嗰個農曆新年，我哋再見咗幾次面。
遊長洲，上山頂，更多時只係街頭漫步——冇錯，純粹行路。無關浪漫，我哋只係市儈，唔想花錢消費，淨係想花時間喺對方身上。
我鍾意陽光，鍾意行路，鍾意望海放空。我唔需要冷氣，唔需要娛樂，只要同佢一齊，已經滿足。
法仔唔介意同我山長水遠睇風景，唔介意同我漫無目的閒逛，唔介意同我坐喺公園發呆。無論我哋行到邊、食啲乜，佢從來唔碌手機，雙眼永遠專注於我（搞到我都唔玩得電話），同我傾偈。「喺法國，同人食飯嘅時候睇手機，係非常、非常冇禮貌嘅事。望一兩個短訊勉強可以接受，但真係只能望一眼。」呢種交流自然令我覺得備受重視。只係長期注視對方雙眼，略嫌佢電力過盛。同當年嘅分別在於：而家少咗啲輕浮，多咗幾分沉穩。
佢知道我抗拒中國自由行，但凡身邊有人講普通話，佢就會細聲講大聲笑：「你啲朋友呀。」佢會喺食肆作狀大叫「fúwùyuánr」，撩我：「我哋學下啲dàlùrén嘛。」佢唔特別討厭中國人，但係好鍾意睇我對中國自由行黑面嗰副嘴臉。有時見我塊面西得太誇張，佢會嘆氣：「唉，你真係好唔鍾意佢哋。」「我係。試下你屋企俾人侵佔同污染吖…」佢拍下我膊頭，安撫我：「It’s okay, it’s okay. You’re still in Hong Kong… This is still Hong Kong, not yet Guangzhou… or Zhuhai.」
每當香港人同佢講英文，「sorry」、「thank you」、「just a moment please」，輪到佢皺眉：「又講英文？做咩個個都同我講英文？呢度係香港，講廣東話咖。我係香港人，唔係鬼佬。應該同我講『對唔住』、『唔該』、『等一陣』先啱。」「得喇…煩！」當我哋每日俾普通話重重包圍時，身旁呢個混血鬼佬堅持要講廣東話，問心，我安慰都嚟唔切。
口口聲聲話「我哋唔好行得太埋，要理智，大家都唔好沉船」，但打從一開始，佢就冇同我保持過「朋友」應有嘅距離。點解咁講？因為佢從來冇同我行過一般朋友見面用嘅貼面禮（即係faire la bise，法國人好興嗰種面貼面greeting）。每一次見面，佢第一個動作都係輕吻我嘴唇，以此作為打招呼嘅方式。出街嘅時候，我哋舉止儼如情侶。無論喺長洲、山頂、油麻地、尖沙咀，佢都唔會鬆開我隻手。法國人果然好鍾意親吻，無論何時何地，只要四目交投，自自然然就會錫一啖。
佢唯一一個我唔鍾意嘅習慣，係食煙。佢聲稱佢唔食煙，因為電子煙唔算煙：「I don’t smoke, I vape.」佢冇帶電子煙返香港，隨身會袋住包煙，但兩日都未必會食一支。（條友連火機都唔帶又唔買，都唔知係博問人借火溝女；喺我面前就只會問阿叔借火。）食完煙，佢會洗完手，認真聞下隻手有冇煙味，先拖返我；食完薄荷糖，先再錫我。
有次喺街，我想玩佢（即係調情），不停咁哄埋佢度錫佢。佢開始避：「夠喇，唔好再錫，再錫出事咖。」大街大巷，人來人往，出得啲咩事丫，我心諗。見佢愈面紅，我就愈過癮。佢再話：「唔好再錫喇。你記得我講過…」「你就嚟走丫嘛，知啦。」我又哄埋去。佢突然㧬開我，拎支煙出嚟，衝去問人借火。點著支煙之後，佢吸氣、呼氣，鬆一口氣，沾沾自喜咁同我講：「嗱，我食緊煙喇，你唔鍾意煙味咖，而家肯停啦？」我仲唔收手：「唓我怕咩？我有香口膠俾你食喎。」佢塊面仲係好紅：「唔好再行埋嚟呀，俾我冷靜下先。呼，你真係丫…」真係啼笑皆非，君子得嚟好可愛。
喺佢面前，我終於可以做返自己。
過去幾年發生太多事，我逐漸變得收埋自己，唔敢表達，怕被否定。當法仔講起自己讀書時做過夜場DJ，隨口問我鍾意咩類型嘅音樂時，我都猶豫咗好耐，怕答完又俾人嫌棄唔同世界唔同層次。
我唔想再為咗迎合人而失去自我，決定坦然分享：「台灣嘅Tizzy Bac、原子邦妮都係我鍾意嘅團；主流啲嘅話我鍾意張惠妹同蘇打綠。你仲記唔記得你喺hostel播過French rap俾我聽？香港rap界你一定要聽LMF。」佢話：「好，記低晒，我去聽下。」佢send咗張芸京〈讓我照顧你〉、曲婉婷〈沒有什麼不同〉同吳雨霖〈我本人〉俾我，話：「國語歌、廣東歌，我鍾意呢啲。」我回敬返一首胡琳cover嘅〈每天愛你多一些〉，唔係憑歌寄意（真係唔會輕言愛），純粹真心覺得胡琳把聲係天籟。
歡樂嘅時光過得無比快。愈美好，愈不捨。
人同人嘅相處好奇妙。你冇法子用公式計算出人夾人嘅定理，冇法子用條件數據分析邊個襯邊個。有啲人你無論相處幾多年都通唔到電；有啲人你一見就觸電，咁多年冇見都一樣。
我意識到我對法仔嘅感情與日俱增。我唔單止鍾意佢，更加鍾意同佢一齊時嗰個自己。
我同自己講：咪當拍六日拖囉，史上最短，但開心就好。
（待續）
