【危險的車牌字體花臣】
縱使香港政府採用嘅平面設計水平一向麻麻,創意欠奉零美感,落後於地區;但講到每一架車輛上嘅車牌所用嘅數字及英文字母字體,就相當富「創意」,五花八門林林種種(Roman serif 我都見過),選擇之多相信世界上冇乜邊個先進地區可以媲美。如果我唔講,有常識嘅都會認為車牌呢類嘢,應該有一個嚴謹嘅規格,尺寸大細、顏色物料、字體款式、排列格式,絕對唔會容許任何「創作」空間或品味表達。Well,响 common sense is not common 嘅今日香港,原來,本地車牌字樣,法例規定同市場選擇有相當具彈性嘅分野。
鉛水唔會影響健康、沉降唔會影響安全、剪鋼筋唔會影響結構、庸官唔會影響管治… … 相比起沿用已久兼又好似未發生過死人意外嘅車牌花臣字體,真係好似好微不足道。香港人眼中,字體(typeface)彷彿就只有美感、品味、解悶上嘅功能,其他專業設計師嘅考慮,好似都係見仁見智,係班 designers 嘅無病呻吟。因為好奇(加職業病),日日夜夜响街都見到各式各樣嘅車牌設計,心諗:唔通香港政府真係咁有心提倡創意,老早已經實踐「A City Driven by Design」呢個口號?讓 driver 們駕駛住心儀字體穿梭全港?唔得,一於要查一查先!
因為設計,第一次上網翻查法律條文(通識啊~)。噢!查呀查,原來政府網上的確有記載嘅字體樣本同條文,但就好似有點含糊。字體樣本好似用影印機翻印幾十次咁,字體大小長闊字距描述,明顯冇英國個標準咁清晰冇走棧。Google 一輪,英國為例,字體係 Charles Wright,字形專為車牌而設,大階「I」同「O」特意與數字「0」同「1」相同,避免混淆;大階「B」跟「D」則專登加上 slab serif 增加 legibility,令之視覺上與「8」同「0」有更大分別。應用方面,字母及數字大細尺寸字距均清清楚楚。我其實唔覺得大英有乜嘢咁特別,因為我一直都以為,根根本本就應應該該咁L樣做。(殖民地沿用?廿一年啦喎。改啦!DL!)
大膽假設,香港地十個車主有九個半都係以個人品味及喜好去揀車牌字體,而最最最奇怪係 — – 點解有得揀?!客戶將自己公司個撈稿轉字款,FontFolio 幾千條 font 逐隻試,我理解。但車牌嘅嘢,真係可大可小。劫匪逃走、車禍 hit & run、通輯捉姦,認唔認得切車牌,統一而優質嘅字體設計及排列系統可以非常關鍵。呢門學問,絕對值得一個負責任嘅政府去關注。🙂
(大家若見有騎呢車牌,不妨 post 上 comment 吖!😏)
Image source and related links:
訂做特別車牌 – —各種字型效果
http://www.carpaint.com.hk/?page_id=741
第374E章 《道路交通(車輛登記及領牌)規例》附表4
https://www.elegislation.gov.hk/hk/cap374E?pmc=0&m=0&pm=1&xpid=ID_1438403126331_001
About vehicle registration numbers and number plates (INF104)
https://www.gov.uk/government/publications/vehicle-registration-numbers-and-number-plates