Mere Jivan ki Awazen : Gandh Potash aur Sheepa
Mein apne gaon se seher jaake padhne wala pehla baccha tha. School mein mujhe teacher roj ek story sunati thi jaise “kauaa, patthar aur aadha bhara ghada” aur “Machali jal ki rani hai jeevan uska pani hai, hath lagao to dar jayegi, bahar nikalo to mar jayegi”. Har bacche ko story repeat karni hoti thi. Jo baccha daily story bolta tha uska confidence level badh raha tha aur jo bacche kam story bolte the unka confidence level low tha aise bacche story sunnate huye beech mein atak jaate the to unki gaadi wahin atki rehti thi.
Mere gaon ke log kaafi curious rehte the suru se hi ki mein kya seekhta hun seher ke school mein. Jab nursery se aage classes mein aaya aur likhne padhne wali books aayi mere haanth mein to kuch log thoda bhut hindi samjh lete the lekin english ki books kisi ko bhi samjh nahi aati thi to mein unhen pictures dikha ke aur bolke batata tha ki mein kya seekh raha hun school mein. Ye daily ghar ke aage neem ke ped ke neeche baith ke homework complete karte samay mera kaam tha.
Class 5 mein jab mein aaya to mujhe cricket ke saath pyar ho gaya. School mein lunch time mein cricket khel pata tha lekin mann karta tha ki gaon jaake bhi roj khelne ko mile ye game. Mere gaon mein kisi ko bhi nahi aata tha cricket khelna to mein seher se magazine aur cricket ke cards leke jaata tha aur apne friends ko bolke samjhata tha ki cricket game kaise khela jaata hai, kitna anand wala hai. Pictures dikha ke samjhata tha, phir radio pe cricket matches sunane ka trend bhi badhaya apne age ke bacchon mein. Thode hi time mein cricket khelne ki ek choti si team ready ho gayi aur hum sab khoob maje se cricket khelne lage. Kuch friends padhne jaane lage the to thoda sync fast banane laga tha, hum mein se ek banda commnentary karta tha taki khelne waloon ka utshah bana rahe.
Mujhe padhne aur cricket ke alwa ek aur cheez mein interest aata tha vo tha gaon ke bahar ashram. Vahan par Ramayan, Mahabharat aur spiritual baaton ke saptahik aur daily program chala krte the vo sab sunane mein mujhe bhut mazaa aata tha. Padhne ki jaageh sunake seekhne mein mujhe bahut interest tha.
Jab mein akela baitha hota tha aur gaon ke upar se aeroplane nikalte the tab unki awaz sunake mere dimage mein ek sapna set hone laga tha ki mein pilot banunga. Lekin cricket mere jivan mein aise chipak gaya tha ki Class 8 tak aaya to mere dimag mein set ho gaya tha ki Sachin Tendulkar ke saath cricket khelunga.
School, cricket aur ashram ke alaava kheton pe jaana bhi din ka ek hissa tha. Khetoon mein fasal jab hoti hai to pakshi aur jungli janwar aa jaate hain fasal khaane ke liye, jinko bhagaane ke liye tej aawaz ka use kiya jaata hai. Iske liye Gandh aur Potash ke mixture ko iron ke bane huye naal mein rakhte hain, jisko pathar ya ground pe jor se maarne pe mixture blast hota hai aur bahut tez sound hoti hai jisse pakshi ya janwar bhag jaate hain. Khet mein kaam kar rahe log aur ghar wale jab lunch karte the tab us samay mein tej sound kar ke pakshi aur janwar bhagaane ka kaam karne lagta tha ismein bahut maja aata tha.
Bachpan ke in sab anandon ke beech mene apne friends ke saath milke kuch kutton (Bhura, Kalua aur Sheepa) ko train kiya tha jo hamari awaz ko follow karte the. Hum un kutton ki help se khargosh pakdte the iska bhut shauk tha kyunki khargosh akele khud se pakadna aukat se bahar tha. Ek bar Sheepa ne khargosh ko jabde panje jayada jor se maar diye aur wo kargosh us ghaw se recover nahi kar paaya. Usko ye duniyan chod ke jaana pada. Iss incidence ne mujhe thoda hila diya uske baad mene khargosh pakadne wali activity band kar di aur meri life aur awazoon ko follow karti huyi aage chalti chali gayi.