給100毛腦細的信

100毛可以做到大紅大紫,會賺大錢我一早就知。果d日日都話你哋抄嘢嘅人根本就唔會明白你哋投入咗幾多腦力同努力。我真係恭喜你呀!賺大錢係你應得架!
點解100毛可以搵到咁多錢?其實100毛嘅成功係建基於User Generated Content(UGC)即係用戶產生內容。100毛嘅所有橋段,用於包括facebook post,雜誌,廣告上面嘅所有內容,都係有「neta」(日文:ネタ;中譯:梗,英文大概係gag?)。而呢d梗多數都係網絡上面由網民製造,只要一日有人上網廢up,一日你哋都唔怕冇材料去做廣告。但咁樣就衍生一個著作權嘅問題,好多人都會好不齒100毛抄人文抄人圖抄人橋而去搵大錢。你哋唔同9gag,求其用content引人睇廣告賺廣告費,你哋係真係有add value,確實地將每一個梗玩得更精彩。呢d梗本來就係大家嘅創作,用來做廣告當然比較容易引起共鳴,有時有d人知個出處有d人唔知,更加為知道嘅人提供咗好多優越感,亦令廣告嘅話題性更加高,廣告主如果可以接受到新事物,想打新時代嘅網絡群眾嘅話,願意俾錢去俾100毛玩梗係合理嘅。故此,你哋先可以贏到開晒巷。
不過,UGC呢d嘢,其實係一把兩刃劍,你咁樣踩鋼線去免費使用人哋嘅創作,點都會引起好多人嘅不滿,呢d不滿唔單止會影響你自己嘅品牌goodwill,賺錢能力,其實仲會影響埋個客。試想下你用一個梗去玩嘅時候,如果產生太大反響,激嬲群眾一陣又罷買又盛,係咪真係個個客都可以真心當係暗黑marketing,越多人鬧越覺得自己個brand紅先?所以,100毛而家可以講得上係刀鋒上舔血。
如果100毛仲想繼續用呢個模式行落去,好簡單,就係呢四個字,「發財立品」。只要有品,就可以塞住班haters嘅口,繼續源源不絕咁去使用呢d咁幫你賺到錢嘅UGC去創作新廣告。做開創意工作嘅人都知道,所謂原創,其實好難界定,所有嘅原創好可能都係其他嘢嘅二次創作。不過,自從有咗網絡,好多新嘅梗,你要搵返個timestamp搵番個source其實真係唔難。例如你唔會講得出係邊個作「傷殘人肉巨無霸,老鼠曱甴夾青蛙」但你好清楚知道「幫老婆落街買外賣」係出自今晚打老婆巴打手筆。
咁具體d講,點樣先可以立品?最直接嘅就係可以仿效日本嘅niconico,佢哋係有一個系統去俾人發佈一d容許二次創作嘅內容,然後每一個衍生作品就可以登錄返係呢棵內容樹下面。藉住呢棵樹,就算係三次,四次創作,一樣可以跟蹤得到,如果100毛用當中嘅4th degree作品去賣廣告搵到錢,咁就可以按照一d條件分成返俾3rd,2nd,1st degree嘅原作者。喺日本網絡,由於大家已經累積多年n次創作嘅經驗,有人作歌有人畫畫有人作詞有人做MV,呢種衍生同使用嘅關係已經好成熟。正所謂雞髀打人牙較軟,如果你嘅一句9up,可以為你帶來收入,俾人攞你嘅創作去用,仲有咩錢可以咁易賺?以依家100毛一個廣告嘅製作費用計,幾十至一二百萬都係閒事,當你要分返一兩千塞住個原作把口實在太抵。與此同時,當大家都知道你係會俾錢人嘅時候,個個都爭住嚟你度登記返個出處,然後你仲可以好容易咁睇到個梗嘅受歡迎程度,度橋果陣睇吓個database,真係求其攞個出嚟都賺返晒d時間啦!今次真係uffl啦!

咁當然,做呢套系統,請返d人去verify個所謂原作者係咪真係原作,解決下d原作者之間嘅紛爭等都係cost嚟。但呢個model長做長有,投資嘅ROI一定可以翻到數架。如果真係有心搞,隨便搵我傾傾啦。希望100毛長做長有,希望腦細都真係睇到啦。
