我真係恭喜你班商界呀 選咗林鄭依個咁嘅女人

假才子
假才子
May 15 · 2 min read

剛睇到,某位好耐冇蒲頭 (即我好少見佢上新聞咁解) 嘅大狀兼法律界選委,被網媒訪問講林鄭同引渡條例,佢就講起「(當年選特首) 衡量過是曾俊華比她適合,但結果佢777票當選。」

其實當時通街都知曾俊華好過林鄭架啦。嗱我要強調我唔係話曾俊華本身特別好,但比較對象係林鄭嘅話,應該點都係曾俊華好啲掛。林鄭一來人格有問題,周圍睇唔起人「張檯冇文件」「有時間玩fb」,又成日自吹自擂「天堂留位比我」「考唔到第一喊濕晒」,仲要有人同佢唔同意見就「廢話」「無聊問題」「waste time」。所以林鄭話學溝通技巧咁耐都肯定係冇改善,皆因佢個人本性就係有問題。曾俊華起碼冇咁樣先。

亦由於性格係咁,林鄭只會聽比佢地位高嘅人嘅意見,即係習總。你香港人,無論咩身家身份,佢都唔會放你在眼內,佢只聽老細話。曾俊華係咪會唔聽習總話?咁又唔係,但我估佢唔會去到「只聽」習總話,多少肯同其他人溝通,聽吓意見,唔會咁死牛一邊頸,掛。佢份人唔似係啲乜都同你搏到盡去到盡嘅人。亦都所以咁,北京揀咗林鄭囉。

但都要講返轉頭,令到依個周街都知唔掂既777當選,仲有另一班罪人,就係班聽中共點嘅商界囉。土共就anyway北京話邊個就邊個架啦,特首聽話,佢地冇所謂格,一國一制都冇所謂添。但班商界有票在手,都唔投個suppose親商界,或至少做咗咁多年財政司認識商界嘅曾俊華,係要投中共「醒」你嘅林鄭丫嘛,家陣咪報應囉。

依家引渡條例嚟啦,商界全部喊苦喊忽,連星島信報都寫出嚟啦,林鄭都唔聽,話你廢話呀。啲商界功能組別議員,咪頂多做小手腳,建議吓啲修訂,或者去會議室行個圈就話「我無能」咁,但阻到條條例咩?西環打電話嚟佢地敢唔聽咩?大劉就大逃亡啦,其他商界唔知幾時都要執包袱呢?不過唔知走去邊呢?平日有錢賺就乃共,依家有事又搵外國勢力,人哋唔係事必show你架,一陣真係制裁香港唔知你點算啦。

只可以講,我真係恭喜你班商界呀,選咗林鄭依個咁嘅女人。

(聲明:我絕無性別歧視,只不過諺語「我真係恭喜你呀」之後循例係要跟「咁嘅X女人」咁解。)

    假才子

    Written by

    假才子