法仔臨走前嗰晚，我哋喺尖東海傍漫步咗好耐。
當法仔講笑話鍾意咗我七年，而我又翻舊帳話佢消失咗接近七年嘅時候，我忍唔住問：「其實你知唔知我喺Facebook unfriend咗你？都幾年咖喇，因為我之前有啲嬲你。」法仔一臉茫然：「你unfriend咗我？」我有少少尷尬，笑笑口話：「唓，你都唔用Facebook嘅，一啲消息都冇，都唔知你去咗邊，咪當冇識過你囉。」我只係unfriend，而唔係block，所以佢仍然可以喺messenger摷返我個名出嚟聯絡我。不過好明顯，佢呢幾年都冇click過入我Facebook八卦過我嘅生活。佢完全冇發現我哋已經唔係Facebook friend。
當晚kiss goodbye後冇耐，我就收到佢嘅friend request。心入面再冇芥蒂，我爽手accept。佢對上嘅update仍然停留喺2013年——換咗張維港夜景cover photo。
「嘩，你喺Facebook寫我？我所講嘅嘢全部被記錄在案！」第二朝，佢似乎碌過下我Facebook，睇到我記述咗部份我哋之間嘅對話。中文佢唔多識睇，淨係睇得明三幾句英文。
寫得出就唔怕認。「係呀，你唔介意嘅話，我諗住今晚寫多篇長嘅添。」「寫咩先？」我故弄玄虛：「寫人生。」
「唔好寫到好似Taylor Swift啲歌咁就得。」識講笑我當佢默許。「Taylor Swift寫前度咖。」我暗示佢唔肯做我男朋友，登唔上我嘅前度名單。
嗰晚我喺Facebook寫咗三千字，喺朋友間引起好大迴響。我寫嗰三千字，法仔係知道嘅（佢有冇Google translate我就唔知喇）；不過我而家喺呢度寫咗三萬幾字（仲未寫完），佢應該未知。除非我好似《Before Sunset》嘅Jesse咁，將自己嘅旅行艷遇寫成書，再簽書簽到去巴黎，如果唔係法仔應該唔會好似Celine咁出現返。
「我出門口喇。」巴士站喼相一張。
「我就上機喇。」機場登機閘口相一張。
法仔好似怕我會再因為佢行蹤不明而傷心咁。佢咁有交帶，我有啲唔慣；唔慣得嚟有啲冧。
「你今日有冇好啲？仲有冇喊？」睇嚟我嘅喊包形象都幾深入佢心。「唔知呢。」我補多句：「等我學下Taylor Swift，或者心情會好啲。」
「好啦，我要起飛喇。」
「我會好掛住你。」
「我都一樣。」
法仔外婆係越南華人，喺柬埔寨生兒育女，最後同幾個仔女落戶香港。
初初認識法仔嘅時候，佢話佢媽咪係香港人，喺香港有親戚。今次佢返嚟香港，先探親，後飛柬埔寨實習，原來佢喺柬埔寨又有親戚。無論係法蘭西殖民帝國史，定係法仔家族史，我都唔係太熟。法仔講自己家庭背景都講到一舊舊，總之佢媽咪喺金邊出世，喺金邊打工識咗佢爹哋之後就嫁咗去法國。佢媽咪仲有五個兄弟姊妹，其中有兩個同樣去咗法國落地生根，另外有三個就同法仔嘅公公婆婆一齊定居香港。
法仔其實冇意欲去柬埔寨，只係佢媽咪叫佢去當地親戚嘅律師樓度實習。法仔讀law出身，畢業後因為情緒病影響到生活作息，冇乜工作機會。今次呢個為期一個月嘅所謂實習，相信係佢媽咪用心良苦嘅安排，希望幫到佢重投社會工作，同埋藉著出遠門令佢開朗啲，唔好成日匿喺屋企。
幾個鐘後，法仔text我：「我到喇！佢哋屋企好大，我好似住喺城堡咁。」呢個律師親戚係佢遠房表姐夫，柬埔寨高棉人，喺紐約讀完J.D.返嚟金邊執業開law firm；一幢house，下舖上居。「你係城堡入面嘅王子定係工人先？」「王子。:P」虧佢講得出。
「Oh my god…你寫咗本書？」佢又碌過我Facebook。「係呀，寫長啲，博你翻譯唔到。」佢開始陪我鳩噏：「諗住喺書店賣呀？」我當時答佢唔會擺喺書店賣，要賣都賣電子書算，環保啲。如果俾我再答過，我會叫佢喺巴黎Shakespeare and Company等我簽書。有機會見返佢嘅話，幾面懵幾老套幾柒嘅方法我都會試。
佢碌埋我篇三千字文底下嘅留言。「好多留言…啊…有人話想睇我個樣… >_<」嗰篇文有近百留言，其中一個朋友用中文講完認真嘢之後，用英文寫咗句：「我好好奇佢咩樣，不過都係唔好貼喇。」我覆咗嗰個留言：「唔係好靚仔，一曝光就破壞美好嘅想像咖喇。XD 不過談吐同風度可以加分嘅。」
「係呀，我答咗佢你唔靚仔，唔使問我攞相。」我個誠實豆沙包仲未落膈。「多謝晒喎…」法仔無奈，開始反擊：「嘿，如果我都寫個Facebook post講你，應該都會有幾十個留言！」你寫我我求之不得啦，唔使我自己插旗。
「不過…你或者已經留意到，我Facebook基本上唔貼嘢。一般嚟講，我唔係好同人講自己嘅生活。」盲嘅都睇到佢Facebook一片空白，想當年我日stalk夜stalk，都係得個吉，先至會惱羞成怒unfriend埋佢。
「我幾年前已經留意到，所以我對你可以話係一無所知。亦因為咁，我呢個幾星期成日叫你講多啲自己嘅嘢俾我聽。」「我都唔係好認識我自己，我連關於自己嘅嘢都唔記得…有好多嘢我都記唔起…」佢答得有啲落寞。
「唔緊要喎，我都唔係好了解自己咖咋。我哋永遠都係喺自我發現嘅旅途上。」
我思緒成日打晒棘，而佢就話佢腦海好多時都一片空白。我唔了解自己，會寫文幫自己梳理；佢唔認識自己，唔會貿然分享，選擇一隻字都唔記。
我同佢，無論線上線下，都係兩個極端。
（待續）
