第二次離別，傷感之餘，無限感慨。
一個我曾經在意嘅人，銷聲匿跡六年半，忽然重現眼前，解開我鬰咗幾年嘅心結，然後又輕輕咁離去。
法國人好興講嘅「c’est la vie」，會唔會就係咁嘅意思？
人生中，人來人往。有人留守，有人離場；有人肆意摧毀，有人用心建立…未到生命終結嗰刻，我哋都冇辦法知道唔同嘅人喺我哋生命入面擔當啲咩角色——係忠係奸、係好係醜、堪稱VIP抑或純屬過客，通通唔能夠太早下定論。
法仔當年嘅出現同離開，我𢯎爆頭都諗唔到對我嘅人生有咩意義。「People come and go. That’s life.」呢句係我當時唯一諗到嘅答案，就係毫無原因、了無意義。
今時今日，法仔重臨後再度離開，令我諗起呢番說話：
Sometimes people come into your life for a moment, a day, or a lifetime. It matters not the time they spent with you but how they impacted your life in that time.
短短一星期，為我帶嚟安慰、肯定、鼓勵、啟發…或者就係法仔喺我生命裡頭嘅角色。相處時間唔多，但已經足夠改寫我一小段人生。
擦得出火花，又有過深度交流，我當然希望佢可以留喺我身邊。但係如果呢個就係人生，我亦冇咩可以強求。又或者，有返少少遺憾，先算係真實嘅人生。
喺車站道別後半個鐘，我仲未返到屋企，已經收到法仔message——
法仔：Hey
港女：?
法仔：?
港女：Hey whaaaaat
法仔：Hey
港女：What’s up
法仔：Nothin’
港女：Are you the real Jamie or is Jamie kidnapped?
法仔：:-X
港女：你怎麼了
法仔：妳呢？
港女：Nothin’ …
法仔：It’s a sad night…
港女：Yes it is
港女：你明天要飛，早點休息 :)
法仔：Yes…
我有啲驚訝，法仔咁快text我，仲好似心事重重，欲言又止。雖然有互表心跡，但由頭到尾都係佢堅持唔好開始，寧可各自好好生活，仲話大家好快會忘記對方…觀乎佢呢啲message，我就唔覺得佢捨得我囉。
佢send咗張相嚟，係佢手上兩排吉百利朱古力：「你要試下。」我唔知呢款fruit & nut bar有咩咁特別，吉百利咁甜根本唔啱我。法仔講過，如果我唔開心、仲未喊夠，就食啲朱古力。見佢走去買朱古力，我問：「而家係咪你想喊，所以買定朱古力俾自己食？朱古力我要食Bueno，仲要係frozen嘅。」「Frozen Bueno？我未食過。」「咁你要試下喇！」「好！」Kinder繽紛樂同金莎呢啲有榛子醬、榛子粒嘅朱古力，我全部都要放冰箱。尤其係繽紛樂，你喺街請我食我都未必食，我係要食frozen嘅。（如果你知道我連出爐蛋撻都可以放雪櫃，就唔會意外我擺繽紛樂入冰箱…我唔鍾意流心食物。）
港女：我到家了
法仔：好嘢 :)
港女：你呢
法仔：也到了家
港女：Good
法仔：妳眼瞓未？
港女：少少
港女：Still thinking about the way life works
法仔：唔好諗咁多。。。（按：佢真係打三個全形句號當省略號。。。）
港女：Why are you becoming so native…
法仔：WHK朋友（按：佢意思應該係words.hk。）
港女：……
法仔：Good dictionary ^^ First time that I really learn some Cantonese… When I was learning Mandarin, I was always thinking: “hmm, that’s not how we say it in Cantonese”（按：呢段其實同篇文主題無關，純粹俾《粵典》啲人自high下。原句直出，唔係我作。）
我唔識法文，所以冇乜打過法文message俾法仔。每次佢用中文甚至廣東話覆我，我都會有少少感動。雖然講嘅嘢冇咩特別，都係打下招呼講下早抖，但我知道佢打得中文都要查，打廣東話更加唔簡單——佢只識用台灣注音輸入法打漢字，用注音照計唔容易打到「嘢」、「瞓」、「唔」、「諗」、「咁」呢啲字，即係話佢要透過其他方法copy and paste先會砌到嗰幾句嘢，難怪佢打嗰幾句廣東話message所需嘅回覆時間由三分鐘至廿分鐘不等。
傾多幾句又差唔多凌晨兩點，今次到我催佢瞓。
港女：快啲瞓
港女：Good night
港女：Thank you for everything :)
真心嘅。即使段關係未如我意咁繼續發展，我始終感激佢呢個幾星期帶俾我嘅經歷同回憶。
法仔：Ok ok
法仔：Good night!
法仔：Don’t thank me… We share something
唔知點解，呢句「we share something」都好觸動我。啱嘅，呢個幾星期嘅短暫經歷係屬於我哋雙方，係我哋共同創造同擁有嘅美好回憶。至少我知道，唔係只有我感激佢出現，佢同樣感恩我存在。祝福，係雙向嘅。
港女：I’m still grateful for meeting again
法仔：I just wanted to see you again
呢一晚嘅感覺好玄妙。
好唔捨得呢個人，但係又毫無酸澀，只有回甘。佢留低我固然開心，但佢照原定計劃離開，我亦唔太失落。我哋都有自己需要繼續面對嘅人生，可以喺呢個幾星期解開一啲心結、喺對方生命留低幾步腳印，可謂難能可貴。
世事難料，人生真奇妙。我曾經以為，呢個人會永遠係我心底入面一條微細嘅刺；未至於好傷，但都會揦住揦住。殊不知事隔多年，呢個繫鈴人失驚無神返嚟幫我解鈴，再留低些少美好回憶過我。風流過客，咁就變咗做體貼情人（七日情人都係情人）。
呢一晚，我瞓得好好。人生如夢，好夢正酣。
夢甜正好眠，夢醒依舊甜。
第二朝瞓醒，我呢啲永遠last minute先返到公司嘅廢中，一返到去就做到冇停手。十點左右，法仔主動搵我：「早晨，我晏畫飛喇。我過到去柬埔寨可能聯絡唔到你住，俾啲時間我買張SIM卡先。如果我失蹤一兩日，你唔使擔心。^^」
道別之前，我話佢聽，同佢失去聯絡嗰幾年，我除咗對上嗰個男朋友之外仲鍾意過啲咩人：「計埋你應該有三個，你係第一個。之後嗰兩個同你一樣，曖昧咗一輪，突然疏遠我，又係近乎人間蒸發。唔知係咪我好唔得人鍾意呢，大家都好鍾意突然消失，一句說話都冇講低。」法仔當下聽完，耷低頭唔出聲，攬咗我一下。
「如果我失蹤一兩日，你唔使擔心。」我份人好容易感動。法仔成日話，自己有好多嘢唔記得，以前食抗焦慮藥食到有副作用，偶有失憶。而呢一刻，佢記得我十幾個鐘前講過嘅說話，放咗喺心，同我備案打底，預先安撫我嘅情緒。小小表達夠我冧好耐。
我諗，佢應承我會保持聯絡，叫我隨時都可以搵佢傾偈，應該係真嘅。佢對我嘅關心，應該都係真心嘅。
（待續）
