Kiko ta un Dieta?

Ta bon pa nos por trese na kla e difinishon di e palabra dieta. Hopi hende ta pensa ku un dieta ta spesifikamente pa baha di peso. Bo ta haña un plan di dieta ku bo tin ku matene bo mes na dje sin kambia nada.

Pero kiko ta un dieta? Dieta ta e kuminda ku bo ta kome i e kantidat di esaki nan. Un dieta ta un estilo di alimentashon ku e meta pa sea baha di peso òf pa por redusi malesa, pero tambe pa biba un bida mas saludabel. Sea pa un periodo kortiku òf pa bida largu. I na un dieta tin reglanan mara na dje. Por ehèmpel: no mag di kome vèt, suku òf salu. Un dieta por wordu rekomenda dor di dòkter, dietista òf e pèrsona mes a skohe pa kabia su estilo di alimentashon.

Dieta ta mas ku simplemente pa baha di peso. E ta un sistema di kome adapta pa sierto proposito. Pa alkansa un meta. Tambe un dieta por wordu rekomenda pa si un pèrsona ta sufri di alergia i no por ku sierto produktonan. Pa motibunan di krehensha òf religion tambe sierto dietanan ta wordu krea.

Si un pèrsona a skohe pa e kuminsa ku alimentashon saludabel, i si e ta sufri di sobrepeso, e dieta mes lo kondusí na bahamentu di peso. Mas saludabel e dieta ta, mas miho estilo di alimentashon bo tin pa un bida saludabel.

“Skohe pa alimentashon saludabel.
Skohe pa Estilo di Bida Saludabel.”

�/|�