瞓醒第一件事，text法仔。
「尋晚有啲無禮…對唔住。」「你係呀，哈哈。」佢打咗個輕佻嘅飛吻emoji，搞到我更加唔好意思。除咗死狗樣，我都唔知點回好。法仔笑：「見到你邪惡嘅一面，哈哈哈哈。」跟手打個惡魔樣串我。
我做咗啲咩咁「邪惡」，要連連道歉？冇，前一晚睇完戲，臨瞓前我突然發晦氣。
港女：I’m not coming to Cambodia for you
法仔：…
法仔：:(
港女：:(
港女：That’s it!
法仔：So sad…
港女：Yep
港女：Life is always sad
港女：Déjà vu
無啦啦發咩晦氣？倒帶倒多兩格——法仔只不過講咗句「我哋而家都唔係嗰個狀態」，我就過度反應。
我嬲咗，皆因英文太差，錯誤解讀。我以為佢所指嘅「嗰個狀態」，係指我哋未係情侶；其實佢意思只係話我哋唔係喺同一個時空面對面相處緊。點解我以為佢強調我哋未係情侶就會咁大反應？無他，皆因崩口人忌崩口碗，我真係幾想同佢成為情侶。
可惜我瞓醒重新解讀過已經太遲，我已經發咗爛渣。覆水難收，唯有不停沙冧。
「我知我態度好差…對唔住…」「唔使對唔住，冇事呀。:)」我博命say sorry，佢努力send smiley。我仲係好緊張，嘗試解釋，想挽回喺法仔心目中嘅形象。我打咗一大堆，解釋我get錯佢意思，解釋我點解唔開心，為自己嘅無禮晦氣開脫。
法仔嘅回應得一句：「我覺得只係一場誤會。^^」佢咁講，我都鬆一口氣。
「金邊啲酒店好平喎！」法仔突然cap咗啲酒店資料俾我睇。我話：「你check嚟做咩？我都check過金邊啲Airbnb，真係好平。」「咁你check嚟做咩？」唓，小學雞，執我口水尾。
我話：「因為我尋晚聽到有人叫我去金邊搵佢囉。」法仔又cap咗張圖——係我尋晚嗰句「I’m not coming to Cambodia for you」，大大個紅圈圈住，側邊仲有好多火焰emoji。
「啲火焰咩料…」「係我個心俾火燒到，好痛。」佢份人平時好正經，估唔到都有佻皮嘅一面。「你真心想我嚟？」「你尋晚話唔嚟…」嘩，扮慘？我不甘示弱，cap返早幾日佢叫我唔好去嘅說話，畫返紅圈，send俾佢。
我趷返佢：「我話可以去法國探你，你話唔好，轉頭又問我會唔會去。我話我可以嚟柬埔寨搵你，你又話唔好，跟手又再問我會唔會嚟。點呀你？一時一樣。」「你咪一樣…一時話嚟，一時話唔嚟！」唉吔駁嘴？乾脆開心見誠啦：「你講一句想我嚟，我就會嚟。」「好，今晚見。」「唔好大我！」
廢噏完，開始認真討論。佢主要嘅concern，係怕我嘥錢，同埋嘥咗啲假。錢我真係唔多，假我就大把。我講咗幾十次「我點都要清年假」，佢終於表達佢想我過去，只係唔好意思開口。
「咁等你買好機票，我就幫你book住宿。你唔熟金邊，等我幫你搵間近Alan屋企嘅，見面方便啲。」Alan即係佢intern老細兼遠房表姐夫。Alan屋企，係法仔寄居嘅哋方，亦係佢哋返工嘅地方。
「你prefer住酒店定Airbnb？我一陣幫你睇。」「酒店同Airbnb我都冇所謂，但係我想有自然光。」採光，係我揀住宿最重視嘅一環。「即係冇窗嘅房唔得啦？」「唔得，冇窗我會死。」我要窗，最好係大窗。
我哋花多咗一日一夜嘅時間去夾期。夾到我攞假嘅期，又要check機票格價。計下計下，原來飛柬埔寨都要兩千蚊。「呢兩千蚊，我留起嚟飛法國會唔會划算啲？」「嗯…如果飛柬埔寨唔抵，一係遲啲先喺法國見…」「好，唯有係咁。」
法仔難掩失落之情，追問：「不如照嚟啦？我哋攤分返個開支，機票我出一半。」聽到佢話夾錢，我即刻褪軚：「照原定3月10號喺香港機場見啦？」
「你唔想過嚟？」「我想，但我唔想你出錢。係我自己要飛過嚟，你夾份埋單係咩道理？」法仔話：「道理就係——我哋都想見對方，呢個trip係我哋大家嘅。個trip開心，雙方都得益，所以我出一半好合理。或者你出機票，我幫你出住宿。」「咁如果我嚟到又發脾氣呢？你咪貼錢買難受？」「如果我哋唔夾，愈早知唔係愈好咩？」我諗一諗，又啱，好過我飛到法國先反面。「然後你又可以unfriend我，我哋可以再無視大家六七年。」丫，講呢啲？
我終於砌到個期，3月3號到7號飛金邊。
「好似好耐之後咁…認真，不如你今日嚟啦，我準備咗晚餐俾你。」佢影咗張相俾我睇，相入面有排繽紛樂。「一排frozen Kinder Bueno，你鍾意嘅。」有得睇，冇得食，我一樣咁冧，因為佢記得我講過嘅嘢。
我突然醒起，呢日係2月14，情人節。
「你今晚有冇約人？」問咩啫問，你又唔肯做我情人。「想約你，你唔嚟，唯有約自己返屋企煮飯。」2月14邊有咁易約到人，我啲朋友都一對對，唔少人仲有埋仔女。
法仔話：「唔…話說…我哋之前見面嘅每一日都好似情人節。」「的確，你每一日都令我好開心。」法仔就係有咁嘅魔力，同佢一齊，我無時無刻都會笑。我成日都話佢好sweet，好比我鍾意食嘅繽紛樂，好比佢鍾意飲嘅益力多——一樣咁sweet，令人愉悅。
「我幫你book咗酒店喇，仲加咗少少錢——如果你到埗嗰陣我嚟唔到接你，酒店會派司機嚟車你。間酒店唔係好高級，不過算近Alan屋企，望落都乾淨企理。嗰度有細細嘅健身房，同埋細細嘅泳池，我諗住你可能會想做下運動。」我去金邊嗰幾日，佢日日都要返工。可能怕我悶，我感覺到佢好用心揀酒店，想我至少喺酒店有啲細藝，打發時間都舒服啲。
考慮周全嘅法仔，令我未出發，先興奮。
（待續）
