Bade ho gaye?


Bachpan yaad hai?
Har scenery mei wahi do pahaad, jinke beech-o-beech ek ugta suraj hota tha
Aur jinke upar chaar panchhi udte the?
Bada khush hota tha na tu?
Jalta bhi nahi tha tere saathiyon se,
Tere saathiyo se jinke panno mei wahi do pahaad hai, aur wahi suraj aur wahi chaar panchhi,
Par tu jalta nahi tha,
Arre kaise jalega ?
Bachha jo tha. Woh tera bachpan jo tha.

Yaad hai woh bachpan?
Jab ek tiffin pe paanch log tut padte the aur teen roti teen minute bhi nahin tikti thi?
Par tu baantne se pehle sochta nahin tha,
Arre kyun sochega?
Bachha jo tha. Woh tera bachpan jo tha.

Yaad hai woh bachpan?
Jab school ke liye nikalte the par pahuchte the theatre,
Darr nahin tha kisiko
Arre kaise daroge?
Bachhe jo the. Woh tumhara bachpan jo tha.

Yaad hai woh bachpan?
Fancy dress hua karta tha aur sab apne dhun mei rehte the. 
Kisiko apna sapna jeena hota tha, toh kisiko bass sajna hota tha,
Sab alag the, par phir bhi apne aap mei the
Tu unhei dur nahin bhejta tha,
Arre kaise bhejega dur?
Tu bachha jo tha. Woh tera bachpan jo tha.

Phir sunne mei aaya bade ho gaye. 
Phir sunne mei aaya bachpan ki maut ho gayi. 
Aur ab jalan hoti hai,
Ab jalan hoti jab tumhaare marks unse kam ho jaye,
Ab jalan hoti hai jab tumhari salary unse kam ho jaye
Ab jalan hoti hai jab unko tumse pehele koi mil jaaye
Ab khushiyan nahi baantne aata,
Ab palon ko jiya nahi jaata,
Bass selfiyaan baant lete hai, 
Shayad dur hoke paas honeka ehsaas dilaate hai woh, par phir bhi,
Khushiyaan baantne nahin aata
Palon ko jiya nahin jaata
Ab bekhauf koi jazbaaton ka zikar nahin karta
Ab bekhauf koi apne aap mei mei nahin rehta
Kyunki woh taazgi aur woh saadgi shayad sabke liye nahi 
Kyunki woh bhi ab sochne lage hai ki yeh hum jaisa nahin
Aur hum bhi sochne lage hai ki hum unn jaise nahin 
Hum unn jaise nahin toh humein koi naseeb nahin
Hum hum jaise nahin toh hum hum mein nahin

Sunne mei aaya bade ho gaye hai.
Sunne mei aaya maut ho gayi hai.
Bachpan ki, aur tere wajood ki.