百彈齋主
Dec 20, 2018 · 4 min read

《香港人的身份矛盾–香港與中國香港》

上文講到「本土主體意識即以香港作為個體考量,而不是某國下香港。」其實四年前就已經一早有講,包括梁天琦嘅競選政綱、青政嘅政綱、甚至係當日普羅主張嘅全民制憲,反蝗同港中區隔,都可以概括為「據本土主體意識嘅方向」、「以香港為獨立個體思考」

泛左支黃熱城方向係,佢地以「中國香港」嘅現有政制為自己界限,或以現有政制為框架,甚至要以中國現有價值觀思考,所以係呢年我地會發現,當一國兩制近兩年急轉直下,中國同西方衝突增加,特別當美國係港中關係施壓,係各項香港嘅國際問題上,泛民政客係進退維谷,就係因為佢地好難思考「中國香港」以外嘅情況,一但跳出「中國香港」,佢地就難以兼顧。

而反觀由「主張一國兩制失敗」、「主張中國違反聯合聲明」、「要求美國審視香港政策法」、「取消香港嘅特殊待遇」、「認為香港有二次前途問題」、「否定中華民族主義」,甚至要求獨立一系列本土各派主張,就正正係以「本土主體意識」為基礎,以香港為單獨思考嘅結果,會變成將香港地位事務,優先過與中國關係,甚至當香港同中國有利益衝突,必定以香港優先。

呢個係「香港」同「中國香港」嘅思考分別,如果以後者嘅思考,永遠到最後都係「要求」中國如何,並不是嘗試爭取到底,任何情况留有餘地,極端啲講「唔好激嬲共産黨」就係呢種「思考」下嘅產物,因為自覺是中國一部份,就算明知中國唔放權,同時候害怕得罪中國惹來報復,就唯有以民意作盾牌,提出要求後就躲在盾牌,而非作為矛去爭取或主動達成目標。

所以很多泛左支黃,特別係老一輩同中生代,如古德明任建峰梁文道主張同本土反面,佢地其實係明白,當大家嘅思考身份不一,佢地難以忍受以「香港人」身份思考,因為佢地半生都堅信「中國香港人」係唯一價值,就如任建峰自言:「我們不是逢中必反。我們會有關係要好的建制派支持者親友,而且願意與他們在時事議題上維持溝通。」講到尾,佢地主張依然係以「中國香港人」身份,或「在港的中國人」思考,盡力食兩家茶禮,維持對華有利體制,避免損害中國利益,選擇面對問題根源就視而不見,或以民生時事迴避,務求模糊嘅「香港人」同「中國香港人」,兩個身份帶黎嘅利益矛盾,思考上嘅分别。

亦可以理解,點解越黎越多泛左支黃嘅溫和人士,中立人士,同內部嘅後生同泛民產生矛盾,因為佢地係「中國香港人」嘅身份做前設,面對嘅局面每況愈下,兼無力提出方向改變,呢種又要食兩家茶禮,又要好談民主,但內部行事專制,又要兼容愛國民族主義,不忘要得到西方認可「香港民主代表」,其實已經令好多人厭倦。


「本土主體意識」嘅思考,必然會分出「香港」還是「中國香港」,而衍生一個關於「本土」爭議—「本土即排外」

一直好多泛左支黃指責「本土即排外」、「散佈仇恨價值觀」,我地先放下左右意識,但我唔知係佢地有意忽略,還是無仔細觀察,一直以黎,由政策層面主張嘅「反雙非」到「取回單程證審批」,到文化上嘅身份認同等等,本土派一直提出一個原則:「香港係應該接納認同香港文化,價值觀的人為先」點解有要求嘅接納算係排外呢?

就算以普世價值為主,實行民主制度,尊重人權自由嘅西方國家,都有明確嘅「移民制度」,審查移民身份,設有考試同要求,甚至發現該人士,居住期間從未融入當地,更會趕驅出境,唔通佢地又係排外,又係民粹?

大愛包容,多元價值係美好願景,但同時係空泛而蒼白無力,當一個地方無咁嘅基礎同準備,客觀條件唔容許下,然後依然不斷高呼無條件大愛包容,忽略對社會影響,唔理解因此埋下更多族群矛盾,由二次殖民後嘅廿年,我地已經見識過一切。如果高門檻就等於排外,根本呢種假設係無視現實問題嘅妄想。

而呢個亦係「本土主體意識」下嘅分別,當抱住中國香港角度,單程證、普教中、廢正立殘、以普通話取代廣東話,呢一切多元價值下嘅「文化融合」,但以香港角度看,呢一切只係借多元包容下嘅「文化清洗」

黎到呢到,我地就會開始睇到本土主體意識下嘅香港,同過往中國香港嘅分别,或者係部份問題會有相容空間,但當問題一涉及身份認同,文化認知,甚至一啲根源問題,香港地位詮釋等等,矛盾就會產生,簡單講就係當有「本土主體意識」嘅人,同「非本土主體意識」合作,要達成互信係困難。

我曾經分享過,「中國香港人」呢個身份,最終會在中國嘅清洗下,步上西藏、維吾爾、蒙古後塵,到時只會餘下「中國人」可選,「本土主體意識」就係中國壓迫下催生,同時肯定「香港人」呢個族群和身份而出現 。

聚言時報版

Welcome to a place where words matter. On Medium, smart voices and original ideas take center stage - with no ads in sight. Watch

Follow all the topics you care about, and we’ll deliver the best stories for you to your homepage and inbox. Explore

Get unlimited access to the best stories on Medium — and support writers while you’re at it. Just $5/month. Upgrade

Get the Medium app

A button that says 'Download on the App Store', and if clicked it will lead you to the iOS App store
A button that says 'Get it on, Google Play', and if clicked it will lead you to the Google Play store