自我介紹二：我有一個物理學博士學位（上）

小學寫紀念冊，我會寫志願係成為諾貝爾獎得主。結果諾貝爾獎當然唔輪到我，但都叫做拎咗個物理學博士學位，某程度上算係圓咗童年夢想啦。

其實我好少會主動提起自己有個博士學位，乃至幾乎唔記得咗，因為我根本唔覺有咩了不起。只不過當年要做地區工作，需要搵一個賣點等街坊容易記得，先將哩個虛名搬出嚟，所以一般都係慈雲山街坊或者其他社運同政圈人先會叫我「岑博」。

同好多男仔一樣，我細細個對自然科學好感興趣，經常會就某啲自然現象請教老師同身邊長輩，可惜佢哋都唔見得一定識，而我小學年代互聯網又未盛行，所以好多時都係睇《十萬個為甚麼》嘗試尋找答案，書上冇講嘅就只能抱住疑問。

順理成章，我細個嘅志願就係做科學家，當時仲未識細分自然科學有咩類別，總之好攏統咁覺得「科學」就係我想接觸嘅嘢。小學寫紀念冊，我甚至會寫夢想係成為諾貝爾獎得主，真不知天高地厚，不過亦側面反映咗當時嘅熱情。

時間嚟到中四，入咗理科嘅我開始接觸牛頓力學，少不免要教作用力同反作用力，其中一個經典例子就係平面上有兩個箱，當你推其中一個箱時另一個箱會貼住一齊郁。點知講完之後，呀sir特登再講深入啲，問如果有兩個梯形嘅箱，依家個接觸面唔係垂直而係成一個角度會發生咩事。當推得足夠快，其中一個箱就會開始升起，點樣拆啲力就變得複雜好多。

身邊啲女同學一籌莫展好苦惱咁嘅樣，但我就覺得好興奮，好努力去想像個兩個箱會點移動，啲力要點樣拆，嘩！簡直係個全新世界！原來數學同現實係可以有咁密切嘅關聯！喺嗰一刻，我好清楚好肯定自己想要嘅就係佢。而之後嘅三、四年基本上就係為咗入物理系而讀書。

而中學程度嘅物理好快就滿足唔到我，於是我呀Sir就揀咗我同另外幾個同學試下參加物理奧林匹克，不過印象中都唔係有太多訓練，我又冇話要挑戰難度要拎到咩分數。一試之下就知道比賽題目嘅難度同中學完全唔同（大致上係大學一年級水平），有好多係連點起手都唔識（笑）。

正式比賽當日要山長水遠去到科大，反正幾個同學都諗緊大學讀邊間好，就當順便多個機會參觀。結果竟然都畀我拎到個最低級嘅入門獎，如果我記憶冇錯應該係因為有一條長題目問coupled oscillator，佢啲分題引導我去搵兩個normal mode，我又咁啱想像得到係點樣，於是就成功做到一大半。

順便講一樣我好少同人提及嘅事，就係我中七嗰時幾乎拎到太古嘅獎學金去英國牛津大學讀物理。當時係牛津大學打過嚟做電話面試，全程唔使計數只問概念。第一條問動量守恆，因為之前聽過所以輕鬆答啱咗。第二條係關於熱力學，問如果一間密封嘅房入面有個插咗電掣嘅雪櫃，依家打開個雪櫃門會發生咩事，我就即刻中伏咁答間房會涼咗（笑），然後對方再引導我去得出正確答案（應該係熱咗）。

大概係對方感受到我好鍾意物理啩，所以個電話面試竟然又成功咗，但取錄條件係高考物理、化學同純數都要有A，結果自己把握得唔好就失敗咗。但最尾入到中大物理，仲讀埋博士，都算係咁啦，所以又唔覺得有咩遺憾。

當然啦，例如真係有平行時空，另一個世界嘅我真係去得成英國，人生軌跡就會徹底唔同曬。唔敢講一定會比依家好，但就好好好可能唔會遇上2014年雨傘運動，唔會觸發我參與香港政治。最近橫掃多個奧斯卡獎嘅電影《神奇女俠玩救宇宙》講到唔同平行時空下，同一個人可以有完全唔同嘅能力甚至成就，哩一點我係好有共鳴嘅。

講返中大物理嘅生活。入去前我嘅中學物理老師已經同我講「喺香港想讀物理就入中大啦，質素幾好㗎」。除咗有係人都知嘅楊振寧教授做生招牌，後來仲發現原來系內嘅教授有唔少都係行內好有名氣。

大學嘅物理同中學係兩回事，最大分別在於對數學能力嘅要求高好多，所需嘅數學工具亦遠非中學嘅我可以想像。最記得第一個學期教牛頓力學，明明內容係中學已經識嘅嘢，但當同一件事用向量表達，甚至係單純用唔同嘅座標系統表達，難度已經即時提升。我仲記得第一堂教授輕描淡寫咁解釋咗幾句咩係球座標，然後就開始寫一條條公式，但我完全睇唔明。校園內流傳一句取笑物理系同學嘅金句「係咪入錯系？係咪入錯系？係！」，當刻真係會有咁嘅感覺。不過落咗堂返去認真研究咗一輪球座標係咩玩法，明咗之後就漸入佳境。

成個本科基本上就係圍繞四大力學嚟教。眨下眼去到第三年，亦係最後一年（當年仲係三年制），可以選擇做畢業年習作（Final year project）。當時嘅我依然雄心壯志想繼續深造，而畢業年習作就係體驗做研究嘅最佳途徑。由於童年嘅我對天文學最有興趣，所以我順理成章揀咗天體物理嘅題目，幸運地導師亦願意收留我，於是正式踏上研究之路。

原先只打算寫一篇，點知越寫越長，就先停喺哩度，研究生活就留返下回分解。