【粵拼教學001】chur(coe2)

點解香港人普通話咁叻,粵拼就咁水皮嘅?

前排見到好多香港人話粵難粵愛呀、母語係廣東話呀,其實都幾感動。不過得個愛字係唔夠嘅。大家嘅愛,究竟轉唔轉化到做學習嘅動力呢?我好想做個實驗。

我想試下教大家粵拼

C for Cantonese 😃 Photo by Nikhil Mitra on Unsplash

英文日文韓文咁難,隨街都搵到人識講,粵拼得嗰22個字母,但係喺香港識粵拼嘅人,連1% 都唔知有冇。你想像下中國嗰套漢語拼音,係求其搵個小學生都識,粵拼呢,你去大學捉十個人有九個都未聽過,就算啲本土專頁懶係想加啲廣東話元素,個拼音都係靠上網查出嚟㗎咋。你話噉樣成何體統呢?

我知道要大家坐定定用三粒鐘去做練習,係冇乜可能嘅。所以我幫你簡化件事。你睇住我個 Medium,唔收你錢,睇晒成個系列,你應該就會學識。

每次只係會用你 5分鐘 時間。係5分鐘,一個字,five minutes。

而家正式開始。建議大家對住下面段字,朗讀一次。


今日主要係教一個詞,冇漢字嘅,平時會寫做 chur

chur 嘅粵拼串法係 coe2

每個字嘅串法,最尾有個數字嘅。數字代表個字嘅聲調,即係個字嘅高低音。chur 呢個字嘅聲調係 2 。有個數字 2 嘅字,就係由低升去高,所以 chur 字同「扯」、「草」、「炒」呢啲,都係由低 chur 到好高嘅。
(我知道你可能聽過好多六字真言,又牛腩麵,又數字歌,又陰又陽。信我,暫時唔好理住。)

點解會串做 coe 呢?所有廣東話讀出嚟好似英文 ch 嘅嘢,粵拼都串做 c

oe 係代表平時我哋英文寫做 -ur/-ir/-er 嘅聲音。
我好 hurt,佢好 chur,你唔 gur,好 dur皮,搵阿sir,jer住晒之類都係。
讀出嚟,我哋冇捲脷,唔使 rrrrrrrrrr(除非你扮ABC講嘢啦)。串法上,我哋跟國際音標(IPA)[œ],拆開寫做 oe

所以 hurt→ hoet,gur→goe,dur→doe,sir→soe,jer→zoe
仲有,香港個香→ hoeng

總之要O住嘴好似個 chur 字噉讀嗰啲,就係串做 oe

我重覆:
chur 嘅粵拼串法係 coe2
chur 嘅粵拼串法係 coe2

臨走俾個練習大家,諗一個粵拼係 c 字開頭嘅形容詞,喺下面回覆。

後記:千祈唔好以為我會「有系統噉」教大家。如果順住啲聲母表韻母表逐個講會有用,一早就全民都學識晒啦。大家記啲重要單詞就得,自然就可以舉一反三,唔使心急嘅。