喺我嘅朋友圈（唔乸係微信嗰個，香港人玩咩微信）入面，冇乜朋友認識法仔。即使係台灣hostel舊同事，對法仔印象都唔深，始終佢哋喺嗰度打工咁長時間，見過嘅鬼佬冇一萬都有幾千。
大家每逢見我提及法仔，都會非常好奇，甚至好多幻想。私下聽過我傾訴嘅，會從我嘅描述中感受到呢個人有幾咁好，陪我慨歎我哋結唔到果。單憑Medium上隻字片語去窺探嘅（你都睇咗兩萬幾字咖喇，但唔睇多幾萬字都唔好妄下判斷），可能未睇到戲肉已經戥我唔抵，覺得法仔四處留情辜負咗我。
法仔喺我心目中唔係一個完美嘅人，但係佢complete咗當時殘缺不全嘅我。我好有信心，倘若我嘅朋友有機會見到法仔真人，每一個人都會鍾意佢、欣賞佢。曾經喺台灣誠品見過一張卡，上面寫住「I am a storm cloud and you are a rainbow」——呢句係我一直都想同法仔講嘅說話。好可惜，我眼中佢嘅優點，反而係佢自己心目中無法擺脫嘅性格缺陷。
久別重逢嗰晚，未到一餐飯嘅時間，我哋已經拖返手。一個鐘之後，我哋甚至旁若無人咁擁吻。
同Aaron、Ray喺彌敦道分道揚鑣後，法仔同我並肩，再次拖住我隻手。
我冇縮手。腦裡面掠過好多畫面，台北一幕幕相處瞬間湧現。
如果你問我，當時點解唔縮手，我唔介意坦白答：因為空虛寂寞凍。「Dry到咁？咁係咪任何人拖你，你都受？」空虛寂寞凍還空虛寂寞凍，我過唔到電嘅，條件再正、人品再好，都唔會埋到我身。我嘅天然氣場令人企近兩步都未必夠膽，敢拍我膊頭都當你贏；friendzone人我都有一手。我受嘅，或者只有佢。
法仔拖住我，步入iSQUARE，直上30樓Eyebar。
我哋面對面坐喺Eyebar戶外嘅高檯，唔識飲酒嘅我隨便點咗杯cocktail。法仔有個習慣：同我出去食飯等上菜嘅時候，會將手托喺檯面，然後向我攤開手掌，做出一個邀舞咁嘅手勢，示意我俾隻手佢。我習慣佢呢一個習慣，由Eyebar開始。
法仔捉住我隻手，遠眺維港。佢比我更熟悉香港嘅skyscraper，特別係有skybar嗰堆。「見唔見到嗰座？Ritz-Carlton嘅Ozone Bar，118樓，高過我哋好多。好靚，不過好貴，貴—到—你—死—呀。」
「～到你死」係法仔style廣東話常見語句之一，「熱到你死」、「攰到你死」、「煩到你死」、「好食到你死」、「難食到你死」…講嘅時候會摵眉chok聲，唔知點解永遠都係人死唔係佢死。
「巴黎有間好出名嘅酒店叫Le Ritz…都係Ritz。」我整鬼佢：「大酒店？」「嗯，大酒店。」我忍唔住笑出嚟：「玩你咋，你自己查下『大酒店』嘅意思？」我喺手機打開朋友搞嘅《粵典》，輸入「大酒店」，遞俾佢睇。
「呢個係咩嚟？」法仔好奇。我開始講多啲自己嘢：「朋友搞嘅網上粵語詞典，我以前都有幫過下手。」「冇app嘅？我用開呢個查中文…嗱，Pleco。」後嚟有一次，我教佢「DLLM」嘅用法，佢竟然即刻send咗句「肏妳媽」俾我，話係Pleco教嘅，真係吹漲。（香港人學咩人寫「肏」呀，屌。真正嘅香港粗口又讀唔正，讀嚟讀去都係「雕你老母」。）
我哋一路吹住晚風，望住180度海景，閒話家常。唔好以為好浪漫，實情凍—到—我—死。
再唔郁下我就結霜。我離開張櫈，行去喺圍欄邊發呆，冇耐法仔都行埋過嚟。我轉身望住佢，佢眼裡面好似有萬語千言咁，凝視我雙眼。
然後，佢錫埋嚟。
唔係額頭，唔係面珠，係嘴唇。一個真正嘅French kiss，遲咗六年半嘅一吻。
姣婆始終守唔到寡，守唔到寡又要問：「你做咩錫我？」法仔甜笑，摵一摵眉，聳一聳肩：「因為我想囉。」「你…你想就可以錫人咖喇？」姣婆仲問。法仔岌頭：「嗯哼。」
可能見我呆呆地，法仔蜻蜓點水咁喺我唇上錫多下，就拖我返埋位。
我又借尿遁。喺我借尿遁嘅時候，法仔已經埋咗張單，喺廁所門口等我。我分唔清係酒精定係法仔令我塊面㷫到滾。無論如何我都想啲酒氣散下，於是叫法仔陪我行多陣。
我哋喺1881踱步兜圈，繼續分享往事。原來佢2013年真係返過香港，探親之後去咗武漢交流。（唔抽瘟疫水，佢堅去過武漢讀書。我完全理解唔到，一個法國法律系學生，去啲根本冇法治可言嘅國家交流乜嘢。）我讀大學嘅時候都係大中華膠，好揀唔揀，死都要揀去北京實習。（公司直屬文化部；人做跑腿我做跑腿，我跑各國大使館。你估我嗰時話「愛國」係流咖？）大家都有過喺中國城市生活嘅經驗，又多咗唔少話題。
我終於忍唔住問：「點解咁多年都冇搵過我？」我哋坐咗喺1881噴泉邊。法仔吸咗大啖氣：
I had a crush on you, but I had someone in France. So… I chose to leave that way.
有女朋友仲走去攬同拖其他女仔，係咪好賤格？都幾。至少我自己唔會，亦接受唔到自己男朋友咁做。不過可能事隔咁多年，我反而冇嬲佢明明有女都flirt我；聽得入耳嘅只有呢一句：佢有鍾意過我。
我追問：「你記唔記得，喺你離開hostel嗰一日，你同全世界都hug goodbye，唯獨是冇同我道別？你知唔知我好唔開心，唔開心咗幾個月？」
「I don’t remember… Did I?」「You did, and that upset me.」我唔知做乜又跟佢講英文。
「I’m sorry. Right… If you still remember it after 7 years, you must be really upset at that time. I’m so sorry.」佢攬實我，攬咗好耐。我霎時體會到CP一再強調嘅「尊重同肯定你嘅情感」，而唔係我喺成長同感情路上嚐盡嘅忽視、否定甚至踐踏。
法仔話「唔記得」，我相信佢真係唔記得，而唔係無賴。佢曾經講過，情緒病藥物嘅副作用之一，係令佢記性變得好差。喺佢毫無印象嘅前提下，依然願意為著我嘅片面之詞而道歉，帶俾我嘅感動同震撼非筆墨可以形容。原來我嘅情緒，無論合理或無謂，都可以被全盤接納。
喺嗰一刻我覺得，我好似同六七年前嘅佢重修舊好，亦同自己和解咗。
「你做咩又錫我呀？」姣婆又問。「我而家冇女朋友。」「咁你當年有女朋友點解又錫我？」「冇可能！我唔係啲咁嘅人！我…真係有錫過你？」佢開始猶豫，懷疑自己嘅記憶。我話：「你錫過我額頭同埋面…」法仔大叫：「額頭同面…呢啲唔係叫做kiss啊！嚇得我…我以為我真係咁過份…」
學到嘢：對French people嚟講French kiss以外嘅都唔叫「kiss」，大家有機會同法國人交往要記得。
（待續）
