鳥林童話:國王的新衣

國王的新衣插畫 CC-BY-NC-SA 3.0 by misskoco

從前,有個好貪靚嘅國王,由朝到晚命令王宮裡面嘅裁縫,同佢整唔同款式嘅西裝。雖然裁縫好認真咁做嘢,但係日子耐咗,就冇一個諗得出新花款。

國王冇滿意嘅新衫著,決定落街市街貼街招,上面寫住:「如果有人能做出令國王滿意嘅新衫,可以得到一大筆獎金。」國王着嘅西裝有特別要求,一定要三件頭,一件代表立法,一件代表司法,一件代表行政。

呢個時候,遠東來咗個裁縫,他話佢有新設計,於是國王就召佢入宮。

國王問:「Where are you from?」裁縫答:「和詩比精打鼠花鼠冤特。」國王覺得佢英文都唔識,九唔搭八,於是就叫手下交帶好佢想要件點嘅咩衫,諗住打發佢走啦。

裁縫經傳譯轉達,信心十足咁講:「我識一種魔法,可以做出世界上最神奇嘅西裝。」國王聽到,勁開心仔,急忙問:「係點樣嘅款式,咩花色?點解係世界上最神奇嘅西裝?有咩特別呢?」

裁縫攞出一本白皮書,由白皮書暗格拉出一塊薄紗,然後話:「我呢套西裝係行政主導,只需要披上呢塊薄紗,就會投射出司法同立法嘅幻影啦。」

國王見幾新奇,於是就試下。一試,流嘅。國王想開聲投訴,但係身邊幾位大臣打斷咗佢:「嘩,好靚呀。」國王想講「吓,我乜都見唔到喎」,點知佢講出來嘅卻係:「真係神奇呀,我哋依家去巡遊!」

唔知點解,所有見到塊薄紗嘅人都講大話。

於是國王就出咗去巡遊啦。一路上嘅人民都歡呼喝采,國王都迷失咗本性,以為自己有著衫。事實係,大家見到赤裸裸嘅國王都覺得好核突,只係言論嘅空間被魔法扭曲,真相無法傳播。

原來國王的新衣唔止冇三件頭分立,仲會禁制言論自由,令大話四出肆虐。

王國嘅大人為咗保護小朋友,都唔比小朋友面對國王。十幾年後,魔法已經失效,但國民已經習慣咗活在謊言之下,再冇人質疑三件頭分立制度去咗邊。

之不過,當年嘅小朋友依家都長大成人,小朋友第一次見到國王,都嚇咗一跳。佢哋發起集會,要求國王正視自己。赤裸裸的國王倚仗赤裸裸的權力,命令警察發射催淚彈,驅散班小朋友。

……

……

……

「媽咪,故事講完嗱?」

「故事嘅結局會係點,就靠你寫落去啦。」

One clap, two clap, three clap, forty?

By clapping more or less, you can signal to us which stories really stand out.