呢兩年先接觸BBC Proms呢樣窮人恩物，同時都令我反思究竟點解classical music 咁難入口。利申：我玩左好多年古典音樂，直到十六歲我真係覺得無曬動力玩落去，宜家當然完全退化。
介紹下BBC Proms係乜：每一年七八月期間倫敦Royal Albert Hall（你當好似香港文化中心啦）都會有一系列演出，最正係你可以當日先買企位，而企位係非常平，七十蚊港紙有交易，所以我係用呢個價錢睇過Martha Argerich, Berlin Philharmonic, Mariinsky,同埋 Vienna Philharmonic。
最頂層企位係一條好闊的走廊，可以睇到曬成個場，非常壯觀，同埋唔需要企足全晚。第二個選擇就係買台前的企位，雖然可以同表演者近距離接觸，但就要同好多人逼，加上我相比大部分英國人都係比較矮，所以都係不了。
好啦，咁呢個post擺明除左介紹窮人恩物，就係講下點解忽然有感 -
我當晚就買左頂層企位，咁條走廊咁闊又無坐滿人，好自然就係好多人行黎行去呀，甚至有人飲下啤酒，大家打曬地鋪訓係度聽音樂，很好呀。呢個真係香港無辦法做到，你試下帶野飲入去文化中心呀那。
問題黎啦，當你比人聽音樂時自由發揮，目測係甚至有一家人帶埋棋盤黎玩，個小朋友竟然concert中間開始倒d棋，你可以想像下係大珠小珠落玉盤，個阿媽即刻去攬住佢叫佢唔好，跟著又會有人無啦啦電話響。其實，人地都肯定好老尷，大家都係黎欣賞音樂，望一望咪算。
最頂唔順係竟然有幾個老人家，已經黑曬面望住所有聲音來源，首歌完左，走去鬧個電話響個男人。喂，你想點？個concert hall係頗舊，牆薄過紙，有人encore去左廁所個吹風機響係成條走廊聽到曬，跟著d老人家又望，真係難免覺得：
你介意就好好地買張飛坐樓下睇啦。
同埋你咁大動作搞大件事都好影響其他人睇concert 囉。
搞笑位係其實可能電話響個個比大部分在場指指點點藐嘴藐舌的更懂音樂呢。
姐係我都唔係唔明白佢地，可能佢地真係特登老遠搭車黎倫敦就係為左呢一刻，問題係真係好難頂，去個concert都要比人話，所以廢老廢青問題你估香港特有咩。
平時其實都不免覺得好多事情係個形式嚇親大家，姐係好似movement中間唔拍手，喂無人話你知你又點知唔可以？通常表演者／指揮完曬整晚的曲目又會行入台幾次又出黎若無其事表演預備好的piece。成件事係好似一個人行入西餐廳叫杯酒，侍應竟然倒少少比你試 － 喂，我相信大部分人第一個反應一定係「杯酒咁少？？？」或者「huh咁姐係唔好飲可以退？」（呢個已經可以獨立成文），即刻成件事變成好似去飲杯酒都要俾成個體系嘲笑你唔識野。
如果古典音樂比人第一個感覺就係好多繁文褥節同埋好扮野，咁難怪難入口啦。講真，我已經慣左自己一個人去睇concert，費事人地以為自己係snob呀。以前都好天真以為英國人肯定好多人聽古典音樂，少年真的太年輕了，香港人學琴率肯定比呢度高好多，怪獸家長呀嘛 ~
原文章2017年七月貼於個人fb，執過少少重貼
