香港人有幾多本護照？

近年港中之間關係波折，成日都會一發生咩事就會有人講去續返BNO噉樣。但其實香港人究竟可以有幾多種護照出國玩呢？就由Edward嚟寫少少嘢講下有幾多隻護照曾經係香港本地人喺二戰後有份申領咖啦。呢篇會主要講香港華人嘅情況~

有時有人會話外國護照冇用咖，只係旅行證件，唔係你國籍嘅證明。但其實正正相反，護照根本就係國籍證明，講護照當然會同國籍同政治一齊講。另外，唔討論去咗外國再返嚟嘅人，淨係討論住喺香港土生土長嘅人先。

簡單列舉：中國香港特區、英國國民（海外）、英國公民、英國屬土公民、英國及殖民地公民、 香港身份證明書、 中華民國護照（冇戶籍）

----全文終（誤）----

下面係詳細少少嘅資料

香港特別行政區護照 HKSAR

雖然心情複雜，但係今時今日最多香港人用嘅護照就係上面幅圖有嘅中國香港特區（廁所板）護照。係97年之後開始發行嘅。申請條件係你係香港永久居民，以及你有中國國籍。點樣算係有中國國籍呢？好似係有中國血統（海外嘅華人呢？），或喺中國出世（包括港澳？噉南亞裔港人？），或你雙親至少有一個係中國國籍（海外華人？）……中國國籍嘅嘢好麻煩，有時好似係中國話你係你就係。講返護照，免簽國家都算多，尤其係包括神根國家、日本、韓國、英國等等香港人嘅鄉下，而且唔少人覺得特區護照平（370蚊，十年），而BNO貴（下面會講到），所以使用特區護照嘅人非常之多。

加料：用特區護照嘅人，喺法理上都係中國公民。就算香港人出國寫國籍／nationality係香港，而外國普遍都接受你寫香港，都唔代表香港有公民身份。呢個都只係個佢哋分開香港嘅中國籍同中國大陸嘅中國籍嘅方法，其中一個原因係去好多國家用特區護照唔使免簽而用中國護照要簽證。寫香港係事實上可行嘅一個做法，但法理依據係弱嘅。
加料二：喺海外求助會思考搵香港方面定中國方面求助係好正常嘅，因為連香港同中國自己都會諗究竟香港人應該去邊度求助。有一個講法係香港方面會話，你係中國公民，中國公民就應該搵中國領事館或大使館求助。而中國方面會話，你本護照係香港發出嘅，所以要搵香港幫手。兩邊都好有道理，但你可能會好慘。

英國國民（海外） BN(O)

第二多人用嘅係俗稱BNO嘅英國國民（海外）護照。上圖紅色嗰本就係~喺80年代末開始可以申請呢個身份。大概有三百二十萬香港人喺97年前申請咗BNO嘅身份。呢個國籍係六種英國國籍嘅其中一種。但係BNO唔係英國公民，喺英國冇居留權嘅。BNO亦都唔係歐盟公民。BNO申請咗之後終身有效。BNO嘅申請條件係你喺九七年前係香港居民，以及係BDTC（其中一種英籍）就可以申請。續領護照嘅費用大概係100鎊（最近英鎊跌，趁而家！），大概係1000多啲港紙，用十年。至於有人覺得貴…em 每年100蚊都幾貴下嘅lol。

＊有人話用BNO出去發生咩事英國係唔保你嘅，我想呢啲人畀證據出嚟。因為據我所知，有個香港人喺菲律賓犯罪，搵香港同中國求助都好困難，可能因為大家互相卸膊，反而係英國方面一直跟進幫手。

補充返BNO嘅嘢，BNO身份終身有效，但冇辦法畀後代繼承或畀配偶入籍。97年之後，亦都唔會有方法畀人申請BNO嘅身份。免簽國家基本上同特區護照一樣，有英國、神根國家、日本、韓國、澳紐加拿大，但係冇美國嘅。

英國公民BC

跟住係俗稱BC嘅英國公民喇。具體人數就唔知嘅，但當年政府揀咗五萬個人同家屬可以申請BC，呢個亦係居英權計劃嘅內容。我哋嘅精英有好多都喺呢個計劃度獲得BC嘅身份，譬如林鄭月娥。佢哋嘅身份係同英國本土嘅英國公民完全一樣嘅，但係中國政府就表示唔會承認有中國籍（雖然好難定義）嘅人，無論係因居英權計劃獲得BC身份嘅人定係申請咗BNO嘅人嘅英國國民身份。喺歐盟法律當中，BC都係歐盟公民。（呢個outdate咗lu，2020年英國正式脫離歐盟，BC亦都唔再係歐盟公民。）

補充返BC除咗有BNO嘅免簽國家之外，仲有得免簽證去美國嘅，亦都係其中一樣最明顯嘅分別。

加料三：BNO同BC仲有唔同嘅係，BNO上面會以英文寫明：
一）你擁有香港永久身份證，號碼係 XXXXXXX(X)，你擁有香港居留權。第一係為咗表明，若果畀人遞解出國，會受香港收留；第二係表明可以永久居留香港，唔會因為冇永久居留嘅地方而滯留當地。
二）根據英國移民法例，你唔使簽證就可以入境英國。

英國屬土公民BDTC

英國屬土公民嘅英文簡稱係BDTC，係97前多數英籍香港人嘅身份，亦係登記BNO嘅必要條件。97年之後，香港嘅BDTC自動失效。值得一提嘅係，BDTC失效咗嘅香港人（會成為BOC）若果冇任何其他國籍，或者佢登記咗BNO但冇任何其他國籍，而家都可以申請BC，做個勇敢英國人（唔）。同BNO一樣，BDTC係冇英國居留權嘅。

英國及殖民地公民CUKC

英國及殖民地公民英文簡稱係CUKC，81年之前，英國對英國同殖民地嘅公民冇特別區分，所以CUKC係可以直接去英國定居。之後改例取消CUKC，先出現BC、BDTC呢啲身份。

香港身份證明書CI

香港身份證明書英文簡稱係CI，係畀冇入英籍（冇BDTC、冇BNO、冇BC）嘅香港人申請嘅旅遊證件。亦都係喺97年之後唔再繼續簽發。

中華民國護照（無戶籍）ROC

雖然中華民國政府逃亡去台灣之後，越嚟越少人承認佢代表中國，但係由於佢自認係正統中國，所以佢會承認所有地方嘅中國國籍嘅人係中華民國嘅國民，當然都包括香港地區嘅華人。中華民國嘅護照對有戶籍同冇戶籍嘅人有唔同嘅對待，有戶籍係指喺台澎金馬設有戶籍嘅人，而香港地區嘅華人大多數都係冇戶籍嘅。雖然大家可能都知道台灣護照好好用，唔單止英歐日韓、連美國都有免簽，但係呢本冇戶籍嘅ROC護照冇得免簽去日韓英歐美（得意嘅係去愛爾蘭係免簽），甚至連進入台澎金馬都要申請過先得。

嗚哇，寫曬好似1999噉。多謝一讀，希望多多指教、輕輕拍打。

你而家或者之前有幾個身份？而家有咩護照？ww