百彈齋主
Feb 28 · 7 min read

《YouTube黃標事件,代理人可趁機滲透市場》

我延續上篇《中國代理人反攻戰—進軍YouTube之路》嘅文章,再繼續我地探討「香港Youtuber」,依家大家都不停講「黃色Youtuber」,但我會想知道,包括文宣手足,同發起嘅人,有幾多係真係做Youtuber出身,或真係理解YouTube機制呢?

今次會講下「黃標」起源同影響,而及黃標影響香港Youtuber營收之外,黎緊嘅最大威脅。


黃標的起源

首先我會建議大家要睇一份嘢:「廣告商青睞內容規範」,大家首先要理解,當一個YouTube User變成Youtuber,就一定會參與「YouTube合作夥伴計劃」去令自己頻道有營利運作,呢點Terry有講,但佢無講一個關鍵,甚至大家都經常忽略,個計劃第一點就係「遵守各項YouTube營利政策」,而當中「廣告商青睞內容規範」就係其中一項。

其實呢個問題係歐美YouTube,一早一六年講緊「廣告商青睞內容規範」係有審查嫌疑,當時我都有寫一篇文章(你地明唔明一個唔係Youtuber嘅人,走去寫YouTube政策問題係幾諷刺),叫《「你今天審查了嗎?」—兩項被香港人忽略的YouTube政策》,當時YouTube到今日都未試過正面回應,「廣告商青睞內容規範」嘅模糊同執行尺度。

而直到上年嘅下半年開始,台灣同香港就開始出現廣泛嘅黃標判定,估計係Google累積到一定數據,可以實行A.I檢測,基本上大部份Youtuber,就受到黃標不同程度影響,但總結來說,黃標的標準及關鍵詞,片段中那些行為會觸發黃標,台灣各大Youtuber都大致上掌握到,甚至因應黃標事件,他們會更積極開展會員功能,擴大社交群體,甚至用其他支援平台,反觀當時香港受嘅衝擊就好似無咁大。

不,應該講有最經典例子係不滅墨水,但無他……我相信內容因為長期被人投訴低俗粗口多,而系統會因為長期投訴,將成個頻道自動黃標左佢,要Youtuber親自聯繫,先有可能改變情況,而香港現時情況,但除左政治類,同明顯玩低俗路線之外,點解無好似台灣咁嘅情況?

因為香港Youtuber嘅內容,主流都係打機、生活、旅遊、飲食、美妝為主,無咁易陷入爭議問題,呢個就係同台灣唔同嘅地方,台灣Youtuber已經慢慢轉型成綜藝娛樂,佢地嘅企劃要突破網絡創作,甚至要抗衡傳統媒體,而香港嘅內容同市場無咁多元化,甚至相對嘅未成熟,反而大家無咁易觸動規範。


黃標是政治迫害?

吳志森喺自己YouTube Channel講Google嘅大中華管理層,或者相關人員都係中國人,對好多話題做嚴格審查,咁之後Terry的媒體懶人堂就寫左《YouTube戰線的黃標危機》,當中就投訴YouTube黃標機制,係白色恐怖同政治審查之嫌。

但我必須提出一個現實:

「其實YouTube嘅黃標機制,只要個話題,題材,相關內容被判定黃標,無論係香港Youtuber,定中國代理Youtuber都一定無得走,既然大家都一定中招,點解得香港Youtuber呼天搶地,對家就無乜嘢講?」

簡單黎講,依家講緊武漢肺炎嘅Youtuber,無論係邊嘅Youtuber,都係注定被人黃標,因為Google A.I已經判定「武漢肺炎」係違反「廣告商青睞內容規範」,避免有Youtuber,借武漢肺炎去炒作,甚至發放假資訊,引用台灣Youtuber阿滴英文嘅睇法,佢認為黃標事件係源於2018年左右,歐美Youtuber出現越黎越過界嘅拍攝,例如Logan Paul喺富士山拍攝自殺都遺體,引起好似Disney嘅大公司拒落廣告,所以就埋下黃標事件。

容我引用我一六年舊文一段,經已預計嘅情況:「而這些大型的跨國公司,需要穩定環境,或者他們相信,現在巿場暫未有公司,可以影響他們的壟斷,所以從以上兩大政策*,他們可以趨向保守,因此就向一眾YouTuber落手,務求令不穩定因素減少,希望他們迎合「大眾巿場」,吸引更多層面的觀眾及廣告商」

*:另一項為已擱置嘅YouTube Heroes計劃

始終對Google黎講,YouTube最大收入就係廣告,所以加強內容係適合家庭大眾,係無可避免嘅事,而Youtuber嘅營利分紅,又係源於廣告費,所以會有呢個黃標去避免Logan Paul事件重演,所以香港人因為講武漢肺炎,或相關政治爭議,就俾YouTube黃標唔好咁易講「政治迫害」,你可以投訴制度唔透明、規範模糊地帶太廣,制度無彈性同人性化,但一下指責做「政治迫害」,只係顯示你對YouTube嘅唔熟識。


黃標並不可怕,可怕係市場被滲透

我在前半段,我提出左個問題:「點解得香港Youtuber呼天搶地,對家就無乜嘢講」

其實我喺《中國代理人反攻戰—進軍YouTube之路》中就已經講左,呢個問題嘅原因:

「而中國依家個模式,就似係想培育一班代理人,然後有專門公司或人士,協助拍攝、後製、企劃……所以佢地係有組織同計劃咁做,呢種規模咁拍片同傳播,係可以有資源戰人手,跟足影響因素咁拍片」

雖然香港Youtuber大多數,無法單靠YouTube分紅維生,但YouTube分紅依然係主要收入,當香港Youtuber受到不同程度黃標影響,加上黃色YouTube圈所帶黎嘅表態壓力,當對方係可以燒住資源,去同香港YouTube競爭,唔洗靠YouTube營收分紅為主收入,我地係可以預見香港Youtuber嘅困局。

而大家留意一件事,代理人Youtuber佢地並唔係以「政治」做主調,呢點係好多人忽略嘅問題,就算由愛字頭加建制派嘅KOL100,其實佢地好多都係「頻道主題內容為主,政治表態為輔」,而唔係純粹講政治,但反觀依家黃色YouTube圈興起,變左唔講政治反而有問題。

Image for post
Image for post

而當TVB同HK01都準備,自家培育網絡KOL,前者可以利用寡頭媒體優勢再配合網絡,另一邊就燒資源建立左網媒優勢,利用自己嘅優勢去進入網絡市場,而重點係:

「佢地培育嘅係娛樂為主嘅KOL及Youtuber,以娛樂及悠閒去滲透香港網絡,壟斷及壓縮網絡營生嘅空間,改變普通人可靠網絡,建立自媒體抗衡傳統媒體。」

而大家支持黃色YouTube圈,本意係好,但問題係解決唔到,當下中國利用代理人優勢,全面滲透同搶佔市場,甚至因為黃色YouTube係以政治表態為定義,喺黃藍之間根本無彈性,我認同中立同加害無分別,但迫人表態後,又無法助人維生,到時只係損人不利已,而當黃藍Youtuber嘅衝突一多,就會進一步打擊廣告商,搵所謂黃色Youtuber代言同業配嘅意願,最後就係益左TVB同HK01嘅網紅,因為佢地齋做娛樂,唔會涉及政治。


後話—

簡單總結一下,現時對方有三套代理人網絡,然後推緊兩個方向嘅KOL,一個係有傳統及網絡平台優勢嘅娛樂KOL(HK01,TVB嘅藝人,甚至國內網紅都隨時來港);另一個就係以中國代理人嘅素人為主,兩面夾擊嘅情況,加上黃標下嘅創作壓力,甚至黃色YouTube圈嘅群眾壓力。

係三種壓力下,加上搞手唔熟YouTube,二來搞手將黃色經濟圈個套,夾硬放左喺YouTube到,但係忽略YouTube營收原理,下次將會探討:

「黃色概念圈,反而害死香港Youtuber。」


伸延閱讀:

暗網仔:黃標事件影響我1年了 — (2020影片,黃標嘅影響及如何觸發黃標)

https://youtu.be/AEKh74VcA_4

Joeman:深度訪談!讓Youtuber 喪膽的黃標事件!ft.阿滴、酷炫、胡子、奎丁、妞爸 — (2019影片,黃標對台灣Youtuber影響及觀察)

https://youtu.be/o2i8vD1Ab4E

何謂黃色Youtuber圈?Happy Konger三子睇法(A) — (2020影片 — 有關黃色YouTube嘅問題)

https://youtu.be/DLxQbyRok7o

超粒方:YouTube,搞什麼??!! | 言論自由已死(2016年影片 — 有關廣告商青睞內容規範)

https://youtu.be/J0EdfdNSlPs

《中國代理人反攻戰—進軍YouTube之路》https://link.medium.com/TQP9Pc16p4

《「你今天審查了嗎?」—兩項被香港人忽略的YouTube政策》http://polymerhk.com/articles/2016/10/05/35019/

Welcome to a place where words matter. On Medium, smart voices and original ideas take center stage - with no ads in sight. Watch

Follow all the topics you care about, and we’ll deliver the best stories for you to your homepage and inbox. Explore

Get unlimited access to the best stories on Medium — and support writers while you’re at it. Just $5/month. Upgrade

Get the Medium app

A button that says 'Download on the App Store', and if clicked it will lead you to the iOS App store
A button that says 'Get it on, Google Play', and if clicked it will lead you to the Google Play store