認可海外教練資格
經過大半年，我終於拎到英國射箭教練牌，咁艱難當然要記錄一吓個程序。先講結論，我唔建議去轉牌，直接由頭讀去考教練牌應該快好多，因為呢大半年內我射箭嘅箭會已經有一堆人考到牌。同時我亦知道英國唔係所有人都有教練牌先去教人射箭。
搵翻ArcheryGB個網站，成個Recognition of Overseas Coach版面已經唔見咗，剩翻份申請表文件可以search到：
https://archerygb.org/files/Recognition-of-Overseas-Coaches-Nov-21-1.docx
究竟個program仲存唔存在？個program只係前年開始出現，會唔會我係唯一一個成功轉牌嘅香港教練？我真係答唔到。
轉牌有幾項要求，寫得好清晰：
- ArcheryGB會員；
2. 有教練資格，可以係WA會員地區或者其他國際認可資格；
3. 有教學經驗；
4. 要完成英國嘅保護兒童工作坊child protection workshop；
5. 要做criminal background check。
就咁望個要求唔複雜，但做落就會發現每個step都係問題，問題嘅主因同其他大部份問題一樣，係英國人做嘢極慢。其實我2021年已經有問緊AGB認可海外教練程序，2022年3月到咗倫敦一落地就繼續聯絡AGB。
3月18日查詢，第一次有人回覆係4月7日。
喺等緊回覆嘅時候，我就先按要求完成保護兒童工作坊。新申請人有兩個選擇：
https://learning.nspcc.org.uk/training/child-protection-safeguarding-sport
https://www.ukcoaching.org/courses/workshops/safeguarding-protecting-children
前者係3個小時嘅online course，盛惠£25+VAT。後者係面授，盛惠£45+VAT。咁好明顯我係揀前者平啲又唔洗山長水遠去上堂。呢啲course目的唔係想肥人，基本上你上完就唔會話唔識答問題唔合格，而證書喺AGB未有人覆我電郵時已經拎到。
AGB第一次回覆答咗幾樣嘢，第一係我查詢會員係要入屬會定直接入AGB，個答案係「呢單嘢唔係我跟開」，其實就連射波都唔算，因為連forward個問題出去都無，只係直接叫我自己問第二個部門。
第二係話要畀第三方機構做criminal background check，仲話香港係 £53+VAT，但人地第三方機構網站講到明香港無得做，我亦都再次查詢證實。呢個應該類似香港人喺英國搵工有時要無犯罪紀錄證明書 (CNCC)，問題係無得問香港恐怖份子拎，因為CNCC只供入境簽證用途申請。
搞清楚之後就發現criminal background check其實包括係兩件事，第一係Disclosure and Barring Service(DBS) check，呢部份義工教練免費，收錢教練盛惠£46.4。第二件事先係第三方機構無犯罪紀錄證明global check申請，呢個係過去5年居住香港就需要做，我唔清楚佢用咩方法check，不過就可以經AGB做，唔洗自己搵第三方機構，咁都算簡單，課金了事，盛惠£63.6。
洗錢就係咁多，唔計會員費總共£30 + 63.6 = £93.6
做DBS check前需要先入會，入AGB做會員可以係經clubs，可以係經county直接做AGB會員，至少AGB係咁白紙黑字覆我，不過當我去問county時，county就交翻個波轉頭，話未聽過有咁嘅事，唔清楚，叫我自己問AGB。與期睇佢地後場猜波，無謂浪費時間我都係快脆入個club好過。
入會唔需要一定上訓練班，但需要審查，只係基本簡單嘢，睇吓你自己上唔上到弦開弓，識唔識基本安全及訊號指示等。要留意英國普偏唔跟國際賽例訊號，上線開始發射只係混合用一聲哨子代表晒，緊急暫停係會有人大叫FAST而唔係吹亂雞。我係唔習慣嘅，特別係上線發射，上線預備同開始發射分開訊號好處係make sure所有人準備好位置，make sure無人唔小心走出發射線外，同時防止射手習慣一上線未企好唔留意週圍環境就亂咁開始，係建立一個良好程序嘅方法。而大叫FAST亦都唔理想，個個人叫聲大細唔同，而射手線上唯一需要留心嘅係雞聲，唔應該係要分心留意人聲。兩者我都唔習慣亦都覺得唔理想，anyway呢度就係咁做，亦都係入會審查要確保你識嘅嘢。
因為要約時間畀屬會教練審查，所以都可能需要一啲時間，搞掂填表入會之後就係漫長等待AGB做嘢批核會員嘅時間。
我拎到會員証號碼時係6月1日。
完成入會之後就係做global check，申請global check好簡單，只係簡單填表，需要資料只有過往住址（所以其實我唔係太理解佢check乜嘢） ，但由申請DBS check就相對麻煩，AGB有一份ID Form要填表，要搵你個會嘅負責人例如主席、司庫或者秘書等去認證身份証明文件同住址証明，呢個真係睇你好唔好彩，你個會啲負責人易唔易約，係唔係隱形人。我第一次搵人認證文件撞正tube delay，無辦法喺預定時間去到應約，結果又要約多次。
DBS check完成有證書冧把係8月9日。
拎到證書冧把之後有時限，得30日可以申請DBS Update Service，申請同時又要填表另一張update service consent form，咁AGB先可以睇到個DBS check result（明明係經AGB做，又要再填form畀AGB睇） 。同一時間要自行將個child protection workshop證書上載去AGB用嘅會員系統上。
搞掂晒確認晒文件係8用17日。
之後先真正係申請轉教練牌，個波大腳傳咗去教練部門度。
呢個傳波勁過足球小將，傳咗兩個月都未到，直到11月3日之前教練部都無人覆我！真係CLS，途中有追過，但係教練部門個電郵唔接受不明電郵地址發嘅電郵，即係話根本無任何方法可以聯絡到AGB教練負責職員，我係追上手負責DBS職員，負責DBS職員好快手，我每次追完佢都係秒回彈個電郵去教練部，不過教練部就係兩個半月後先做嘢，期間連一次都無覆過我電郵。
最後就係填表Recognition of Overseas Coaches，需要提供海外教練資格證書副本，同埋相關經驗資料例如教學經驗及其他相關資歷等。我本身有keep profolio所以都只係照抄資料過去，而教學經驗亦無話需要我提供證明文件，係唔係個個人一樣就唔清楚。
批出教練資格係11月21日，收到新會員証係12月頭，都算快。完？未完，點解張証同剛剛收到唔夠一個月張新証係一模一樣？上網log-in check吓，發現教練資格係有，不過仲有寫住suspended，話要更新番完成課程資歷。成件事個point就係唔需要上堂可以拎到教練資格，即係無可能會有完成課程資歷。同番AGB講，確認係電腦系統問題，但最終收到証，已經係2023年1月30日。