best stories for you to your homepage and inbox. Explore
Get unlimited access to the best stories on Medium — and support writers while you’re at it. Just $5/month. Upgrade