有人話，香港年輕人搞成咁，係咪教育出問題。我同意香港教育係有問題。一班自私自利、貪威識食、欺善怕惡、冇人性血性嘅大人，下一代竟然咁肯為社會公義、民主自由、無私奉獻，成件事直頭神奇。
有啲大人成日睇新聞就鬧「咁樣我點教細路呀」，即管睇吓我哋社會班所謂精英賢達係比啲咩示範年輕人：政府講大話；律政司犯法；財政司經營劏房；警察爆粗同用暴力；議員學歷造假。做錯事唔認，「我話OK就OK」；口講愛國同大陸幾好，實則全家揸外國護照；叫人學高科技但自己八達通都未識用；自己講唔到普通話又鬧大學生講唔好…
有人叫佢哋獻世派，都真係幾獻世，年屆花甲都仲提小學考第一。自認好打得，道歉只發新聞稿，遲幾日開記者會，但仲係唔敢去公開場合，要圍爐見人誇口「未死得」，點知都比人當面鬧仆街。身邊果班，從政四五十年，吹噓自己幾多經驗見過幾多大場面，細路仔係唔會識政治唔會有國際視野，結果完全睇唔到送中會引來二百萬人上街同國際反響，為習總添煩添亂。
從商果班就鐘意講返大陸幾多機會幾易搵錢，但一條送中就揭露個個靠貪污犯法、偷呃拐騙、跪求括免。講到自己叻到曉飛，不過除咗炒嘢有咩掂？大陸各行各業都有人發到達，唔見你哋做到？如果大陸冇比老毛鎖國，一早對外開放，加埋回歸前英資撤退，你哋邊有機會上位？
跟住，明明依班所謂賢達好多受過英美高深教育，但完全冇學到人哋核心價值，返到香港出賣民主自由不遺餘力，又吹噓獨裁幾好，仲以摧殘年輕人為樂，尤其係可以一邊自認慈母一邊血腥打壓細路，簡直心理變態。
以上只係講幾班所謂精英賢達，一般五毛廢老 (特此注明，唔係全部長輩都係咁) 更加係唔知有咩叻，咪都係靠兩蚊優惠、生果金、長生津過生活，都可以鬧後生人。以前怕共產黨走落嚟香港，依家就開口埋口大陸幾好共產黨幾偉大，自己洗自己腦都得。但睇佢哋會鬧年輕人係「文革」「紅衛兵」「衰過共產黨」就知，其實內心深處都係怕共產黨，實情係人格分裂。
自己咩都睇錢不特止，亦唔相信其他人會肯唔為錢而係為社會公義，總之上街都係收錢，連以死抗議都係收錢。講到底就係相信有強權冇公理，有錢使得鬼推磨，唔理咩民主自由同下一代面對2047，自己un un腳過到世，間中可以平價團返大陸食吓平嘢，用吓APPS叫雞，咪夠囉。最好笑都係話自己唔講政治，但又鬧後生搞政治，咁其實咪就係講緊政治囉，唔講。
跟住睇吓佢哋自己示威個款，娜就真係示範咩叫暴徒啦。粗言穢語、成地垃圾、阻街佔路、拆人祠堂、想打人咁款。年輕人呢？其實警察唔阻住路線，大部分時間示威時不知幾和平理性。咩暴動喎，邊樹有暴動係冇人打砸搶燒，啲名店商場銀行完全冇事，政府以外其他人照常返工，同埋至至至誇張嗰樣，臨走時仲會拾埋垃圾同派傳單致歉架？
到底香港呢班上一代係點樣培養出咁叻仔的下一代，真係好神奇。不過啱啱FB見到朋友呢句點醒我：要警惕自己以後千祈唔好變做咁嘅大人。冇錯，下一代都是看著上一代長大的。不過是看著滿滿的反面教材，同自己講千祈唔好變到佢哋咁，自私自利、貪威識食、欺善怕惡、冇人性血性，長大的。
