Member preview

《非同凡響》真係非同凡響攞distinction 香港地名校 /band3/弱能三線學生哥都係慘

近日都有好幾套港產片上。之前睇咗一套,真係爛爛哋,同本土電影人講。佢話,撐,都係要撐。我見網上啲comments,都無人鬧,奇怪。應該係之前未上所以無乜人睇過了。

但有套爛片魔王(or moron)史兄 勁撐,佢成日寫爛片,睇怕唔會伏,遂入場觀看。

一roll個片頭,出品人係「蔡海偉」,社聯,嘩。呢啲有教育意味有社會責任啲片,有時會有啲啲 compromise,就算爛啲人唔敢鬧得咁狠。

但呢套戲唔係。就算唔睇佢背後意義,本來就係一套好戲。

雖則電影圈內有反面評價話某啲嘢可以 handle 得好啲xyz,但身為觀眾,我收貨了。英文名《Distinction》更是一語雙關,改得真好。

完全反映真實狀況 以前做義工真係咁

《非同凡響》講特殊學校的兒童,並起用佢哋做埋演員,做番自己,完全勾起在學時的回憶。我有5年時間做過唐氏、自閉、ADHD等小朋友的義工,係講緊一年做到200個鐘攞埋社署個甚麼義工金獎。

而我想講係好多女名校生去做呢啲義工,我遇過有MCS, good hope,鴨真等, 但通常係暑假來做一陣, 唔會好似我咁做咁多個鐘, 所以入面嗰種鄙視反而就唔會。

暑假係可以朝9晚5咁,連 lunch 都同佢哋一齊食,重有同佢哋出去 outing, visit 呀,上堂教班例如教點用錢呀、交通工具呀,週年表演呀。入面間學校個表演,啲 props 呀costumes呀就正常唔會咁勁規模無咁大啦,物資短缺,但係會有啲咁嘅表演。

但小朋友係難控制的,無論是正常小朋友定特殊小朋友,所以舞得郁拍到嘢其實本來就是好犀利啊。

那個珈朗小朋友的行為,其實真係會咁,會掛住同佢玩的哥哥姐姐,好真心好令人感動。記得有個女仔,著綠色裙的,好 aggressive的,又醒目,又問我攞電話又盛。

入面有個唔肯返學,好大隻嘅小朋友,我又係同一個 similar 的人版相處過,真係好大份,但心境係小朋友。我記得佢重要唔著鞋,搞到好臭。

有一個未好鍾意掂miss手臂的,係呀,又係有啲小朋友會咁,唔係想侵犯你,但就係會咁。

然後,入面未有個教跳舞好醒的唐氏男仔。其實佢哋係有舞蹈團,有啲跳舞係不錯,要audition 先可以入。

好多弱能人士係好似劇情所講靠呢啲機構請,有啲因為疪護工場無位吉出來,要不斷留班等位,我都真係遇過。

名校生係咁咖啦

入面佢用女名校生 vs band3校生 vs 弱能學生做對比,真係做得超好。名女校生啲氣質有啲真係咁,(有啲同學)好功利啦,(有啲同學)好有錢啦,做好事為咗寫cv(又唔認啦)等等,入面有啲真,又有啲唔真咁。對住老師就賴係講埋啲「我今日真係學到好多嘢呀」嘅官晃堂皇說話,但自己係 prefect,帶電話返學卻又去捉低 form 帶電話。下午3堂全走,roll call 時又叫同學話佢哋未返扮起度等等。

同而家啲官一樣, 人地僭建就唔得,人哋收受利益就唔得, 但自己就可以僭建同埋收受利益。

其實名校個啲 training,係訓練你點 follow 上流社會啲 rules,做到唔衝擊建制而獲得最大利益(而不能否認有啲人係跟住玩又真係得囉)。當然校長想點係一件事,出到來是另一件,出來的「產品」係百花齊放,唔係個個係咁,但有好一部分,同余香凝啲 frd都似。

然後「萃仁」個校長同啲老師呀,係呀,又真係咁,當學校係大公司咁玩啫嘛,最緊要盤數,KPI,理得你死活咩,無攞獎能力,你老師學生都收__啦。家長會家長日話老師唔好,幫你同老師撐,跟住轉頭鬧個女「點解咁廢」,呢啲嘢,我都經歷過。係真係咁X樣囉。然後覺得你做唔到目標,唔會去望下過程,了解下點解,一味 push 個 result。個啲關心,充滿壓力。

呢啲位睇到真係覺得幾滑稽又幾寫實。

跟住那個家長(葉童)又係好鬼入肉,話你做咩都得,但要讀埋個 degree先。而家聽法律界個邊話,好像係發展到要攞埋個律師牌先,於是乎海歸有錢個啲係入law firm 捱2年,攞到牌就拜拜,唔會同你繼續做。

***(下面有劇透)

不過我唔會話咁樣有錢家庭唔快樂囉,既然貧賤要面對問題,中產又要面對問題,梗係中產好。入面葉童家其實都唔算「極有錢」,因為個仔去 Stanford 係apply scholarship,之後話送個女去外國又嘈嘈嘈,老竇唔肯俾錢。真係有錢,那一百幾十萬真係唔係錢。中產家庭,關埋門為錢瘋狂鬧交呢啲嘢,成日都發生,唔好以為唔會。你估窮家庭才會咩?不是。

Band3生的爸爸林嘉華,係從唔知點關心,去到想關心但唔知點做。個幕「唔係怕人哋笑佢,而係怕人哋笑個仔」,係好hurt好有力。想起《一念無明》曾志偉的角色。even 張國強,做中產爸爸,都係咁,關心女兒嘅工作,永遠俾咗老婆,自己係處於 absence狀態。最少啲電影係咁描畫。

竹門對不到木門

余香凝做隨波逐流名校生,同岑珈其做 band3頹廢生都係好似。佢兩個都係有similar 嘅煩惱,例如讀書不是興趣及專長,但因為出身唔同所以處理方法就不同了。甚至余香凝同弱能小朋友個 linkage都做到出來,葉童話:「你咁快話我女唔得,佢真係會覺得自己唔得咖」。

最後,余香凝因為阿媽壓力同溫書考試,退出音樂劇綵排。岑珈其幻想余香凝會出現在 performance 的後台幫手,當然是不會發生啦。少年,你想太多了。我原本以為,會正面少少,就俾余香凝出一出啦,點知就係不會。

但諗番,呢個結局,係好喎。

呢個結局帶出,共融,就係好難囉。唔可話同弱能小朋友啦,come on james 入面一句:「我哋根本係兩個世界嘅人」,同入面余香凝話「我要考DSE」;岑珈其又話「我夠要考DSE囉」。你個DSE,同人哋個DSE,真係唔同囉。

***(劇透終了)

套戲好嘅地方係,感動而無隔硬催淚,處理好自然。有啲位如點解岑珈其咁唔想讀書重返學,點解搞個音樂劇,幾個名校女去來做乜,都係有合理因由。戲中好多伏線都好link到,蛋糕班、隻手錶,那棵竹呀咁。個間最後叫佢 interview 的「英仁」,未係《那一天我們會飛》那間學校囉。

演員呢,好多個都好好。谷祖琳我覺得都好,自然,佢同呀蔣祖曼好鬼似樣。除咗幾位主角,歐錦棠一出就想笑,佢假假哋咁做但好又喜劇感,呢個角色好brightening。個反差好有趣,亦代表咗傳統教育的一方. 另一個係 king sir,真係好窩心溫暖,然後悟出人生大道理。佢把聲好 signature,呢個選角無得輸。劉玉翠個啲都幾好。我 even 覺得大份男仔個媽媽都幾好。

最最最意想不到,係廖子妤囉。佢做弱能人士,係真到不得了,佢話連啲家長都分唔到。真係去做過義工,啲小朋友 exactly 係咁。佢呢隻係自閉個隻,係會無端端自己叫,但你同佢講嘢,佢其實係會理你,佢係知道你同佢講嘢,雖然有時要叫多幾聲佢先知。佢話本身係 cast 余香凝個位,我覺得係佢做都會做得好。新一代除咗王敏奕,佢真係一個好 promising 嘅新晉女演員。

片尾曲:余香凝唱,陳心遙填詞。