《恭喜八婆》完美示範點樣炒冷飯填滿88分鐘

《恭喜八婆》拍攝花絮
三年前,一班傲嬌黨嘅朋友決定,每個年過年都要聚埋一齊,睇一套爛片,叫做支持吓香港電影業。今年賀歲片特別多,本來我想睇李居明嘅《豬年運程》,可惜大家又一次無視我嘅提議,揀咗主流賀歲片《恭喜八婆》去延續呢個傳統。(舊年我話想睇《大迷信3》已經冇人理我,根本大家心目中都係想揀套冇咁爛嘅去睇。)
傲嬌黨過年爛片列表
2016(猴)《賭城風雲3》
2017(雞)《小男人週記3》
2018(犬)《我的情敵女婿》
2019(豬)《恭喜八婆》

《恭喜八婆》嘅導演係明星級嘅彭浩翔,佢嘅《買兇拍人》、《AV》、《大丈夫》《低俗喜劇》,堪稱經典,等我入場前都仲有少少期待。不過開場唔到10分鐘,我已經意識到呢套嘢係趕 deadline 之作。全齣戲 88 分鐘,有一半係夾硬用長篇對白去拖,就好似小學生作文唔夠字,用啲「的的了了」塞夠字數交貨;最黐線嘅係,故事去到尾聲,佢居然用兩分鐘旁白講返每個角色嘅近況,然後淨旁白(配合 PowerPoint slides)去講「乜嘢係友誼」,出字幕之後,仲有 4分鐘係 MV,即係成套戲嘅故事部份只得 80分鐘鬆啲。一齊入場坐我左邊嘅 ADHD 朋友(已食藥),捱到出字幕,唔理細 screen 仲有畫面,都準備起身離場。

睇睇官方資料先。

演員:梁詠琪、梁洛施、陳靜、谷祖琳、林兆霞、陳逸寧、謝賢、邵音音、徐天祐、陳奐仁、郭奕芯、楊柳青、丁可欣

留意,上面嘅次序係知名度順序,梁詠琪、梁洛施對白極少,谷祖琳只係出現咗兩個 shot,實際主角好似係陳靜(Dada)同陳逸寧。冇巨星擔大旗,都一樣可以爛;但係爛到噉嘅樣,都一樣可以做票房冠軍,觀眾嘅口味真係好神奇。

故事簡介(官方)
手機聊天群組「八婆」是由六個女生及兩個男生組成,他們曾經一度很親密,但因為當中的督察 May 發現自己男友和閨密陳逸寧有一腿;網絡紅人大波蓮又將眾人的感情秘密寫成書發表,種種原因,讓這個群體的人愈分愈散,慢慢不再在群組中發言,最後讓這個群組在手機中愈沉愈底。
 
 直到有一天,群組中的一員、一向樂於助人的 June,因為在上班時候,將上司放在茶水間的一瓶人奶,不小心用在給客戶飲用的咖啡中,因此必須要在下班前找回一枝人奶來頂包。在無計可施下,她想起這群曾經親密的一班好友,於是決定找陳逸寧幫忙,而陳逸寧亦開始把群組成員逐一找回來。雖然各人彼此充滿著矛盾和恩怨,但大家為了幫忙 June,決定先把恩怨擱在一旁,盡力協助找奶,而在過程中,眾人把心中鬱悶很久的心結和問題,一次過爆發出來。讓這天既在拯救 June,同時間亦在拯救一段已經早已逝去的友情。

故事簡介 (真實)

  1. 阿 June 唔小心用咗老闆枝人奶沖咖啡俾客飲,要喺收工前揾返第二枝人奶頂包,於是向八婆群組朋友求救。
  2. 眾人扭盡六壬,上網買私奶、去幼稚園借奶、揾陪月偷人奶、開直播 fans 幫手揾、最後去商場擺 booth 募奶。幾經辛苦,終於揾到一支有麻辣火鍋味嘅人奶,放返去公司 pantry。
  3. 收工後老闆都係發現枝奶有問題,好彩原來有個白痴妹掹咗雪櫃電掣去叉電,老闆以為枝奶變味係白痴妹造成,主角負碌過關。

Dada 去咗邊?佢嘅主要職責係視覺效果,同故事無關,只係老是常出現。


睇條主線,起碼由頭到尾都有個大任務喺身,時間越嚟越緊迫,主角要過五關斬六將,最終解決問題。呢個模式同《大丈夫》用盡各種方法都想開心一晚、《AV》要用盡一切辦法令自己可以同天宮真奈美上床,個套路係相似 — — 不過上面呢兩套都相對成功,每一部份都有劇情嘅需要;《八婆》嘅模式係「方法A → 失敗 →方法 B →失敗 →方法 C →失敗 →方法 D →失敗 →方法 E →劇情需要所以成功」。即係前面嘅方法 ABCD 係廢㗎。cut 走晒都唔會影響到劇情發展,係連故事推進都做唔到。

以下係我覺得 cut 咗冇咁嬲嘅部份(節錄)

梁洛施

第一部份,老闆梁洛施出場,首先係鬧阿 June (八婆之一)點解會請咗一個大波白痴妹(郭奕芯 飾,對白加埋應該得三句,浪費咗一個新晉演員),鬧完人跟住去咗會議室向大客謝賢介紹「遙距養羊」計劃;就係呢個時候阿 June 用錯咗老闆枝人奶,是為故事嘅開端。先旨聲明梁洛施嘅演出其實好好,佢好認真噉演活咗一個女強人角色。但係故事脈絡嚟講佢應該只係客串,加一個喜劇效果係零嘅角色,啲八婆都未出現,作為一套喜劇,無論係鬧人定係介紹「遙距養羊」大計,都可以完全冇一個可以放落 trailer 嘅片段。究竟呢個角色係做緊乜。

翻炒

炒冷飯唔係問題,周星馳都話自己係炒冷飯;但係一餐飯要食十碟唔同味嘅炒飯,真係會好想反枱。

首先係腳都未齊已經不斷揼波鐘。文盲才女 Dada 第一次出場,就係喺一個「新書發佈會」介紹新書《愛上一個人》,仲要用分幾鐘時間去將「愛上一個人」呢個 gag 由頭到尾解一次。我想問有邊個未聽過呢個食字笑話?
(字幕入面本書叫 To Love or To Shag,真係譯得好)

之後下一個翻炒位,亦都係成套戲可能係最好笑嘅位:林雪 x 楊千嬅(個 x 係動詞)。楊千嬅入嚟,想嗌「菠蘿油跟凍檸茶少甜」,林雪不停叫佢講英文,之後楊千嬅就話「Pineapple bun with butter, iced lemon tea, little sugar」,林雪就喝佢話,「我叫你講英文呀!A B C D 呀!香港人英文都唔識。」呢個講字母 gag 其實已經高登出咗公海再圍繞地球轉咗幾千次,要演繹出嚟都得,但係究竟要幾背嘅人先至會識笑?我唔知,因為我聽唔到有人笑。

後面嘅翻炒部份仲有:① 上 SM專門店買「私奶」,喺度大嗌「啲奶假㗎」;② 去西貢偷奶嗰陣徐天佑扮「任何人」唱晒成首「左手、右手,直手擺喺心口」;③ 豪 Dee 扮男人KTV 式朗誦歌詞,將成首《落花流水》朗誦出嚟(之後呃咗 Dada 去殘廁 gathering)。失敗嘅地方係,睇過嘅覺得已經過氣,未睇過嘅就睇唔明。悲劇睇唔明冇所謂呀,笑片都黑人問號係咩玩法。

同志題材

唔知點解講親八婆,啲劇本總係會出現一兩個男同性戀角色。今次就係男同性戀情侶陳奐仁同徐天佑。喺早段仲未齊人,大家上門揾陳奐仁+徐天佑嗰度,一打開門係佢哋喺一間 SM 用品店教緊客人玩繩綁。即係佢可以將所有嘅性向定型用幾分鐘表達晒出嚟,同性戀必定有一個乸乸哋,一定鍾意繩綁滴蠟。

跟住後段揾奶嘅過程入面,呢對情侶鬧交,陳奐仁話徐天佑去布吉嗰時對住銀包打飛機,然後徐天佑放低銀包,入面係陳奐仁減肥前嘅相,之後有幾分鐘感情爆發 … 大佬我入嚟睇笑片㗎,仲要呢段 handle 得頗差,其中一句「我哋係兩公婆嚟㗎」真心笑咗。

玩屎

喺去幼稚園揾奶嘅時候,Dada 忽然之間急屎,去廁所發現只得 open toilet(即係咁多個馬桶排晒喺度,冇遮無掩)。跟住玩咗幾樣嘢:有個𡃁仔入嚟,話 Dada 知佢入錯男廁;跟住 Dada 要抆屎但係冇廁紙,個𡃁仔就話要環保,每次俾半格佢;最後啲屎沖唔走,佢聽咗個𡃁仔嘅提議,拎咗枝簽名筆出嚟𠝹爛啲屎。雖則睇 Dada 如廁實在冇乜美感,但係見到佢入廁所其實我好期望呢部份會有笑位㗎。可惜都係笑唔出。

激戰

臨近尾聲,有一個全場𠝹櫈位:一眾八婆拎住辛苦呃返嚟嘅人奶,要喺商場逃避保安嘅包圍,將枝奶運走。明明奶就一枝,但係每一個人都俾同一堆保安追;追到咁上下,枝奶就送到商場門口,然後鏡頭一轉,枝奶就運抵公司喇。


故事單薄唔足以形容呢個劇本:加埋至多夠一套微電影,呢度加個爛 gag,嗰度加句對白,將本來 30分鐘可以講完嘅故事拖到 80分鐘。好佩服剪 trailer 嗰條友,點樣可以將唔存在嘅笑點,剪到好似「下一幕就好好笑,你入場睇」噉嘅樣。我知道 史兄 好鍾意幫啲爛片諗點樣翻拍,好期望出咗 DVD 之後見到史兄 review 呢齣戲。